Kbưi hŏng sang dôk gŏ sang, war êning rông ŭn jŭ ung mô̆ ayŏng A Tuấn leh anăn Y Chec, djuê ana Jeh Triêng, alŭ Dục Nhầy 3, să knông lăn Đăk Dục, kdriêk Ngọc Hồi dưi rŭ mdơ̆ng jăk. Hŏng wăl war rông mbha êlan nao ti krah găl kơ bruă kriê dlăng dŭm pluh drei ŭn mă kđeh leh anăn ŭn ana mđai, gŏ sang lŏ dhiang klei ñuăl mjing sa wăl ti tač prŏng êbeh 100m2 kơ ŭn êrô êbat. Ayŏng A Tuấn brei thâo, mmơ̆ng klei đru, ktrâo lač mơ̆ng phung knuă druh Êpul hgŭm phung mniê sa Đăk Dục leh anăn knuă druh Kđông kahan răng mgang knông lăn  Dục Nông, gŏ sang mđĭ kyar leh bruă rông mnơ̆ng mbĭt anăn mjưh mdei bruă phưi êpul ŭn:

“Phung mniê đru 6 êklăk prăk, ung mô̆ blei sa hlâo ŭn jŭ. Ară anei mđai 6 gưl hlŏng rông jih 6 gưl ară anei mâo snei. Ung mô̆ bi trông mkra war tinei. Pô đru ba kơ gŏ sang hơĭt klei hdĭp mda pioh yua hlăm klei hdĭp.”

 Hlue ngă Klei mtrŭt mjhar “Bi mlih klei mĭn, hdră ngă mnuih djuê ƀiă, đru kơ mnuih ƀuôn sang gĭr ktưn tlaih ƀun kjăp”, 3 thŭn êgao, kdriêk Kon Plông kƀĭn mkŏ mjing gru hmô bi hrŏ ƀun mguôp hŏng răng mgang dhar kreh čiăng mđĭ kyar hiu čhưn ênguê. Mbĭt anăn mđĭ hĭn bruă hâo hưn, mtrŭt mjhar mnuih ƀuôn sang Sêdang, Hrê mkra mđĭ êbeh 155 ha đang pla mjing. Truh jih mlan 9 mrâo êgao, dŭm êtuh gŏ êsei mnuih djuê ƀiă hlăm kdriêk mkra mlih êbeh 50 ha đang pla mjing ba pla ana boh kroh, djam tam, mnga krĭng êăt. Châu Văn Lâm, Kơiăng Khua dlăng bruă Đảng wăl krah Măng Đen, kdriêk Kon Plông brei thâo, čiăng ƀi mlih klei mĭn, hdră ngă mnuih ƀuôn sang mâo bruă klam yuôm bhăn mơ̆ng phung đảng viên hlăm êpul bruă đảng ti ƀuôn sang:

“Êpul bruă dŭm alŭ hâo hưn, mtrŭt mjhar mnuih ƀuôn sang mkra mlih đang pla mjing boh kroh, djam tam, hbei krĭng êăt čiăng bi mlih klei hdĭp grăp hruê ăt msĕ mơh mđĭ prăk hrui wĭt mnuih ƀuôn sang. Êpul bruă Đảng mbha kơ grăp čô đảng viên kriê dlăng gŏ êsei, êpul gŏ êsei. Hmei mă đảng viên jing phŭn, đảng viên klam bruă kriê dlăng êpul gŏ êsei ngă êlâo, leh anăn gŏ êsei, êpul gŏ êsei hlue ngă”.

Kdriêk Tu Mơ Rông, čar Kon Tum mâo êbeh 95% djuê ana Sêdang. Čiăng bi mlih klei mĭn, hdră ngă mnuih ƀuôn sang hlăm bruă mkra mjing, bruă sang čư̆ êa leh anăn dŭm êpul hgŭm mơ̆ng kdriêk hlue ngă klei blŭ “giăm mnuih ƀuôn sang, giăm gŏ êsei” leh anăn “ktrâo atăt ngă bruă”. Ka Ba Thành, Khua dlăng bruă Đảng kdriêk, brei thâo: klei tŭ jing prŏng hĭn jing bi mlih klei mĭn knŏng čiăng djăp mnơ̆ng ƀơ̆ng huă, amâo čan ôh prăk knŭk kna, boh nik hŏng gŏ êsei ƀun.

“Mnuih ƀuôn sang jhŏng mđĭ kyar mkra mjing. Prăk brei čan mơ̆ng thŭn 2021 truh thŭn 2023 êbeh 280 êklai prăk. Kah knar sa thŭn mâo hlăm brô 80 êklai prăk hlăm ênoh brei čan jing gŏ êsei ƀun, gŏ êsei giăm ƀun leh anăn gŏ sang knŭk kna dlăng ba. Mơ̆ng anăn ƀuh bi mlih leh klei mĭn, hdră ngă mnuih ƀuôn sang mơ̆ng klei dôk čang guôn, jhŏng čan prăk čiăng pŏk mlar mkra mjing hlăm anăn mâo pla sâm, pla ana êa drao, rông mnơ̆ng”.

Leh 3 thŭn pŏk ngă Klei mtrŭt mjhar “Bi mlih klei mĭn, hdră ngă mnuih djuê ƀiă, đru kơ mnuih djuê ƀiă gĭr ktưn tlaih ƀun kjăp”, dŭm gưl, dhar bruă čar Kon Tum mkŏ mjing, mđĭ kyar 866 gru hmô đru ngă bruă duh mkra, bi mlih đang pla mjing jak iêô giăm 10.600 gưl gŏ êsei đru mjeh, prăk bi liê, hdră mnêč kơ êbeh 5.500 gŏ êsei mnuih djuê ƀiă gĭr ktưn tlaih ƀun.

Mbĭt anăn, ênoh gŏ êsei ƀun ƀrư̆ lui klei bhiăn kthŭl mluk, thâo yua hdră mnêč hlăm bruă mkra mjing, ênoh gŏ êsei hgŭm hlăm êpul hgŭm bruă, êpul bi hgŭm mâo lu leh anăn êbeh hnơ̆ng kčah… Dương Văn Trang, Khua bruă Đảng čar, Khua Êpul gơ̆ng bruă ƀuôn sang čar Kon Tum, brei thâo, sa hlăm dŭm hdră kñăm yuôm bhăn klei mtrŭt mjhar dôk mđing jing bi mlih klei mĭn, hdră ngă mơ̆ng êbeh 9.700 gŏ êsei mnuih djuê ƀiă adôk čiăng gĭr ktưn tlaih ƀun:

“Boh phŭn bi mlih klei mĭn hdră ngă lu snăk ƀiădah hlăm anăn kƀĭn kơ bruă mkra mjing. Mkra mjing jăk prăk hrui wĭt ăt mâo, prăk hrui wĭt lu srăng tlaih ƀun. Să bi lar, kdriêk bi lar, čar bi lar gru hmô leh anăn knhal tuč dưi mâo klei tŭ dưn mơ̆ng klei mtrŭt mjhar jing bi mlih leh klei mĭn leh anăn hdră ngă mnuih djuê ƀiă čiăng kơ mnuih ƀuôn sang pô gĭr ktưn tlaih ƀun hơĭt kjăp”.

Hŏng hdră êlan mđing bi liê, đru mơ̆ng Đảng, Knŭk kna, Klei mtrŭt mjhar “Bi mlih klei mĭn, hdră ngă mnuih djuê ƀiă, đru kơ mnuih djuê ƀiă gĭr ktưn tlaih ƀun kjăp” kyua čar Kon Tum pŏk ngă dôk đru bi mlih jăk hlăm bruă mkra mjing leh anăn klei hdĭp mnuih djuê ƀiă ti čar. Čiăng kơ klei mtrŭt mjhar êlam hĭn, tŭ dưn hĭn čar Kon Tum mguôp klei mtrŭt mjhar hŏng bruă hlue ngă hdră êlan, hdră mtrŭn, asăp mtrŭn mơ̆ng Bruă Đảng čar, Knơ̆ng bruă sang čư̆ êa čar boh nik dŭm boh phŭn djŏ tuôm kơ bruă bi hrŏ ƀun leh anăn Hdră kñăm ala čar mkŏ mkra krĭng ƀuôn sang mrâo hlăm krĭng mnuih djuê ƀiă./.