Hŏng ênhă lăn hrông 35.700 hec-ta, hlăm anăn mâo êbeh 90% ênhă lăn pla mjing, kdriêk Krông Ƀŭk, čar Daklak mâo klei găl kơ bruă pla mjing ana sui thŭn.  Nguyễn Hải Đông, Khua bruă Đảng kdriêk Krông Ƀŭk brei thâo, kdriêk hlăk mkŏ mjing hdră djă yua lăn truh kơ thŭn 2030, kñăm rơ̆ng bi mbha anôk hlăm klei pla mjing djŏ guôp pioh mđĭ kyar klei duh mkra ala ƀuôn.

   “Kdriêk hlăk mơưn phung truăn kơ bruă ngă dŭm knhuang mă bruă bi djŏ hŏng klei čar, lehanăn gưl dlông kčah jao. Leh mâo ngă bruă anei, snăn mkŏ mjing bruă iêo jak klei duh bi liê, rŭ mkra bruă nah gŭ, čhĭ lăn, mkăp lăn kơ mnuih ƀuôn sang srăng hơĭt hĭn. Tơdah jih jang bruă anei mâo ngă jăk, snăn ênoh čuăn kơ klei mđĭ kyar bruă duh mkra ala ƀuôn srăng djăp êbeh 8% srăng dưi bi sĭt”.

Mâo ênhă lăn jih jang truh êbeh 176.000 hec-ta, Ea Sup jing kdriêk mâo lăn prŏng hĭn hlăm čar Daklak. Siămdah, anei jing sa krĭng ƀun hĭn hlăm čar, kyuadah jih ênhă lan tinei amâo mâo dưn yua jăk ôh, dŭm êbâo ha lăn lĕ hlăm kngan mnuih ƀuôn sang bi ksĭng mmiă. Čiăng mghaih msir klei anei, kdriêk hlăk mâo dŭm hdră lŏ sua wĭt lăn leh ksĭng mmiă, lŏ pioh kơ bruă iêo jak phung duh mkra hriê duh bi liê. Kdriêk Ea Sup čang hmăng amâo mâo djŏ knŏng mđĭ kyar bruă lŏ hma hŏng kdrăp mrâo mrang, lŏ mđĭ ênoh mâo ba wĭt kơ mnuih ƀuôn sang. Đỗ Xuân Dũng, k’iăng khua bruă Đảng kdriêk Ea Súp lač:

 “Anei jing lăn guôp hŏng bruă lŏ hma lehanăn dliê kmrơ̆ng hlăm kdriêk dôk hrông lehanăn prŏng snăk. Kyuanăn kdriêk Ea Sup čiăng snăk mâo iêo jak phung duh bi liê, hriê mđĭ kyar bruă lŏ hma pla mjing, lehanăn bruă dliê kyâo, ngă bruă bi djŏ hŏng klei čuăl mkă tui si klei bhiăn knŭk kna”.

Ƀuh klei yuôm bhăn mơ̆ng lăn ala, hlăm klei mđĭ kyar bruă duh mkra ala ƀuôn hlăm čar, hlăm hrue mă bruă tal êlâo hŏng knơ̆ng bruă lŏ hma čar Daklak, leh mkŏ wĭt bruă knuă hŏng klei khuăt (hlăm klei bi mŭt leh knơ̆ng bruă lŏ hma lehanăn mđĭ kyar krĭng ƀuôn sang hŏng knơ̆ng bruă Ngăn dŏ wăl hdĭp mda), Nguyễn Thiên Văn, K'iăng khua knơ̆ng bruă sang čư̆ êa čar brei thâo: Čar hlăk mâo lu hdră kñăm dưn yua tŭ jing klei dưi mă bruă. Hlăm anăn hrui wĭt jih lăn lĕ hlăm klei bi ksĭng mmiă, mbĭt anăn lŏ ksiêm yap, bi mlih klei čuăl mkă bi djŏ hŏng grăp krĭng, lehanăn tă êlan mđĭ kyar mbĭt hlăm kluôm čar. Nguyễn Thiên Văn mtă kơ knơ̆ng bruă lŏ hma ngă mtam kơ bruă anei:

 “Ngă bi pral bruă lŏ sua wĭt jih lăn ala lĕ hlăm klei bi ksĭng mmiă, kyuuadah drei čuăl mkă leh hdră sua wĭt, leh ênŭm bruă hrui wĭt snăn hưn mdah hŏng čar, akâo kơ čar mâo hdră kăp kčĕ klei mă bruă, snăn ară anei dŭm bruă adôk ngă hĕ mtam čiăng bi leh, lehanăn hlue ngă djŏ hŏng hdră mtrŭn mơ̆ng bruă Đảng čar, lehanăn klei gĭt gai mơ̆ng gưl dlông”.

Kiă kriê lehanăn djă yua lăn hŏng klei tŭ dưn amâo mâo djŏ knŏng dưi đru kơ čar Daklak bi leh ênoh čuăn đĭ kyar bruă duh mkra truh 8%, ƀiădah lŏ mjing atur kjăp kơ klei mđĭ kyar kjăp. Hŏng dŭm bruă mă djŏ guôp, mơ̆ng klei čuăl mkă bi djŏ, duh bi liê bruă nah gŭ, iêo jak phung duh bi liê, hriê răng mgang wăl hdĭp mda, Daklak srăng bi leh klei dưn yua klei găl mơ̆ng lăn ala, mjing anei jing boh kdrŭt yuôm bhăn čiăng mđĭ hnơ̆ng tŭ klei hdĭp mda mnuih ƀuôn sang mâo klei đĭ kyar nanao./.