VOV4.Êđê - Čiăng mđĭ hĭn klei tŭ dưn bruă knuă, lehanăn ƀrư̆ ƀrư̆ pla mjing lu mta mnơ̆ng, kdriêk Cát Tiên, čar Lâm Đồng hlăk pŏk phai prŏng đang djam. Ară anei alŭ wăl mjing leh krĭng truăn kơ bruă pla djam mtam hŏng ênhă truh 524 ha krĭng mnai ktue hnoh krông Đồng Nai. Lu mta djam mtam mâo pla ti kdriêk Cát Tiên jing: Djam bei hat, êtak, kmŭn gơ̆ng, ya ut, lehanăn salat. Kyua djŏ guôp hŏng lăn ala snăn ênhă pla djam ktue hang krông Đồng Nai čăt đĭ jăk, ƀiă klei hluăt ƀơ̆ng mnơ̆ng ngă, lehanăn mâo klei jăk. Kah knar grăp ha djam mtam mâo ba wĭt kơ mnuih pla mjing ti Cát Tiên hlăm brô mơ̆ng 300 –500 êbâo prăk grăp thŭn, kdlưn hĭn mơ̆ng 5 blư̆ truh kơ 10 blư̆ pla mdiê. Ară anei dhar bruă lŏ hma kdriêk Cát Tiên hlăk mtrŭt mjhar, lehanăn đru hdră dlăng kriê wiê ênăk, đru prăk duh bi liê, lehanăn mjeh djam kơ dŭm gŏ êsei mâo lăn hlăm krĭng mnia ktuê hnoh krông Đồng Nai, lŏ dơ̆ng bi mlih mnơ̆ng pla mjing nao bi pla djam hlue hdră mrâo mrang, mđĭ ênoh mâo ba wĭt bi hơĭt klei hdĭp mda./.

Y Khem pô mblang