VOV4.Êđê - Dŭm bruă mâo yang ƀuôn mđing ară anei jing nao tlŏ hĕ amâo dah h’aĭ aruăt vaccine lŏ mbŏ kơ phung hđeh lehanăn aruăt tal 4 kơ mnuih prŏng. Mrâo anei, K’iăng khua knŭk kna Vũ Đức Đam mtă kơ Phŭn bruă mdrao mgŭn ktrâo lač bruă tlŏ aruăt vaccine lŏ mbŏ, bi mklă dŭm klei truh amâo jăk huĭ tăm mâo leh tlŏ, amâo lui kƀah êa drao, kdrăp mnơ̆ng. Hluê si klei hưn mơ̆ng Phŭn bruă mdrao mgŭn, hlăm wưng giăm anei, tar rŏng lăn, mta Omicron jing leh mta kman bluh mâo phŭn hŏng dŭm mta kman mâo BA.2; BA.2.3, BA.2.3.2; hlăk mta BA.5 mâo čih yap leh lu ala čar, huĭ srăng tưp lar hlăm ala čar drei lehanăn ngă mđĭ ênoh mnuih ruă Covid 19 hlăm wưng ti anăp. Ti Việt Nam, ênoh mnuih ruă Covid 19 hlăm wưng êgao mâo klei bi êdah hrŏ ƀiădah ênoh mnuih ruă lŏ đĭ ƀiă hlăm dŭm hruê êgao ti dŭm čar, ƀuôn prŏng. Kyua anăn, brei lŏ hluê ngă dŭm hdră gang mkhư̆, mdrơ̆ng hŏng klei ruă, tlŏ vaccine aruăt lŏ mbŏ kơ mnuih huĭ srăng tưp djŏ klei ruă mbĭt anăn mđĭ hdră mtô mblang kơ mnuih ƀuôn sang thâo săng hlăm hdră gang mkhư̆, mdrơ̆ng hŏng klei ruă.

Klei năng mđing, hnơ̆ng tlŏ vaccine gang mkhư̆ Covid 19 dôk êmưt, boh nik tlŏ aruăt tal 2, aruăt tlŏ kơ mnuih khua thŭn lehanăn tlŏ kơ phung hđeh mơ̆ng 5 truh kơ gŭ 12 thŭn. Dôk ksŭn lu vaccine COVID-19 ti gưl dlông lehanăn alŭ wăl ngă kơ hnơ̆ng vaccine anei huĭ srăng lui jih tơdah amâo dưi mtrŭt mđĭ hdră tlŏ mgang hlăm wưng ti anăp. Hưn mthâo klă hĭn kơ dŭm klei truh amâo jăk huĭ tăm mâo tơdah tlŏ vaccine gang mkhư̆ COVID-19, K’iăng khua phŭn bruă mdrao mgŭn Nguyễn Thị Liên Hương brei thâo: Truh kơ ară anei, êpul bruă mdrao mgŭn tar rŏng lăn lehanăn dŭm ala čar bi mklă vaccine jing hdră msir jăk hĭn kñăm gang mkhư̆, mdrơ̆ng hŏng COVID-19. Hlăm tar rŏng lăn, lu ala čar tlŏ leh vaccine gang mkhư̆ Covid 19 aruăt tal 3, tal 4 kơ mnuih ƀuôn sang. Êbeh 80 ala čar lehanăn krĭng lăn tlŏ leh vaccine kơ phung hđeh mơ̆ng 5 truh kơ gŭ 12 thŭn lehanăn mâo dŭm ala čar tlŏ leh kơ phung hđeh gŭ 5 thŭn. “Ară anei ka mâo ya klei bi êdah kreh knhâo bi mklă vaccine Covid 19 hmăi truh kơ klei suaih pral mnuih ƀuôn sang. Hlăk boh tŭ dưn mơ̆ng vaccine hrŏ pral, kyua anăn, čiăng krơ̆ng kjăp klei tŭ dưn răng mgang, brei drei tlŏ aruăt tal 3, tal 4 hluê si klei ktrâo lač mơ̆ng Phŭn bruă mdrao mgŭn. Tlŏ vaccine gang mkhư̆ Covid 19 čiăng rơ̆ng kjăp hdră gang mkhư̆, mdrơ̆ng hŏng klei ruă tưp, kyua anăn brei mnuih ƀuôn sang nao tlŏ djŏ wưng, djŏ hnơ̆ng”.

K’iăng khua knŭk kna Vũ Đức Đam mtă kơ dŭm phŭn, dhar bruă, alŭ wăl ksiêm dlăng, mă klei hriăm mơ̆ng dŭm ala čar hlăm bruă pŏk mlar mnuih tlŏ aruăt mbŏ (aruăt tal 3, 4), bi hrŏ gưl thŭn phung hđeh dưi tlŏ vaccine. K’iăng khua knŭk kna Vũ Đức Đam mtă:Phŭn bruă mdrao mgŭn brei ksiêm dlăng kluôm hră m’ar êlâo adih, brei mâo hră m’ar hưn lač klă nik čiăng kơ dŭm čar thâo hlei pô tlŏ, dŭm aruăt tlŏ, mđĭ hdră mtô mblang kơ mta kman mrâo, kơ klei hmăi amâo jăk tăm mâo mơ̆ng vaccine, si srăng ngă dưi tlŏ hŏng klei êđăp ênang tal êlâo hŭn. Brei hưn mdah klă hlăm hră m’ar mơ̆ng Phŭn bruă mdrao mgŭn, leh mâo klei mtrŭn mơ̆ng Phŭn bruă mdrao mgŭn, mnuih ba anăp hlăm êpul dưi tlŏ brei ba anăp nao tlŏ êlâo hĭn mtam”.