Jing sa hlăm dŭm êpul hgŭm bruă tal êlâo hlăm bruă hiu čhưn ênguê, bruă lŏ hma, ala ƀuôn. Êpul hgŭm bruă lŏ hma leh anăn hiu čhưn ênguê Phú Nông - Ƀuôn Đon, kdriêk Ƀuôn Đon, čar Dak Lak bi mguôp phung hgŭm mkŏ mjing êpul êya mđĭ kyar bruă hiu čhưn ênguê ti ƀuôn sang pô mtam. Hŏng klei găl mâo, wăl dôk dliê kmrơ̆ng siam, dliê hrông msĕ si: dliê knŭk kna mkuôm Yŏk Đôn, wăl siam krông Serepôk, hnoh krông, hnoh êa, čư̆ dliê, dhar kreh, mnơ̆ng ƀơ̆ng huă lu mta…

Êpul hgŭm bruă dưn yua jih klei găl anei čiăng mđĭ kyar bruă hiu čhưn ênguê. Truh kơ ară anei, lu klei bi hmô mơ̆ng êpul hgŭm bruă anei dưi mâo phung tuê thâo. Ƀiădah, čiăng mkŏ mjing dŭm mta mnơ̆ng hiu čhưn ênguê hluê hdră OCOP, Êpul hgŭm bruă lŏ hma leh anăn hiu čhưn ênguê Phú Nông - Ƀuôn Đon adôk tuôm hŏng lu klei dleh dlan, hlăm anăn mâo klei čuăl mkă. Trần Văn Toàn, khua kiă kriê êpul hgŭm bruă brei thâo:

 “ Dleh dlan hĭn ară anei jing kpăk hlăm klei duh bi liê leh anăn mđĭ kyar, kyua êmưt klei čuăl mkă dŭm krĭng mđĭ kyar bruă hiu čhưn ênguê. Sitôhmô sa kdrêč hlăm lŏ hma jing lăn hiu čhưn ênguê amâodah jing mtô čiăng yua lăn lŏ hma kơ mta kñăm wưng sui kyua anăn êmưt hlăm klei duh bi liê đĭ kyar klei bi hmô hiu čhưn ênguê krĭng ƀuôn sang”.

Hluê si klei bi klă mrô 148/QĐ-TTg thŭn 2023 mơ̆ng Khua knŭk kna, hnơ̆ng čuăn bi klă êpul mnơ̆ng dhơ̆ng OCOP hiu čhưn ênguê dưi bi klă nik, ƀiădah amâo mâo ênưih mkŏ mjing. Hluê si k’iăng Nai prŏng nai prĭng Trần Văn Ơn, pô đru kčĕ hdră OCOP ala čar, klei dleh dlan hĭn kyua mnơ̆ng dhơ̆ng kƀah klei bi mguôp. Kyuanăn, khădah Dak Lak mâo lu klei găl mđĭ kyar ƀiădah dleh tŭ jing kyua kƀah klei bi mguôp hrăm mbĭt leh anăn tur knơ̆ng plah wah dŭm dhar bruă djŏ tuôm.

Hdră găp să sa mnơ̆ng dhơ̆ng mơ̆ng dhar bruă lŏ hma leh anăn mđĭ kyar krĭng ƀuôn sang đua klam, ƀiădah mnơ̆ng dhơ̆ng anăn amâo djŏ knơ̆ng mơ̆ng dhar bruă lŏ hma leh anăn mđĭ kyar krĭng ƀuôn sang ƀiădah lŏ mâo wăt mnơ̆ng hiu čhưn ênguê. Kyuanăn nao hjăn păn jing dleh dlan êdi. Grăp thŭn dhar bruă lŏ hma ăt ngă lu mta. Tơdah bi mguôp jăk hdơ̆ng pô, mnơ̆ng dhơ̆ng hiu čhưn ênguê srăng đĭ kyar. Hlăm boh sĭt mâo leh lu mta mnơ̆ng dhơ̆ng hiu čhưn ênguê tŭ dưn ti čar Dak Lak anei, ƀiădah kyua drei ka ƀuh klă kyuanăn ka mâo klei bi mguôp. Tơdah mâo klei bi mguôp srăng đĭ kyar mtam.

Nguyễn Hoài Dương, khua kiă kriê knơ̆ng bruă lŏ hma leh anăn mđĭ kyar čar Dak Lak brei thâo, hlăm čar mâo hlăm brô 17 ƀuôn dưi ba yua dŭm klei găl mâo mđĭ kyar bruă hiu čhưn ênguê OCOP. Ƀiădah, čar ka dưi mkŏ mjing mnơ̆ng dhơ̆ng OCOP hiu čhưn ênguê, kyua mta bruă anei ăt adôk jing čŏng mâo, hliê leh anăn điêt, lu jing knŏng yua mă mnơ̆ng mâo leh, ka dưi mâo klei jăk hĭn kơ dhar kreh leh anăn ênoh mnơ̆ng dhơ̆ng. Dak Lak dôk gĭr dưn yua dŭm hdră êlan čiăng đru mđĭ kyar mnơ̆ng dhơ̆ng OCOP hiu čhưn ênguê năng hŏng klei găl mâo mơ̆ng alŭ wăl.

Dŭm anôk bruă djŏ tuôm čiăng mâo lu hdră êlan mtô čiăng kơ dŭm knơ̆ng bruă, êpul hgŭm bruă leh anăn mnuih ƀuôn sang ti dŭm alŭ wăl, boh nik jing dŭm krĭng mâo klei găl mđĭ kyar bruă hiu čhưn ênguê dưi ƀuh klă dŭm klei găl mkŏ mjing mnơ̆ng dhơ̆ng hiu čhưn ênguê jing mnơ̆ng dhơ̆ng OCOP čiăng bi lar tŭ dưn hĭn dŭm klei găl anei”.

Bruă Dak Lak mđĭ kyar bruă hiu čhưn ênguê nao mbĭt hŏng hdră OCOP srăng đru mđĭ hnơ̆ng mnơ̆ng dhơ̆ng hiu čhưn ênguê, ba wĭt boh tŭ dưn kơ bruă duh mkra, mđĭ hnư hrui wĭt kơ mnuih ƀuôn sang. Mơ̆ng anăn, đru kơ êpul êya thâo săng hĭn hlăm bruă kriê pioh, bi lar knhuah gru dhar kreh pô./.