Hŏng êbeh 650 êpul ba anăp, hlăm mlan 3 leh egao, phung êdam êra kluôm čar Lâm Đồng dưn yua ai tiê mda asei pô mâo ngă leh êbeh 500 mta bruă êdam êra, hŏng ênoh jih jang êbeh 4,1 êklai prăk. Hlăm anăn, hlăm anăn, sa ai hŏng bruă bi ktưn, mđrăm mbĭt đru lăm lui sang tĭ rưč, hŏng bruă đru mtrŭt mjhar rŭ mdơ̆ng mrâo mâo 12 boh sang, đru truh 160 hrue ai mă bruă, hŏng ênoh jih jang êbeh 800 êklăk prăk. Mkŏ mjing giăm dŭm êtuh gưl čô mnuih trŭn kơ bruă hrue kjuh mtah, hrue mkŏ mkra krĭng ƀuôn sang mrâo mâo giăm 13.500 gưl čô êdam êra nao bi mguôp. Êngao anăn, bruă êdam êra čar Lâm Đồng mâo mkŏ mjing leh 137 êpul ba anăp nao bi hriăm bruă mrô, đru kơ giăm 10.000 čô mnuih thâo ba yua kdrăp mrô.

Trần Anh Tú, Khua bruă êdam êra ƀuôn prŏng Đà Lạt lač, dŭm boh tŭ dưn anăn, bi êdah leh klă mngač bruă klam mơ̆ng phung mda asei đru mđĭ kyar klei duh mkra hlăm alŭ wăl.

 “Mơ̆ng bruă ngă anăn, hmei mơak kyua mâo klei bi sa ai mơ̆ng phung êdam êra. Klei anăn bi êdah thŭn mda asei mpŭ kơ knhuah gru dhar kreh, kơ phung nao êlâo. Hlăm grăp blư̆ msĕ snăn, phung mda asei čih pioh nanao dŭm klei thâo gĭr hlăm bruă knuă, lŏ mjuăt hriăm, lŏ dơ̆ng duh myơr mkŏ mkra ƀuôn sang lăn čar pô”.

Tui si Trương Văn Tùng, knuă druh bruă êdam êra Lâm Đồng, hŏng klkei mkŏ mjing mbruă, mâo bruă ngă klă mngač ba wĭt klei tŭ jing jăk siam mđĭ ai ktang leh hlăm yang ƀuôn. Mơ̆ng anăn jing boh kdrŭt kơ klei lŏ iêo jak phung mda asei hđeh êlăk hlăk ai bi ktưn hlăm bruă êdam êra čar.

 “Hlăm thŭn 2025, hmei tă êlan srăng mkŏ mjing ƀiă êdi 4 blư̆ trŭn kơ bruă hlăm klei mkŏ mkra krĭng ƀuôn sang mrâo, lehanăn knăm kjuh mtah, čiăng kơ jih jang bruă anăn mâo ngă nanao, lehanăn mđĭ lar boh tŭ dưn mơ̆ng bruă knuă”.