Aguah mbruê, Phŭn bruă mdrao mgŭn pŏk leh Klei kƀĭn kreh knhâo lehanăn kdrăp mrâo phung êdam êra bruă mdrao mgŭn tal 21. Klei kƀĭn mâo 42 êpul, mâo Sang hră ksiêm hriăm, sang hră gưl prŏng, gưl krah bruă mdrao mgŭn kluôm ala nao hgŭm, sang êa drao gưl čar, sang êa drao êngao knŭk kna hnơ̆ng 2 kơ dlông lehanăn phung mă bruă ksiêm hriăm... Hlăm 272 klei hưn mdah, mâo 132 klei hưn hŏng klei Angle.

Anei jing wưng bui mni kơ phung nai, phung mă bruă kreh knhâo lehanăn knuă druh hlăm êngao anôk bruă mâo leh klei đru mguôp kơ hdră mjuăt bi hriăm mnuih mă bruă mdrao mgŭn.  Mbĭt hŏng klei hưn mdah kreh knhâo, knăm anei lŏ mkŏ mjing klei kƀĭn trông kơ “Bruă klam phung êdam êra hlăm hdră mlih mrô anôk bruă mdrao mgŭn” lehanăn hưn mthâo “Hdră phung kreh knhâo bruă mdrao mgŭn Việt Nam tar rŏng lăn”. Hdră anei srăng đru mđĭ klei hgŭm mguôp, jak iêu phung êdam êra mâo klei thâo nao hgŭm hlăm hdră ksiêm hriăm bruă mdrao mgŭn hlăm lehanăn êngao ala čar./.