Ti să Ia Broăi, kdriêk Ia Pa, amai Kpă H'Bluyn, 34 thŭn, ƀuôn Ia Rniu jing sa hlăm phung hriăm jing mnuih djuê ƀiă hlăm adŭ pla djam doh thŭ 2024. Ñu brei thâo, hlăm giăm 2 mlan, ñu thâo ngă leh hdră mkra mjing mơ̆ng klei lăn, pruê hbâo, kriê dlăng klei mnơ̆ng ngă truh kơ ba čhi mnơ̆ng dhơ̆ng kơ dŭm êpul djam tam mă hla, boh kroh, hbei.

“Pô ăt hgŭm hlăm dŭ pla djam tam, mơ̆ng hdră nai mtô kơ amai adei hriăm čiăng pla kơ gŏ sang pô ƀơ̆ng. Leh anăn êdei anăp mâo lăn snăn bi lar pioh mkra mjing mnia blei leh anăn mâo thiăm prăk hrui wĭt čiăng gŏ sang mâo bruă duh mkra hơĭt kjăp.”

Ti anôk pla mjing pô, ayŏng Ksor Dêl 37 thŭn, să Kim Tân, kdriêk Ia Pa dôk pral kngan mkra êdeh kai kơ mnuih ƀuôn sang hlăm ƀuôn čiăng hmao nao buč hbei ƀlang hlăm yan hrui êmiêt. Ksor Dêl brei thâo, êlâo dih, wăt tơdah gŏ sang mâo êdeh kai leh anăn masin pioh kơ bruă mkra mjing lŏ hma ƀiădah grăp blư̆ êdeh êdâo mâo klei jhat, ñu luč lu hruê mmông leh anăn prăk bi liê ba ti dŭm să riêng gah mkra. Ƀuh klei čiăng anei, thŭn 2021, tơdah kdriêk pŏk adŭ mtô bruă mkra êdeh kai hnơ̆ng điêt, ñu pral čih anăn nao hriăm. Kyua klei thâo leh anăn hdră dưi hriăm leh, ară anei ayŏng Dêl pral pŏk leh anôk mkra ti ƀuôn mtam, đru kơ mnuih ƀuôn sang hŏng hnơ̆ng prăk hrui wĭt hơĭt kjăp, boh nik lu hĭn hlăm yan hrui êmiêt.

“Tơdah mŭt hlăm yan hrui êmiêt, mnuih ƀuôn sang hrui êmiêt hbei ƀlang lu snăn êdeh êran ti krĭng anei ăt lu mơh amâodah jhat rai lu, hlăk anăn mnuih ƀuôn sang ba kơ kâo mkra. Bi aguah tlam amâo djŏ hlăm yan hrui êmiêt snăn ƀiă kdrăp masin mkra. Kâo pô ăt kyua khăp mơh anăn tui hriăm bruă mkra anei srăng ngă sui thŭn.”

Wưng 2022 -2024, kdriêk Ia Pa mkŏ mjing leh 15 adŭ mtô bi hriăm bruă kơ dŭm hdră kñăm ala čar hŏng giăm 350 čô jing mnuih djuê ƀiă nao hgŭm, hŏng ênoh bi liê êbeh 1 êklai prăk, ênoh mnuih mă bruă dưi mtô bi hriăm thŭn êdei lu hĭn kơ thŭn êlâo.

 Hlue si Lê Hữu Hưng, Khua Knơ̆ng bruă Sang čư̆ êa să Kim Tân, kdriêk Ia Pa, čar Gia Lai, 9 mlan thŭn 2024, să mkŏ mjimg leh 3 adŭ mtô hŏng 84 čô, hlăm anăn mâo 2 adŭ kơ bruă lŏ hma leh anăn 1 adŭ êngao kơ bruă lŏ hma. Dŭm adŭ mâo mnuih ƀuôn sang mđing snăk kyua klei sĭt leh anăn yua hlăm klei hdĭp grăp hruê.

“Mnuih ƀuôn sang mđing hŏng bruă mtô bi hriăm bruă, leh anăn anăn jing adŭ mtô bhiâo ƀiădah mâo klei hmăi kơ klei hdĭp grăp hruê mnuih ƀuôn sang. Sitôhmô msĕ si adŭ bruă lŏ hma kơ klei pla mjing snăn leh mjưh ruê̆ snăn mnuih ƀuôn sang hlŏng dưi yua. Adŭ êngao bruă lŏ hma mkra mjing masin, kdrăp mnơ̆ng lŏ hma snăn mnuih ƀuôn sang ngă duh kơ gŏ sang, đa đa phung êdam êra mâo klei găl snăn pŏk anôk mkra mjing čiăng ngă bruă duh kơ mnuih ƀuôn sang hlăm ƀuôn sang.”

Hlue ngă Hdră kñăm ala čar kơ klei mđĭ kyar  bruă duh mkra- ala ƀuôn krĭng mnuih djuê ƀiă leh anăn čư̆ čhiăng, mơ̆ng thŭn 2021 truh ară anei, čar Gia Lai pŏk leh giăm 200 adŭ mtô bi hriăm bruă kơ mnuih mă bruă krĭng mnuih djuê ƀiă. Hjăn thŭn 2024, ênoh mnuih hriăm jing mnuih djuê ƀiă dưi mtô bi hriăm bruă truh giăm 5000 čô. Lu phung hriăm leh bi leh gưl hriăm yua leh tŭ dưn klei thâo hlăm boh sĭt mkra mjing, mkŏ mjing gru hmô bruă duh mkra ba prăk hrui wĭt lu. Dương Mah Tiệp, Kơiăng Khua Knơ̆ng bruă sang čư̆ êa čar Gia Lai brei thâo:

“Hlue ngă hdră kñăm ala čar kơ klei mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng, grăp thŭn Gia Lai mkŏ mjing mâo 1.500 bruă mă. Boh nik dŭm alŭ krĭng taih kbưi snăn hmei mtô hlue si alŭ wăl. Mơ̆ng klei čiăng kơ mnuih mă bruă dŭm mta bruă mơ̆ng mnuih ƀuôn sang snăn mơ̆ng klei mtô bruă kơ mnuih ƀuôn sang srăng mjing pră hrui wĭt. Hmei dlăng mơ̆ng klei găl snăn čiăng mkŏ mjing adŭ mtô bi hriăm leh anăn grăp thŭn ăt mkŏ mjing dŭm adŭ čiăng djŏ guôp hŏng boh sĭt.”

Dưi ƀuh, bruă mđĭ hnơ̆ng jăk mnuih mă bruă krĭng ƀuôn sang mơ̆ng klei mtô bi hriăm bruă đru mđĭ bruă mkra mjing, mđĭ hnơ̆ng thâo mnuih mă bruă, bi mlih bruă mă leh anăn ngă tŭ dưn hdră kñăm bi hrŏ ƀun kjăp, mkŏ mkra krĭng ƀuôn sang mrâo mơ̆ng čar Gia Lai.