Mbĭt hŏng dŭm alŭ wăl kluôm ala, čar Ninh Bình jing sa hlăm dŭm alŭ wăl mâo giăm 100 knăm mơak, điêt prŏng dưi mkŏ mjing hlăm gưl akŏ yan mnga. Hlăm anăn, mâo dŭm knăm mơak Yan mnga jăk êdi, iêô jak lu phung tue hiu čhưn ênguê, hiu čhưn dlăng jăk siam. Phùng Văn Giang, K’iăng Khua anôk bruă doh êbăt mnơ̆ng ƀơ̆ng čar Ninh Bình brei thâo: knăm mơak thŭn 2023, Anôk bruă gĭt gai doh êƀăt mnăm ƀơ̆ng mơ̆ng čar Ninh Bình mâo hdră ksiêm dlăng, kriê dlăng mnơ̆ng dhơ̆ng, rơ̆ng doh êƀăt mnơ̆ng dhơ̆ng hlăm jih yan knăm mơak.

“Tal sa jing iêô mkrum jih hnơ̆ng kdrăp mnơ̆ng leh anăn hdră hâo hưn mtô mblang čiăng hâo hưn dŭm hdră kčah mơ̆ng knŭk kna kơ klei doh êƀăt mnơ̆ng ƀơ̆ng hlăm bruă mkra mjing mnia blei. Leh anăn ktrâo lač mnuih ƀuôn sang hrŏng ruah kriê dlăng mkra mjing mnơ̆ng ƀơ̆ng hŏng hdră êđăp ênang; Kƀĭn hlăm dŭm mta mnơ̆ng ba čhĭ hlăm knăm mơak. Mbĭt anăn, mơ̆ng hruê 15/12/2022 truh 15/3/2023 snăn dŭm anôk bruă alŭ wăl kluôm čar ăt trŭn ngă bruă hâo hưn mtô mblang kơ klei doh êƀăt mnơ̆ng ƀơ̆ng leh anăn mkŏ mjing dŭm êpul ksiêm dlăng mlir dhar bruă, thơ̆ng kơ bruă, ksiêm dlăng kơ klei êđăp ênang čiăng thâo ƀuh leh anăn hmao msir mgaih dŭm bruă ngă kơ klei doh êƀăt mnơ̆ng ƀơ̆ng.”

 Knăm mơak Sang Yơng Hương ti să Hương Sơn, kdriêk Mỹ Đức, ƀuôn prŏng Hà Nội jing knăm mơak mâo mmông sui hĭn, truh 3 mlan. Nguyễn Bá Hiển, Khua dhar bruă wăl kriê pioh anôk jăk siam Hương Sơn brei thâo: mkŏ mjing êpul ksiêm dlăng mlir dhar bruă kơ doh êƀăt mnơ̆ng ƀơ̆ng leh anăn msir mgaih dŭm hdră ngă soh hŏng hdră kčah:

“Drei mkŏ mjing Êpul ksiêm dlăng mlir dhar bruă, hlăm anăn mâo bruă mdrao mgŭn, kriê dlăng anôk ba čhĭ leh anăn dŭm bruă djŏ tuôm hŏng bruă sang čư̆ êa alŭ wăl ti anăn čiăng kƀĭn ktrâo lač leh anăn hâo hưn kơ mnuih ƀuôn sang, boh nik msir mgaih mtam phung ngă soh, amâo hlue ngă si klei kčah mơ̆ng anôk mkŏ mjing knăm mơak Sang yơng Hương hlăm bruă boh êƀăt mnơ̆ng ƀơ̆ng ăt msĕ mơh bi hơĭt ênoh hưn mdah ti dŭm sang mnia.”

 Hlue si hdră kčah “mđĭ ktang ksiêm dlăng, ktuê dlăng leh anăn gang mkhư̆ mnơ̆ng ƀơ̆ng amâo rơ̆ng doh êƀăt hlăm knăm mơak 2023”, Dhar bruă kriê dlăng gĭt gai Knơ̆ng bruă kriê dlăng anôk ba čhĭ dŭm čar, ƀuôn prŏng mđĭ ktang bruă bi hgŭm hŏng dŭm êpul bruă djŏ tuôm ksiêm dlăng, ktuê dlăng nanao ti dŭm anôk kƀĭn mnơ̆ng dhơ̆ng giăm knông lăn, dŭm anôk bruă mnia blei, sang mnia, anôk phŭn, hjiê dŭm mnơ̆ng bi êăt, dŭm anôk bruă blei mnơ̆ng ƀơ̆ng bi êăt… Mbĭt anăn, mtă msir mgaih bi jih hŏng mnơ̆ng dhơ̆ng amâo klă phŭn agha kñăm gang mkhư̆ mnơ̆ng ƀơ̆ng čhŏ, mnơ̆ng ƀơ̆ng amâo doh. Nguyễn Đức Lê, K’iăng Khua Knơ̆ng bruă knuă, Dhar bruă kriê dlăng anôk ba čhĭ brei thâo:

“Drei ba prăk mơ̆ng bruă êlâo kơ ksiêm dlăng jing êdei kơ ksiêm dlăng, si bĕ ngă čiăng kơ dŭm anôk bruă duh mkra, blei mơ̆ng ala tač êngao, mnia blei dŭm mta mnơ̆ng dhơ̆ng, pral ba dŭm mta mnơ̆ng dhơ̆ng pô pioh kơ klei čiăng phung ba chĭ. Khădah snăn, klei êdei ksiêm dlăng tơdah hmei ƀuh dŭm bruă ngă dŭm mta mnơ̆ng dhơ̆ng ngă soh snăn hlăk anăn jing ba čhĭ hŏng ênoh lu. Bruă hrui mă ăt msĕ mơh bruă msir mgaih srăng tuôm hŏng lu klei dleh dlan. Ƀiădah yuôm bhăn hĭn jing hlăk anăn, phung blei yua tơdah ba yua leh mnơ̆ng dhơ̆ng chŏ, amâodah mnơ̆ng dhơ̆ng amâo rơ̆ng doh êƀăt snăn hmăi leh kơ klei suaih pral, kyua nhmei thâo săng klei anăn, kyua anăn Dhar bruă kriê dlăng anôk ba čhĭ ba nanao bruă bi kdơ̆ng hŏng dŭm klei ngă soh klei êđăp ênang mnơ̆ng ƀơ̆ng anei jing mrô sa.

 Anôk bruă mlir dhar bruă Gưl dlông kơ klei doh êƀăt mnơ̆ng ƀơ̆ng lač klă: yan knăm mơak thŭn 2023 yuôm bhăn snăk kyua jing wưng kơrŭ wĭt êdei klei ruă tưp. Kyua anăn, dŭm Phŭn, dhar bruă, alŭ wăl, êpul bruă djŏ tuôm, Êpul ksiêm dlăng mlir dhar bruă brei ktuê dlăng, mđĭ ktang bruă ktuê dlăng, bi êniưh hră mơar hlăm bruă ksiêm dlăng mlir dhar bruă hŏng mnơ̆ng ƀơ̆ng ba čhĭ kơ ala tač êngao. Hlue anăn, lŏ dơ̆ng mâo klei bhiăn, hdră msir klă klơ̆ng, kñăm mđĭ, mtrŭt ba mnơ̆ng dhơ̆ng doh êƀăt, mnơ̆ng ƀơ̆ng doh hlăm dŭm hdră mkăp.  Boh nik brei mđing, mnơ̆ng ƀơ̆ng brei mâo klei ktrâo lač klă klơ̆ng, djŏ guôp kơ klei kriê dlăng boh êƀăt mnơ̆ng ƀơ̆ng mnia blei hlăm hla pŏk web ala ƀuôn. Bruă ksiêm dlăng klei hâo hưn mtô mblang kơ boh êƀăt mnơ̆ng ƀơ̆ng dưi mđĭ ktang, ngă nanao, lŏ dơ̆ng kñăm mđĭ klei thâo săng hlue ngă hdră bhiăn mơ̆ng pô mkra mjing, mnia blei mnơ̆ng dhơ̆ng, răng mgang phung blei yua mơak yan mnga, hiu čhưn knăm mơak./.