Kdrăn lŏ Ia Rbol, čar Gia Lai prŏng êbeh 30 ha yan anei msĕ si sa pŏk mnal mtah ti anăp angĭn yan bhang Lăn dap kngư. Êa mơ̆ng knơ̆ng mbông êa Ayŭn Hạ tuh hriê bi dliu hĕ klei adiê mđiă hlơr ktang. Nay H Wer, djuê ana Jarai, kreh iêu Yă Bip ti ƀuôn Rưng Ama Nin, să Ia Rbol hnêč nao mđoh êa kơ kdrăn mdiê, êlâo kơ mdei Têt djuê ana Bính Ngọ 2026. Ñu brei thâo, gŏ sang ñu pla mjing giăm 1,5 ha, yan êgao mâo hlăm brô 12 ton braih.

Jing ƀĭng ngă lŏ hma mbruă mơ̆ng čar Gia Lai, Nay H Wer kah mbha klei thâo hlăm bruă pla mdiê msĕ si sa čô thơ̆ng kơ bruă: Yan anei, ñu yua mjeh mdiê OM468, ƀiă mnơ̆ng ngă, hnơ̆ng mâo lu ƀiădah braih ê’un. Hdră pla mjing jăk hŏng wăl hdĭp mda, yua hbâo doh, amâo yua êa drao mdjiê hluăt lehanăn hbâo angre. Bi hrô hŏng klei krih êa drao mdjiê hluăt, ñu kreh nao čuă lŏ, amâo lui khuôt êa, snăn rơ̆k srăng đĭ jing ƀiă. Kyua thơ̆ng pla mdiê, ñu dưi rông 5 čô anak nao hriăm hră truh anih, mâo bruă mă jing nai mtô, kahan ksiêm, ngă bruă mdrao mgŭn. Nay H’Wer yăl dliê:

“Ung luič 26 thŭn leh, hjăn kâo gĭr rông phung anak. Kâo gĭr mă bruă pưk hma čiăng kơ čô anak dưi nao hriăm anôk anei, bruă adih. Myun phung anak kâo jăk ênang, kriăng hriăm hră kâo hơĭt mơah ai tiê. Truh ară anei, phung anak čô kâo mâo leh bruă mă hơĭt kjăp. Ară anei, kâo hdĭp hŏng ung mô̆ anak kluč, ƀuh anak čô mâo klei hdĭp hơĭt kjăp kâo mơak leh.

Khădah anak čô đĭ prŏng mâo bruă mă hơĭt kjăp, Nay H Wer ăt mđing mđĭ kyar bruă duh mkra, đru mkŏ mkra ƀuôn sang. Ñu myơr leh dŭm pluh met lăn, koh lu ana boh kroh, mjing wăl anôk mngač tač mkra êlan mnga ƀuôn sang.

Lu thŭn, Nay H Wer mâo tŭ yap jing ƀĭng ngă lŏ hma mbruă gưl čar. Ñu mâo ruah păn ngă pô bi ala Êpul gơ̆ng bruă ƀuôn sang să, mbĭt anăn jing khua hlăm Dhar bruă Mặt trận să Ayŭn Pa hđăp. Nay H’ Wer jing leh “kdrông mkŏ” plah wah Đảng hŏng mnuih ƀuôn sang.

“Mnuih ƀuôn sang tinei mâo Đảng, Knŭk kna mđing đru lu êdi, đru mnơ̆ng ƀơ̆ng huă, mjeh êmô, bê mđĭ kyar bruă duh mkra, truh kơ bruă đru mdơ̆ng sang kơ dŭm gŏ sang dleh dlan. Knŭk kna ăt mđing duh kơ anôk bruă nah gŭ, đru mkra êlan klông. Êlâo adih hlăm ƀuôn ka mâo êlan bêtông, găn êrô dleh dlan, ƀiădah mâo leh, êlan nao truh kơ lŏ hma mâo mơh, đru kơ mnuih ƀuôn sang găl ênưih hĭn hlăm hdră duh mkra pla mjing. Kâo lač jăk kơ Đảng lehanăn Knŭk kna mđing dlăng kơ klei hdĭp mnuih ƀuôn sang Jarai”.

Nay Pol – Kơiăng khua Adŭ bruă Dhar kreh – Ala ƀuôn să Ia Rbol, čar Gia Lai brei thâo, klei năng mơak tinei, jing Nay H’Wer thâo čŏng pô gĭr ktưn kpưn đĭ. Amâo jưh knang, amâo dôk guôn, mklăk hŏng anăn, ñu gĭr nao hgŭm hlăm hdră bruă ala ƀuôn, đru mguôp hŏng bruă Đảng, bruă knŭk kna alŭ wăl pŏk ngă tŭ dưn dŭm hdră êlan mtrŭn mơ̆ng Đảng, Knŭk kna čiăng mkŏ mkra ƀuôn sang mdrŏng siam.

“Ung luič mơ̆ng hnưm, hjăn păn rông anak, ƀiădah ñu ăt gĭr hgao jih klei dleh dlan, mă bruă mđĭ kyar hdră duh mkra, mđing kơ čô anak nao hriăm hră. Ñu klă sĭt jing gru mngač čiăng kơ mnuih ƀuôn sang tui hriăm lehanăn hluê ngă, mâo grăp čô mpŭ kyua ai tiê gĭr ktưn, amâo uêñ klei dleh dlan, gĭr kpưn đĭ”.

Yan mnga dôk wĭt ti kdrăn lŏ Ia Rbol, êa Ayŭn Hạ hlăk dôk rông ba dŭm kdrăn lŏ mâo djăp êa čiăng mjing mdiê braih. Hlăm pŏk rup anăn, phung mniê Jarai kreh kriăng msĕ si Nay H Wer amâo djŏ knŏng rah pla kơ sa yan ngă bruă djŏ boh mnga, ƀiădah lŏ ba kơ ƀuôn sang klei đăo knang kơ hdră ngă bruă duh ƀơ̆ng hơĭt kjăp, ksiêm hriăm truh anih lehanăn klei khăp jăk siam hlăm ƀuôn sang, êpul êya./