VOV4.Êđê - Phŭn bruă mdrao mgŭn gĭt gai leh klei bi kƀĭn online kluôm ala kơ bruă pŏk hluê ngă Hră bi mklă điện tử tlŏ leh vaccine Covid 19. K’iăng khua phŭn bruă mdrao mgŭn Trần Văn Thuấn brei thâo, ară anei hnơ̆ng tlŏ vaccine gang mkhư̆ Covid 19 kơ mnuih ƀuôn sang dưi mđĭ pral, mbĭt anăn ba yua leh kdrăp bi mklă mrô ala čar kơ ênoh mnuih čiăng hưn mthâo kơ mnuih ƀuôn sang dưi tlŏ leh vaccine gang mkhư̆ Covid 19. K’iăng khua phŭn bruă mdrao mgŭn mtă kơ dŭm alŭ wăl hluê ngă bruă pŏk hluê ngă Hră bi mklă điện tử tlŏ leh vaccine Covid 19 hluê djŏ si klei ktrâo lač mơ̆ng Phŭn bruă mdrao mgŭn. Hluê si klei hưn mơ̆ng Phŭn bruă mdrao mgŭn, truh kơ ară anei, kluôm ala tlŏ leh êbeh 201,8 êklăk hnơ̆ng vaccine gang mkhư̆ COVID-19. Phŭn bruă mdrao mgŭn  mtă kơ dŭm alŭ wăl mjêč tlŏ vaccine čiăng bi leh aruăt tal 3 kơ mnuih êbeh 18 thŭn, mprăp tlŏ kơ hđeh mơ̆ng 5 – 11 thŭn./.

H’Nêč pô mblang