“Hlue ngă klei mtăp mđơr êkei mniê lehanăn mghaih msir djăp mta klei djŏ tuôm hŏng phung mniê lehanăn hŏng phung hđeh” dôk hlăm mta bruă mrô 8, Êpul hgŭm bruă mniê čar Tuyên Quang hlăk dôk ngă leh ti 570 boh alŭ hlăm 121 boh să krĭng mnuih djuê ƀiă hlăm čar. Čiăng mâo klei tŭ dưn hlue ngă bruă anei, dŭm êpul hgŭm bruă mniê čar Tuyên Quang mâo mkŏ mjing leh giăm 340 klei bi hmô hlăm bruă hâo hưn hŏng yang ƀuôn mâo leh klei bi mguôp wăt mniê lehanăn êkei. Mơ̆ng leh mkŏ mjing êpul hâo hưn, snăn bruă mtô mblang kơ klei mtăp mđơr êkei mniê, mkŏ mjing anôk hdĭp mda êđăp ênang kơ phung mniê lehanăn kơ phung hđeh mâo klei mđĭ hĭn leh.  Aduôn Hoàng Thị Lan Anh, K’iăng khua êpul hgŭm bruă mniê să Hùng Đức, kdriêk Hàm Yên lač, bruă mkŏ mjing êpul bi hâo hưn, jing knăm bi đru čung ba, bi mđĭ ai mnuih ƀuôn sang bi mlih klei mĭn, knhuah hdĭp, hdră mă bruă, lăm lui jih ya mta klei bhiăn hđăp amâo mâo lŏ djŏ, boh nik klei amâo mâo mtăp mđơr êkei mniê hlăm găp djuê lehanăn ƀuôn sang:

Bruă mkŏ mjing êpul hâo hưn anei srăng đru kơ klei mtô mblang hlăm ƀĭng hgŭm, lehanăn mnuih ƀuôn sang ênưih kơ klei thâo săng hĭn kơ klei mtăp mđơr êklei mniê bi đru hdơ̆ng găp hlăm klei hdĭp găp djuê, mjing sa găp djuê mâo klei jăk jĭn yâo mơak, trei mđao.

 Ti să Hùng Đức, kdriêk Hàm Yên, Êpul hgŭm bruă mniê čar ruah leh alŭ  Khuôn Then ngă anôk bi hmô kơ bruă hâo hưn mtô mblang hlăm yang ƀuôn. Êpul mâo truh 8 čô jing phung knơ̆ng lehanăn ba akŏ mâo klei thâo hâo hưn mtô mblang. Amai Vi Thị Xuân-sa čô mnuih hlăm êpul hâo hưn mơ̆ng alŭ lač:

Mơ̆ng dŭm klei hâo hưn, dưi đru leh kơ assei mlei kâo pô thâo săng hĭn kơ klei mtăp mđơr êkei mniê, bi kdơ̆ng hŏng klei ngă jhat hlăm găp djuê, đru bi răng mgang phung mniê, lehanăn phung hđeh, mơ̆ng anăn asei mlei kâo pô mtam ăt srăng lŏ kčĕ kơ jih jang mnuih hlăm ƀuôn thâo săng hĭn kơ klei mtăp mđơr êkei mniê , răng mgang phung hđeh êlăk lehanăn phung mniê mơ̆ng klei ngă jhat hlăm găp djuê lehanăn hlăm ƀuôn sang.

Êngao kơ klei bi hmô êpul hâo hưn hlăm yang ƀuôn, dŭm gưl êpul hgŭm mniê čar Tuyên Quang lŏ mkŏ mjing truh 30 bruă bi hmô kơ anôk kăp bi grăng dŭm klei amâo mâo thâo bi djŏ, đru mgang kơ mnuih mâo klei ngă jhat hlăm găp djuê. Mbĭt hŏng anăn, Êpul hgŭm bruă mniê čar Tuyên Quang hgŭm leh hŏng dŭm boh sang hră, mkŏ mjing êpul hgŭm “Khua păn akŏ kơ klei bi mlih”. Anei jing sa anôk lông ngă ba klei tŭ dưn kơ phung hđeh hlăm klei mtăp mđơr êkei mniê, đru mghaih msir jih jang klei adôk ka thâo săng hlăm phung hđeh, krĭng mnuih djuê ƀiă.

Adei Hoàng Thị Khánh Huyền, sang hră knŭk kna čiêm rông hđeh mnuih djuê ƀiă ATK kdriêk Sơn Dương lač: nao ti anôk bi hgŭm anei, tinăn mâo klei bi mguôp, hlăp mbul, lehanăn mâo klei mjuăt bi hriăm kơ ai tiê klei mĭn truh ti thŭn thâo săng kơ êkei mniê. Êngao anăn, lŏ dơ̆ng duah klei hriăm kơ bruă čŏng thâo răng mgang kơ asei mlei pô, hlăm klei kjăp kơ êdei anăp:

Mŭt hlăm êpul hgŭmdưi đru leh kâo thâo săng hĭn kơ klei dôk ung mô̆ mgi dih, kơ klei ngă jhat hlăm sang hră mơar, klei ngă jhat hlăm găp djuê, đru kâo lŏ thâo kah mbha hŏng mah jiăng hlăm sang hră, hŏng mnuih hlăm găp djuê ñĕ đuĕ kơ klei bi ngă jhat.

Êpul hgŭm “Khua păn akŏ kơ klei bi mlih” jing leh sa hlăm 4 mta klei bi hmô mơ̆ng bruă mrô 8 dôk ngă “Klei mtăp mđơr êkei mniê, lehanăn mghaih msir djăp mta klei pioh đru kơ phung mniê lehanăn hđeh êlăk”. Nai mtô Lý Hải Vân, ti sang hră knŭk kna čiêm rông hđeh mnuih djuê ƀiă ATK kdriêk Sơn Dương brei thâo:

Srăng mjuăt hriăm kơ klei thâo dôk dơ̆ng ƀơ̆ng huă bi jăk, srăng dưi đru lŏ bi hâo hưn mtô mblang kơ phung hđeh hlăm sang hră, lehanăn mă klei leh hriăm anăn ba yua kăp kčĕ đru hlăm găp djuê pô, lehanăn ƀuôn sang pô, snăn sĭt nik srăng mâo klei tŭ dưn jăk mđrăm mbĭt hŏng yang ƀuôn.

Klei mkŏ mjing êpul hgŭm mâo mprăp leh kơ phung hđeh hriăm hră mnuih djuê ƀiă mâo lu klei thâo săng hĭn, ba klei tŭ dưn kơ phung hđeh, hŏng klei blŭ pô, đru bi mlih klei mĭn, hdră dôk dơ̆ng ƀơ̆ng huă bi jăk, lehanăn lăm lui hĕ jih ya mta klei jing amâo mâo jăk, klei bhiăn hđăp amâo mâo lŏ djŏ ôh hlăm krĭng dlông. Ară anei, dŭm êpul bi hgŭm snăn mâo ngă leh jăk dŭm hdră êlan, hdră mghaih msir dŭm mta klei amâo mâo jăk hŏng phung hđeh, đru kơ phung nai mtô lehanăn amĭ ama hđeh ngă jăk bruă mjuăt bi hriăm phung hđeh, lehanăn gang mkhư̆ klei ngă jhat, klei tlĕ mă, klei tlĕ čhĭ hŏng phung hđeh, lehanăn kăm ghă hđeh bi dôk ung mô̆ mơ̆ng mda./.