Gŭ jơ̆ng čư̆ Lang Biang kdrăp k’ah, klei kñĭ hưr mơ̆ng mnga phĭ hlăm dŭm ping čư̆. Plua krah dŭm boh sang mdhă ti ƀuôn B’Nơr B, ƀuôn hgŭm Lang Biang- Đà Lạt, lŏ bơ̆k bâo kơ Cil Kwuyên jih jang mnuih mâo sơăi klei mpŭ kơ ñu. Nguyễn Thị Cẩm Giang, K’iăng khua bruă Đảng ƀuôn hgŭm Lang Biang- Đà Lạt, brei thâo:

 “Awa Cil Kwuyên jing mnuih mâo k’hưm êdi hlăm mnuih ƀuoñ sang. Awa jing mnuih hlue ngă jăk knhuah mngač Hồ Chí Minh. Awa jih ai tiê mtă mtăn kơ găp djuê, lehanăn kơ mnuih ƀuôn sang hlăm ƀuôn hlue ngă jăk hdră êlan mơ̆ng Đảng, hdră bhiăn knŭk kna, hgŭm jăk hlăm bruă bi ktưn ti ƀuôn sang, mkŏ mjing ƀuôn sang dhar kreh. Lehanăn awa jih ai tiê hlăm klei hâo hưn kơ phung mda asei, bi kriê pioh, mđĭ bi lar dhar kreh djuê ana pô”.

Hlăm ai tiê mnuih Lạch, sa êpul mơ̆ng djuê ana K’ho hdĭp ti gŭ jơ̆ng čư̆ Lang Biang, ară anei dôk hlăm ƀuôn hgŭm Lang Biang- Đà Lạt, čar Lâm Đồng hlam klei bi dôk ung mô̆ mơ̆ng mda, lehanăn klei čoh ngăn pnŭ prŏng jing leh klei ktrŏ kơ găp djuê. Ƀuh klei amâo mâo djŏ anăn, Awa Cil Kwuyên kčĕ brei kơ Khua pô mtô Sang Aê Diê hlak mblang brei kơ phung đăo, snăn klei bi dôk ung mô̆ mơ̆ng mda amâo jăk lŏ mâo ôh mơ̆ng lu thŭn hŏng anei leh. Bi klei čoh ngăn pnŭ ktrŏ, bi mâo dua drei kbao. Anei jing klei bhiăn amâo lŏ djŏ ôh êdi, tơdah dôk tui tiŏ nanao klei anăn, lu gŏ sang lĕ hlăm klei dleh dlan đuôm nư klei. Awa Cil Kwuyên yơh jing mnuih tal êlâo lăn lui klei bhiăn amâo lŏ djŏ anei hlăm mnuih Lạch:

“Dlăng hlăm jih klei hdĭp anak mnuih ka dưi tloh mơh 4 drei kbao. Kâo đru kčĕ hŏng phung mâo klei thâo lu, mnuih mâo klei thâo săng hlăm ƀuôn sang lăm lui yơh klei bhiăn amâo lŏ djŏ anăn. Leh kơ anăn mdưm hlăm êpul gơ̆ng bruă ƀuôn hgŭm bi trông truh kơ klei mjing hdră mtrŭn ba yua. Tơdah dưi mdưm leh hlăm hdră mtrŭn, mâo klei hâo hưn mđrĭng hŏng klei bhiăn knŭk kna snăn bruă anei mgô brei lăm lui yơh. Ară anei amâo lŏ mâo ôh klei msĕ snăn. Kâo ƀuh anei jing sa klei bi mlih prŏng hlăm klei bhiăn djuê ana pô.”

Yan mnga anei, Awa Cil Kwuyên čhuang hlăm thŭn 69. Ƀiădah ñu ăt ruah sa klei hdĭp hnŭk ênang, jih ai tiê hgŭm hlăm bruă yang ƀuôn, đru bi mgrăng dŭm boh klei mâo hlăm mnuih ƀuôn sang. Msĕ si klei bi mmiă lăn ala, klei amâo mâo thâo bi djŏ ung mô̆, hŏng dŭm klei thâo săng hlăm klei bhiăn djuê ana pô, ñu dưi ruh mgaih jih ya mta klei amâo mâo thâo bi djŏ hlăm ƀuôn sang.

Klei năng mđing êdi tinei mơ̆ng awa, jing sa čô mnuih thâo bi mgrăng hlăm ƀuôn sang. Awa Cil Kwuyên tuôm jing sa čô mnuih thâo rông kbao êdi hlăm krĭng sang ñu mâo truh 80 drei. Nuu ăt jing mnuih K’ho ti Lang Biang tal êlâo hriăm êmuh, pla mjing 130 ana saboce, mâo ba wĭt boh tŭ dưn jăk snăk. Mơ̆ng êbeh 40 thŭn êlâo, mbĭt hŏng keli thâo duh ƀơ̆ng, lehanăn tuôm jing leh khua msir kđi hlăm ƀuôn hgŭm, lehanăn mâo nanao ai tiê hŏng yang ƀuôn, Cil Kwuyên đuĕ hiu leh hlăm djăp ƀuôn êlan, ba nao lu klei bhiăn mơ̆ng knŭk kna truh hŏng ƀuôn sang.

Ară anei, khădah klei hdĭp thâo mâo leh, ƀiădah jơ̆ng awa Kwuyên ăt kăn mdei kngan ñu ăt mă bruă. Ñu lač;

Kâo čang hmăng kơ găp djuê, ƀuôn sang, lehanăn jih jang mnuih brei mâo klei thâo bi mguôp, mâo klei thâo dôk dơ̆ng ƀơ̆ng huă jăk, amâo mâo ngă soh hŏng klei bhiăn knŭk kna, lăm lui jih klei bhiăn hđăp amâo lŏ djŏ. Thŭn mrâo truh, hơêč hmưi kơ jih jang mnuih mâo nanao klei myun mdan, klei êđăp ênang, duh ƀơ̆ng mâo klei mbhă mbhai, hrăm mbĭt mđĭ kyar klei hdĭp, mđĭ kyar ƀuôn sang.”

Hŏng bruă sang čư̆ êa alŭ wăl, awa Cil Kwuyên jing leh kdrông kjăp mkŏ klei mĭn Đảng hŏng ai tiê mnuih ƀuôn sang. Hlăm yang ƀuôn, awa Kwuyên jing gru bi hmô mngač hlăm ƀuôn sang.  Jusep, sa čô mnuih ƀuôn sang mâo klei blŭ:

 “Awa Kwuyên jing sa čô aê, jing sa čô ama thâo bi hmô êdi hlăm găp djuê, ñu mâo leh lu klei đru mguôp hlăm klei duh mkra klei hdĭp mda mnuih ƀuôn sang kơ anei. Dơ̆ng mơ̆ng klei đru kčĕ, klei ñu mta mtăn amâo mâo brei bi dôk ung mô̆ mơ̆ng mda, lehanăn mtă kơ mnuih ƀuôn sang amâo mâo čoh ngăn pnŭ prŏng ôh hlăm klei bi kuôl ung mô̆. Ñu mơh jing mnuih ba êlan êlâo hlue ngă hdră êlan mơ̆ng Đảng, Knŭk kna lehanăn mâo mnuih ƀuôn sang mpŭ snăk lehanăn đăo knang.”

Hlăm wưng giăm anei awa Cil Kwuyên mâo lu klei mơak. Wưng mlan 9 leh êgao, ñu mbĭt hŏng êpul čar Lâm Đồng nao hlăm knăm bi hdơr 80 thŭn hrue mkŏ mjing lăn čar 2/9 ti Hà Nội. Ñu mâo klei myun dôk hlăm êpul nao ti anôk bi kƀĭn prŏng bruă bi ktưn thâo khăp kơ lăn čar kluôm ala gưl tal 11 mrâo mkŏ mjing hlăm knhal jih hrue kăm êlâo.

Klei thaoa bi hmô jăk mơ̆ng awa Kwuyên hur har hlăm djăp klei bi kƀimn ƀuôn sang, mtă mtăn kơp anak čô ñĕ đuĕ mơ̆ng klei duah mplư hlăm hla pŏk yang ƀuôn, ñĕ đuĕ mơ̆ng klei duah čan lĭng mnga ktrŏ, anăn yơh jing klei jăk siam êdi mơ̆ng awa sa čô mnuih hur har êdi ti jơ̆ng čư̆ Lang Biang. Jih jang ai tiê klei đru mguôp mơ̆ng awa mâo đru leh sa kdrêč kơ ƀuôn B’Nơr B, ƀuôn hgŭm Lang Biang- Đà Lạt mâo nanao klei mơak mñai./.