Mơ̆ng knhal jih thŭn dih truh kơ ară anei, leh adiê wai băk truh, đuĕ nao kơ mmăt snăn hlăm êlan betong hlăm ƀuôn Nŭ, ƀuôn hgŭm Ia Nan, čar Gia Lai čŏng guh mngač yơh mơ̆ng pui bi êra hŏng pil yang hrue. Phung hđeh bi kdriă hlăp mơak, lehanăn mbĭt hŏng mnuih prŏng wĭt mơ̆ng hma mâo leh pui mngač hlăm êln hŏng klei êđăp ênang. Mlam mmăt êlan klông leh mâo pui, adei H’Oanh mbĭt hŏng găp ñu nao kơ sang dhar kreh mơak mñai:

 “Êlâo dih ka mâo pui ôh mơ̆ng pil yang hrue anei mâo knơ̆ng brtuă mkăp brei, snăn phung hđeh mniê msĕ hŏng hmei kbiă hiu ăt huĭ mơh. Ƀiădah mơ̆ng leh mâo pui anei hmei ƀuh hơĭt ai tiê kbiă hiu.”

Ktue knông lăn lu ƀuôn hgŭm nah yŭ čar Gia Lai ăt mâo mơh dŭm êpul êya mơ̆ng Binh đoàn 15 ngă leh hdră “Guh mngač ƀuôn sang”. Thŭn 2024, Binh đoàn mpprăp brei leh pui mơ̆ng pil yang hruê mâo truh 23 km, hŏng ênoh jih jang êbeh 1,5 êklai prăk. Truh thŭn 2025, wưng tal dua mơ̆ng hdră jing lŏ dŏng ngă hlăm lu ƀuôn dôk hlăm klei dleh dlan, hŏng boh kbưi êbeh 10km. Ti ƀuôn hgŭm Ia Mơr, khua mduôn Ksor H'Blâm mgei ai tiê lač:

 “Bi kâo, kâo mơak êdi yơh, êlan klông mâo pui mtrang mngač leh. Nao mă bruă, nao riêk ktăk ksu, amâodah ya anôk nao mmăt mlam êlan klông mngač leh, mơak snăk.”

 Đại tá Nguyễn Chí Kiên – Khua bruă Đảng, K’iăng khua knơ̆ng bruă 72, Binh đoàn 15 brei thâo, kă pui kmlă bi êran hŏng pil yang hrue amâo mâo djŏ knŏng đru kơ dŭm boh ƀuôn ti knông lăn mngač tač hĭn, đru kơ ƀuôn sang bi mkŏ mjing ƀuôn dhar kreh, lehanăn bi leh ênoh čuăn krĭng ƀuôn sang mrâo, mbĭt anăn đru bi răng mgang klei êđăp ênang, bi hrŏ klei soh jhat hlăm ƀuôn sang, lehanăn bi hrŏ mơh klei bi drăm êdeh êdâo hlăm êlan klông.

 “Mơ̆ng leh mâo bruă mtrang mngač hlăm ƀuôn sang ti dŭm anôk mâo êpul êya lĭng kahan mơ̆ng Binh đoàn 15 snăn mâo đru leh jăk hlăm bruă rwng mgang klei êđăp ênang hlăm ƀuôn sang, rơ̆ng kơ klei hdĭp dhar kreh hlam êlan klông.”

Mơ̆ng dŭm boh ăngpul pui mngač siam, hdră mtrang mngač hlăm ƀuôn sang, amâo mâo djŏ knŏng mtrang bi mngač hlăm êlan klông ƀuôn sang, ƀiădah lŏ bi guh mngač ai tiê, klei čăng hmăng kơ mgi mdih trei mđao, mjing pô bi klă kơ klei thâo bi khăp plah wah lĭng kahan hŏng mnuih ƀuôn sang ti knông lăn čar Gia Lai.