Giăm 80 thŭn leh kahan hđăp Lê Trương Thận, ti să Cư Êwi, kdriêk Cư Kuin ăt kjăp asei mlei, pral kdal, thâo ba yua đĭng blŭ thâo mĭn čiăng thâo gai kdrăp krih êa hŏng klei mkiêt mkriêm kơ đang hma pô. Truh mlam ñu mñah mnga boh durian. Aguah lŏ dlăng kriê đang boh êrang dơ̆ng mâo ƀơ̆ng leh. Thận brei thâo, ñu mkŏ mkra klei hdĭp mda mrâo ti čar Daklak knŏng mơ̆ng 3 sao lăn sah mba. Ƀiădah ară anei, lŏ pŏk phai anôk truh êbeh 2ha, grăp thŭn mâo hrui wĭt gŭ dlông 1 êklai prăk.

“Kâo jing sa čô kahan, snăn djă pioh nanao knhuah lĭng kahan Awa Hồ, gĭr ktĭr mă bruă čiăng tlaih mơ̆ng klei dleh dlan, tơdah êpul hgŭm kahan hđăp amâodah êpul hgŭm phung ngă lŏ hma mkŏ mjing adŭ mjuăt bi hriăm, snăn nao tui hriăm adŭ anăn, dơ̆ng mơ̆ng bruă pla mjing hlŏng kơ bruă rông mnơ̆ng. Ktưn nanao truh ară anei dưi mâo leh truh 2ha, pla mjing djăp mta mnơ̆ng, lu hĭn jing pla ana boh durian, thŭn anei mâo pĕ leh êbeh 100 phŭn, lehanăn ana boh êrang ăt mâo pĕ hlăm brô mơ̆ng 5-6 tôn, boh vải thŭn anei mâo êbeh 50 cphŭn hlăk dơ̆ng mboh mơh”.

Ti kdriêk Cư Kuin, čar Đắk Lắk, phung kahan hđăp mâo ênoh hrui wĭt prăk êklai msĕ hŏng Thận amâo mâo djŏ ƀiă ôh. Kahan hđăp Nguyễn Trung Thành, ti alŭ mrô 7, să Ea Ning, ăt jing sa klei bi hmô, mâo ênoh hrui wĭt êbeh 1 êklai prăk grăp thŭn mơ̆ng bruă pla mjing lehanăn rông mnơ̆ng.

“Kâo rông bê mơ̆ng 180-220 drei, lehanăn pla truh êbeh 2ha kphê, vải, tiêu, durian, rông mnơ̆ng êjai mă eh bê mđăm bi mbrŭ pruê kơ mnơ̆ng pla kphê lehanăn ana boh kroh. Ăt jing kahan awa Hồ ƀuh jing mdul hĭn kơ mnuih mkăn, thâo bi đru hdơ̆ng găp. Mâo hŏng anei 2 thŭn kâo ăt đru leh 2 gŏ sang kahan hđăp ti alŭ mrô 7 anei truh 60 êklăk prăk brei čan amâo mâo mă prăk mnga ôh, čiăng kơ digơ̆ pla mjing êjai lehanăn pla mjing êjai”.

Mbĭt hŏng klei grăp čô thâo lŏbi đru kơ phung dôk hlăm klei dleh dlan, boh nik hlăm êpul kahan hđăp dleh dlan mơ̆ng thŭn 2013 truh kơ ară anei, dŭm gưl êpul kahan hđăp kdriêk Cư Kuin mâo bi mkrum leh êbeh 800 êklăk prăk pioh blei êbeh 40 drei êmô lehanăn mkŏ mjing 8 pŏk hră mkiêt mkriêm mđup brei kơ ƀĭng kahan hđăp dôk hlăm klei dleh dlan, mkŏ mjing keh hdơ̆ng găp êbeh 6 êklai prăk kơ êbeh 300 čô ƀĭng hgŭm mâo čan prăk hŏng mnga hdjul. Kyuanăn, truh ară anei kluôm kdriêk knŏng adôk 20 gŏ sang kahan hđăp dôk hlăm klei dleh dlan.

Tui si Võ Công Tường, K’iăng khua êpul hgŭm kahan hđăp kdriêk Cư Kuin, hlăm ênoh giăm 2.900 čô ƀĭng hgŭm kahan hđăp ti Cư Kuin, mâo truh êbeh mkrah jing gŏ sang thâo mâo. Anei jing leh dŭm klei bi hmô jăk hlăm bruă mđĭ kyar klei hdĭp, lehanăn bi hgŭm hŏng dŭm bruă hlăm ƀuôn sang, đru hlăm bruă mkŏ mkra krĭng ƀuôn sang mrâo.

Hlăm dŭm thŭn êgao, knuă druh êpul hgŭm kahan hđăp kluôm kdriêk čŏng myơr leh êbeh 10ha lăn lehanăn bi mkrum dŭm êklai prăk pioh mkra êlan, mđrăm mbiư̆t hŏng alŭ wăl čiăng bi mâo êlan kơ mnuih ƀuôn sang găn êrô. Mâo êpul kahan hđăp mâo bi mguôp leh dŭm êtuh êklăk prăk.

“Diñu jing phung thâo bi hmô jăk, boh nik hlăm bruă mkŏ mjing dŭm klei duh ƀơ̆ng, mđĭ kyar klei hdĭp mda. Khădah hŏng si hdră êlan hdĭp mda, ƀiădah phung kahan hđăp amâo mâo lui ôh knhuah gru kahan awa Hô, rŭ mdơ̆ng dŭm klei bi hmô klei duh ƀơ̆ng mjing klei mđĭ ai phung kahan hđăp mkăn gĭr ktir duah ƀơ̆ng. Khădah hŏng ya mta bruă mă ăt bi leh jăk bruă kčah jao”.

 Kbiă mơ̆ng lĭng kahan, phung kahan hđăp ti kdriêk Cư Kuin, čar Đắk Lắk ăt djă pioh nanao knhuah gru kahan awa Hô, jhŏng ktang, mâo bruă klam mâo klei thâo bi đru hlăm klei duh ƀơ̆ng, lŏ jing phung ba êlan êlâo, duah klei sah mdrŏng hŏng klei ênuah, lehanăn bi lar nanao klei thâi bi mguôp, thâo bi đru hlăm yang ƀuôn, hdĭp hlăm klei khăp hŏng ƀĭng kahan./.