Anôk bruă ngă hră mơar knŭk kna să Đăk Pxi, čar Quảng Ngãi bŏ mnuih. Wăl mă bruă mơ̆ng anôk bruă prŏng kyua dưi dăp ti anôk bii kƀĭn să Đăk Long, kdriêk Đăk Hà hđăp, ƀiădah hnơ̆ng mnuih lu kyua anăn brei dôk guôn ti mdhô̆ ti êngao. Amai Y Rê, alŭ Kon Têu, să Đăk Pxi, brei thâo:Mnuih ƀuôn sang hriê ngă hră mơar lu snăk, ai êwa ti anôk tŭ mă hră mơar lu snăk, mdhô̆ dôk guôn bŏ mnuih. Grăp čô čang hmăng msir mgaih pral čiăng hmao mă bruă gŏ sang, kyua anăn tăp năng ba klei kpĭ kơ phung knuă druh. Msĕ si kâo jao hră mơar hruê anei hruê mgi kơh srăng leh.”

 Bi amai Y Rum, ti alŭ Pâ Cheng, nao ngă hră mơar kơ anak nao sang hră, yăl dliê: “Hruê êlâo snăn knuă druh ngă pral snăk, aguah jao truh tlam mâo mă yơh. Hruê anei snăn amâo thâo ôh pral amâodah hơăi, mnuih ƀuôn sang hriê ngă hră mơar lu đei.  Knuă druh să ăt mđing uêñ mơh, hur har đru kơ mnuih ƀuôn sang hmei hlăm klei ngă hră mơar”.

A Ly –  K’iăng Khua anôk bruă Đảng, khua alŭ Pâ Cheng, să Đăk Pxi, brei thâo, mơ̆ng leh knŭk kña dăp anôk bruă knŭk kna, mnuih ƀuôn sang mơak snăk tơdah hră mơar dưi msir pral ti să, amâo guôn nao dŭm pluh km nao ti kdriêk msĕ sii êlâo ôh: ‘Ară anei hnơ̆ng jăk mă bruă kơ mnuih ƀuôn sang bi mklă kơ bruă mkŏ mjing leh anăn mđĭ boh tŭ ngă bruă mơ̆ng Anôk bruă ngă hră mơar knŭk kna jing jăk leh anăn tŭ dưn. Tinei, hră mơar dưi msir ti anôk bruă drông mnuih ƀuôn sang, klă mngač, msir prak snăk, đru kơ mnuih ƀuôn sang mkiêt mkriêm hruê mmông, ai tiê, mnuih ƀuôn sang mơak snăk. Anôk bruă să ti giăm sang  mjing klei găl kơ mnuih ƀuôn sang lu snăk. Êpul knuă druh jĕ giăm, ktrâo lač klă  klơ̆ng, mjing klei jĕ giăm tơdah nao ngă bruă. Bruă mđĭ yua kdrăp mrô hâo hưn ăt đru ksiêm dlăng, jao hră mơar leh anăn mă boh tŭ pral, găl ênưih.”

Să Đăk Pxi, čar Quảng Ngãi, mkŏ mjing mơ̆ng tur knơ̆ng bi mŭt să Đăk Pxi leh anăn să Đăk Long (hlăm kdriêk Đăk Hà, čar Kon Tum hđăp). Mbĭt hŏng bi mŭt anôk bruă knŭk kna, să ngă jăk dŭm bruă klam mbha gưl  kdriêk hđăp, kyua anăn hnơ̆ng bruă knuă lu. Ayŏng A Sanh, knuă druh Anôk bruă hră mơar knŭk kna să Đăk Pxi, hơ̆k mơak brei thâo: bruă knuă lu, ktrŏ, diñu gĭr bi leh bruă klam:‘“Hlăm wung mphŭn pŏk ngă bruă knŭk kna, klei dleh dlan hĭn jing klei phung knuă druh leh anăn mnuih ƀuôn sang ka mưng. Mơ̆ng hdră mă bruă, hmei ăt mưng hŏng hdră mrâo, ba yua kdrăp hâo hưn. Hlăm hdră drông mnuih ƀuôn sang ngă hră mơar, hmei mâo nanao knuih mơak, jih ai tiê ktrâo lač grăp knhuang. Gĭr ngă hră mơar đru kơ mnuih ƀuôn sang ƀuh hơĭt ai tiê, bi đăo knang hĭn”.

 Bi mlih mơ̆ng klei mĭn  hră mơar knŭk kna jing klei mĭn ngă bruă jing klei ƀuh klă hĭn tơdah  ngă gru hmô knŭk kna alŭ wăl dua gưl ti Đắk Pxi, anôk mâo truh 87,5% ênoh mnuih ƀuôn sang jing mnuih djuê ƀiă. Phạm Thị Thương, Khua dlăng bruă Đảng să Đắk Pxi brei thâo, ngă jăk hdră kñăm ala čar bi liê kơ krĭng mnuih djuê ƀiă leh anăn krĭng čư̆ čhiăng dôk đĭ kyar. Prăk hrui wĭt kah knar giăm  50 êklăk prăk/mnuih/thŭn; ară anei  ênoh gŏ êsei ƀun ti să adôk  giăm 6%.

Êlâo kơ bi mŭt, 2 să Đăk Pxi leh anăn Đăk Long (hđăp) klă klơ̆ng djăp dŭm hñơ̆ng čuăn mkŏ mkra krĭng ƀuôn sang mrâo. Ară anei să dôk lŏ dơ̆ng ngă jăk klei mtrŭt mjhar “bi mlih klei mĭn hdră ngă hlăm krĭng mnuih djuê ƀiă”, mbĭt anăn pŏk ngă tŭ dưn dŭm hdră, hdră êlan Knŭk kna, ktrâo lač mnuih ƀuôn sang ba yua klei kreh knhâo, bi mlih hdră kriê dlăng ana pla mjing, mnơ̆ng rông čiăng mđĭ kyar ala ƀuôn. Ti anăp klei čiăng bruă klam ƀrư̆ lu, Đắk Pxi ăt lŏ dơ̆ng mđing mkŏ mjing êpul knuă druh, boh nik phung knuă druh mnuih djuê ƀiă. Phạm Thị Thương brei thâo: “Hŏng phung knuă druh mnuih djuê ƀiă tinei snăn pŏk ngă bruă knuă hlue  si klei mbha bruă klam ăt klă klơ̆ng ngă djŏ. Khădah snăn ăt adôk mâo đa đa phung knuă druh mkhư̆ kơ kdrăp mrâo hâo hưn čiăng ngă djŏ klei čiăng msir bruă knuă hlăm kdrăp êmưt hĭn. Snăn să lŏ dơ̆ng mâo hdră kčah klă klơ̆ng čiăng kơ knuă druh mđĭ klei thâo, ba yua kdrăp mrâo msir bruă knuă mơ̆ng tur knơ̆ng hlăm mrô hlăm wưng kơ anăp.”

Hŏng klei bi liê kluôm mơ̆ng Knŭk kna, klei mlih mrâo kơ klei mĭn hră mơar knŭk kna mơ̆ng êpul knuă druh alŭ wăl, hŏng klei bi hgŭm mơ̆ng yang ƀuôn, đăo knang să krĭng taih kbưi Đăk Pxi srăng đĭ kyar trei mđao hĭn.