K’Bé jing sa hlăm phung mâo kơhưm ti ƀuôn hgŭm krĭng dlông Phan Sơn. Thŭn anei ñu êgao kơ 60 thŭn leh, tuôm găn leh hlăm lu bruă knuă mă ti alŭ wăl, hŏng ya mta bruă mă, ñu mâo nanao klei mnuih ƀuôn sang khăp mŭ.

Leh wĭt mdei bruă, ñu mâo mnuih ƀuôn sang jưh knang, yap jing mnuih mâo kơhưm êdi hlăm ƀuôn sang.  K’Bé jih ai tiê hgŭm hŏng êpul kiă kriê ƀuôn sang, mâo klei đru hâo hưn, mdĭ ai mnuih ƀuôn sang kơ hdră êlan mơ̆ng Đảng, klei bhiăn knŭk kna. Boh nik đru kčĕ kơ mnuih ƀuôn sang hlăm bruă mkŏ mkra krĭng ƀuôn sang mrâo, mđĭ kyar klei hdĭp mda, mkŏ mjing klei thâo bi mguôp, răng kriê klei êđăp ênang yang ƀuôn, lehanăn jih ai tiê bi kriê pioh knhuah gru dhar kreh djuê ana.

       Kâo ƀuh bruă klam pô ƀrư̆ jing prŏng hĭn hŏng ƀuôn sang. Kyuanăn, hlăm wưng êgao, kâo mbĭt hŏng mnuih ƀuôn sang mâo dŭm klei kăp kčĕ kơ gưl bruă Đảng, bruă sang čư̆ êa hlue ngă jăk djăp hdră êlan, čiăng si srăng ngă klei hdĭp mnuih ƀuôn sang ƀrư̆ đĭ hĭn. Mâo msĕ snăn kơh, mnuih ƀuôn sang mâo klei jưh knang kơ Đảng, Knŭk kna, mđĭ hĭn klei thâo săng. Boh nik hŏng dŭm hdră êlan anăn, wưng leh êgao, mâo bi mlih leh klă klei hdĭp mnuih djuê ƀiă ti ƀuôn hgŭm Phan Sơn.

Mâo klei thâo ba anăp, K’Bé amâo mâo djŏ knŏng hlue ngă jăk hdră êlan, klei bhiăn knŭk kna, hdră êlan mơ̆ng Đảng, ƀiădah lŏ jing pô tal êlâo thâo bi hmô hlăm klei duh ƀơ̆ng, čiăng kơ anak čô lehanăn mnuih ƀuôn sang tui hlue.

Amâo mâo djŏ knŏng duh mĭng kơ gŏ sang pô, K’Bé lŏ mđĭ ai găp djuê, mnuih ƀuôn sang riêng gah, bi mlih mnơ̆ng pla, mnơ̆ng rông, jhŏng čan prăk knơ̆ng prăk pioh duh ƀơ̆ng. Ñu lŏ mđĭ ai mnuih ƀuôn sang lăm lui jih klei bhiăn hđăp amâo mâo lŏ djŏ, boh nik klei bi dôk ung mô̆ mơ̆ng mda.

 K’Vi Ang, dôk ti ƀuôn hgŭm Phan Sơn, čar Lâm Đồng lač, êlâo dih hlăm ƀuôn dôk mâo lu snăk klei bi dôk ung mô̆ mơ̆ng mda, mâo đa đa hđeh mniê dôk ung mrâo mơ̆ng 13 - 14 thŭn. Leh mâo awa K’Bé mblang, mtă mtăn, snăn dŭm klei bi dôk ung mô̆ mơ̆ng mda amâo lŏ mâo ôh. Dŭm thŭn hŏng anei hrŏ leh êdi:

Awa K’Bé mâo bruă klam prŏng êdi hlăm klei mđĭ kyar duh mkra ala ƀuôn, lehanăn hgŭm hlăm djăp bruă ƀuôn sang. Msĕ si mtrŭt mnuih ƀuôn sang thâo myơr lăn pioh mkra êlan klông, ngă mbông êa. Awa K’Bé ăt mtrŭt mnuih ƀuôn sang thâo bi kriê pioh knhuah gru dhar kreh djuê ana, mđĭ ai mnuih ƀuôn sang đru bi răng mgang klei êđăp ênang hlăm ƀuôn sang ti ƀuôn hgŭm Phan Sơn.

Kyua hŏng klei thâo gĭr, klei đru mguôp prŏng mơ̆ng phung mâo kơhưm, truh kơ ară anei ƀuôn hgŭm Phan Sơn, čar Lâm Đồng mâo leh dŭm boh tŭ dưn jăk hlăm dŭm mta bruă msĕ si: Êlan klông mâo mkra hŏng bê tông, dŭm gŏ sang mâo leh sơăi pui kmlă yua, grăp boh ƀuôn mâo leh sang dhar kreh, hnơ̆ng ênoh gŏ sang ƀun hrŏ nanao hlăm grăp thŭn... Knhuah gru dhar kreh djuê mâo kriê pioh, bi lar, răng mgang kjăp klei êđăp ênang bruă kđi čar, klei êđăp ênang yang ƀuôn, klei thâo bi mguôp jih jang djuê ana dưi hyuă kjăp.

Bùi Ngọc Sơn, K’iăng khua knơ̆ng bruă djuê ana lehanăn klei đăo čar Lâm Đồng brei thâo, kñăm mđĭ hĭn bruă klam mơ̆ng phung mâo kơhưm, truh ară anei, Knơ̆ng bruă mâo mkŏ mjing leh 4 boh adŭ mjuăt bi hriăm klei thâo săng hŏng mnuih mâo kơhưm hlăm kluôm čar, čiăng kơ mnuih mâo kơhưm păn kjăp lehanăn lŏ bi lar tŭ dưn hĭn truh hŏng mnuih ƀuôn sang.

Hŏng kơhưm pô, K'Bé amâo mâo djŏ knŏng dưn yua jih hnơ̆ng bruă klam jing kdrông mkŏ, ƀiădah lŏ bi lar pral dŭm hdră êlan, lehanăn mtrŭt klei mđĭ kyar hlăm krĭng mnuih djuê ƀiă ti ƀuôn hgŭm čư̆ čhiăng Phan Sơn, čar Lâm Đồng.