VOV4.Êđê - Ti anăp klei tưp lar mơ̆ng dŭm mta kman mlih mrâo BA.4, BA.5 leh anăn kman mlih mrâo BA.2.12.1, dŭm hruê êgao, mnuih ƀuôn sang ti alŭ wăl čar Dak Lak mâo leh klei hur har nao tlŏ mgang aruăt tal 3, tal 4 vaccine gang mkhư̆ klei ruă tưp Covid-19.

Anôk tlŏ vaccin mơ̆ng Anôk bruă ksiêm dlăng klei ruă čar Dak Lak dŭm hruê êgao mâo lu mnuih nao tlŏ vaccin Covid-19. Dôk guôn truh gưl pô tlŏ vaccin, amai Nguyễn Thị Hoa ti ƀuôn hgŭm Thống Nhất, ƀuôn prŏng Ƀuôn Ama Thuôt brei thâo, leh tlŏ ênŭm djăp 3 aruăt vaccin, mlan 2/2022 ñu djŏ Covid-19. Wưng hlai klei ruă sui leh ƀiădah ñu ka čiăng nao tlŏ ôh aruăt tal 4. Khădah, leh hmư̆ klei hâo hưn dŭm mta mrâo mơ̆ng Covid-19 mâo ti ala čar drei anăn ñu lŏ bi mklă nao tlŏ. “Amâo jhŏng tlŏ aruăt tal 4 ôh ƀiădah djŏ leh anăn huĭ, ară anei mâo mta mrâo snăn brei nao tlŏ, huĭ djŏ mta mrâo, huĭ kjham, ară anei nao tlŏ aruăt tal 4. Grăp čô mnuih brei nao tlŏ aruăt tal 4 čiăng suaih kơ pô leh anăn kơ gŏ sang pô”

Rŭng răng ti anăp mta mrâo ăt jing mta phŭn ung mô̆ amai Nguyễn Văn Hải ti ƀuôn hgŭm Tân Thành, ƀuôn prŏng Ƀuôn Ama Thuôt, pral nao tlŏ aruăt mñă wĭt vaccin Covid-19. “Ară anei ung mô̆ kâo bi mklă nao tlŏ aruăt tal 4 kyua hmư̆ klei ruă tưp lŏ bluh mâo snăn pô ăt rŭng răng leh anăn kâo mĭn mbŏ thiăm aruăt mñă wĭt čiăng mđĭ hnơ̆ng dưi gang mkhư̆ hŏng pô leh anăn hlăm êpul êya ăt jăk mơh”.

Aê mdrao Võ Minh Hùng, Khua Anôk bruă mdrao mgŭn ƀuôn prŏng Ƀuôn Ama Thuôt brei thâo: Ară anei, ênoh phung êbeh 18 thŭn ƀuôn prŏng pŏk ngă tlŏ aruăt tal 3 mâo hlăm brô êbeh 45%, aruăt tal 4 êbeh 6% leh anăn aruăt tal 3 kơ hđeh mơ̆ng 12-17 thŭn mâo êbeh 38%. Klei tŭ anei jing ka mâo ôh mkă hŏng klei kčah mơ̆ng Phŭn bruă mdrao mgŭn. Khăsnăn, dŭm hruê êgao, ênoh mnuih ƀuôn sang nao tlŏ vaccin aruăt 3,4 đĭ leh lu, boh nik hlăm gưl 24 leh anăn gưl 25 hŏng hlăm brô 20 êbâo aruăt vaccin, Anôk bruă mdrao mgŭn tlŏ leh jih vaccin, amâo mâo ôh klei êbeh vaccin jih wưng ba yua. “Klei mnuih ƀuôn sang thâo săng klă kơ̆ng mâo klei bi mlih lu hlăm hdră gang mkhư̆ klei ruă tưp. Ênoh mnuih ƀuôn sang hlăm wưng giăm anei ăt truh ti anôk bruă mdrao mgŭn, dŭm Anôk mdrao mgŭn čiăng dưi tlŏ aruăt 3,4 mâo lu mơh”.

Aê mdrao Hoàng Hải Phúc, K’iăng Khua Anôk bruă ksiêm dlăng klei ruă čar Dak Lak brei thâo, hlăm hruê kăm êgao, ênoh mnuih ƀuôn sang nao tlŏ vaccin Covid-19 đĭ lu. Anei jing klei bi knăl jăk đru Daklak dưi bi leh hnơ̆ng kčah truh jih mlan 8 kluôm čar mâo êbeh 90% ênoh mnuih tlŏ vaccin Covid-19 aruăt tal 3. “Truh mlan 8 hmei srăng pŏk ngă sa gưl tlŏ dơ̆ng leh anăn hmei mâo leh hră mơar mơĭt kơ dŭm anôk bruă mđĭ pral hnơ̆ng tlŏ. Čiăng dưi ngă bruă anei klă sĭt hjăn bruă mdrao mgŭn amâo dưi ngă ôh, brei mâo klei gĭt gai jăk mơ̆ng Bruă Đảng čar, bruă Đảng ƀuôn prŏng, bruă Đảng kdriêk, bruă Đảng wăl krah čiăng nao grăp boh sang, djăp êlan klông mtă kơ mnuih ƀuôn sang bi ƀuăn rơ̆ng, mtă kơ mnuih ƀuôn sang brei hlue ngă čiăng tlŏ vaccin. Tlŏ vaccin tinei amâo djŏ knŏng jing gang mkhư̆ klei ruă ôh ƀiădah tlŏ vaccin čiăng gang mkhư̆ klei ruă tưp hlăm êpul êya”./.