Hluê si Knơ̆ng bruă mdrao mgŭn čar Gia Lai, mơ̆ng akŏ thŭn truh kơ ară anei, kluôm čar mâo leh êbeh 2 êbâo čô đing mâo klei ruă ƀlĕ sruê ti 17 kdriêk, wăl krah, ƀuôn prŏng mơ̆ng čar. Hlăm anăn, ênoh mnuih ruă ka tlŏ vaccine truh 40%. Thŭn 2024, čar tlŏ mgang leh vaccine truh êbeh 95%, ară anei dôk pŏk hdră tlŏ mgang hlăm thŭn 2025, gĭr bi leh hlăm mlan 3 hŏng mta kñăm dưi tlŏ vaccine kơ êbeh 95% ênoh hđeh dôk hlăm êpul brei tlŏ.

Ti knăm anei, êpul mă bruă mơ̆ng Phŭn bruă mdrao mgŭn mñă leh klei yuôm mơ̆ng hdră tlŏ mgang, mtă kơ Gia Lai ngă leh hră mơar hưn mthâo, mtrŭt mđĭ pral hdră tlŏ mgang lehanăn mđing bi hrŏ klei ruă anei tưp lar ti anôk bruă mdrao mgŭn. Mbĭt anăn, Gia Lai brei mđĭ klei thâo săng mơ̆ng êpul êya, mkra mđĭ kdrăp ksiêm dlăng klei ruă tưp lehanăn bi hgŭm kjăp mơ̆ng dŭm anôk bruă djŏ tuôm kñăm mkhư̆ klei ruă anei tưp lar./.