Thŭn 2007 Lê Văn Thuận, dôk ti alŭ mrô 7, ƀuôn hgŭm Hàm Thuận, čar Lâm Đồng, pla mjing truh 100 phŭn ana boh đung siêm. Leh ana boh đung čăt đĭ jăk hlăm lăn čuah êga, truh thŭn 2010 ñu lŏ pla dơ̆ng truh 400 phŭn, hŏng ênhă êbeh  1,7ha. Êdei kơ dua thŭn leh pla, snăn ana boh đung dơ̆ng mboh, lehanăn truh thŭn tal 3 mboh hơĭt yơh. Thŭn 2015, ƀuh gŭ êyui đang boh đung mngač tač, mâo rơ̆ng mda čăt đĭ, jing jăk găl kơ bruă rông mnŭ, snăn Thuận nao blei kuăt B40 păng bư̆ hĕ jŭm gah găn, mkra hĕ war mnŭ bi jăk, lehanăn nao blei djuê mjeh mnŭ pô, ba wĭt phưi rông hlăm gŭ êyui ana boh đung.

Phŭn tal êlâo ñu knŏng rông sa gưl dŭm êtuh drei đuič. Leh lu gưl êdei kơ anăn leh mâo mă lu klei hriăm mơ̆ng klei rông mnŭ, ƀuh mâo tŭ dưn jăk, snăn ñu lŏ nao blei masin boi mkrăm boh mnŭ. Mơ̆ng anăn, ênoh mnŭ ñu rông dơ̆ng đĭ nanao hlăm grăp thŭn, truh thŭn 2018, ênoh ñu rông krơ̆ng ti ênoh gŭ dlông 3.700 drei hlŏng truh kơ ară anei. Lê Văn Thuận brei thâo, kyua thâo mjut rông jăk, hdră pla mjing mguôp mbĭt hŏng rông mnơ̆ng mơ̆ng ñu mâo ba wĭt leh klei tŭ dưn.

“Mơ̆ng phŭn pla mjing leh mơh mâo klei mĭn srăng mguôp hŏng bruă rông mnŭ. Snăn gŏ sang tui tiŏ bruă anei yơh, lehanăn rông hŏng ênoh lu pioh čhĭ mnŭ kđeh lehanăn lehanăn čhĭ êđai mnŭ leh kčeh. Mjing bruă knuă mă kơ mnuih ƀuôn sang riêng gah, hlei pô čiăng rông mnŭ.

        Thuận yăl dliê, čiăng mjut rông mnŭ hdĭp jăk, snăn bi ksiêm dlăng nanao mnŭ. Êngao kơ bruă tlŏ mgang, lŏ bi ktuê ksiêm mnŭ huĭdah mnŭ tăm djiu, snăn nao blei mtam êa drao pioh mdrao kơ mnŭ. Êngao kơ čhĭ mnŭ kđeh, Thuận lŏ mjut mjing mnŭ mjeh čhĭ hŏng ênoh 17.000 prăk/drei, grăp mlan ñu mâo čhĭ mơ̆ng 2.700 - 3.000 drei. Mâo ba wĭt prăk mơ̆ng bruă rông mnŭ êbeh 1,5 êklai prăk, kah hĕ jih kơ ênoh bi liê ñu adôk mnga êbeh 450 êklăk prăk.

 Nguyễn Quốc Tuấn, pô bi ala mơ̆ng êpul hgŭm phung ngă lŏ hma ƀuôn hgŭm Hàm Thuận, čar Lâm Đồng brei thâo, Lê Văn Thuận jhŏng mĭn, jhŏng ngă ñu mđĭ bi lar klei găl kơ krĭng lăn čuah êga hlăm ƀuôn sang pô.

Mơ̆ng krĭng lăn čuah êga amâo mâo čăt jing, ung mô̆ Thuận ăt gĭr kuăn lăn ala pô mâo, mkŏ mjing bruă rông mnŭ hlăm gŭ êyui ana boh đung, dưi mâo leh boh tŭ dưn jăk. Anei jing hdră bi hmô jăk năng lŏ bi lar lu hĭn hlăm alŭ wăl hlăm wưng tinăp, đru kơ mnuih ƀuôn sang riêng gah dưi mâo ênoh ba wĭt kơ pô mơh.

 Hŏng klei tŭ dưn mâo ba wĭt prŏng, hdră pla mjing anak boh đung, mguôp mbĭt hŏng klei rông mnŭ mơng Thuận hlăk mâo lu mnuih tui hriăm, rông msĕ. Lê Văn Thuận ăt jing sa hlăm dŭ gŏ sang thâo bi hmô tal êlâo pla ana boh đung siêm hlăm lăn čuah êga ti alŭ mrô 7, ƀuôn hgŭm Hàm Thuận, čar Lâm Đồng, pŏk êlan kơ klei mđĭ kyar bruă duh mkra kjăp, đru hlăm klei bi hơĭt klei hdĭp mda ala ƀuôn./.