VOV4.Êđê- Knhal jih thŭn 2020, ênoh hruh hluăt ti čar Lâm Đồng čhĭ hŏng ênoh mơ̆ng 110 truh 120 êbâo prăk/kg, ƀiădah truh wưng anei, ênoh hruh hluăt truh 180 êbâo prăk/kg. Mơ̆ng klei hâo hưn mơ̆ng dŭm anôk bruă mnia blei mkra mjing hruh hluăt ti čar brei thâo: ênoh hruh hluăt lŏ wĭt đĭ jing kyua anôk ba čhĭ hruh hluăt kơ ala tač êngao mâo klei bi mlih jăk. Dŭm ala čar hlăk dơ̆ng lŏ wĭt pŏk ƀăng bruă ba čhĭ kơ ala tač êngao, dŭm anôk bruă mnia blei hlăm čar ăt hlăk mâo hră akâo blei mơ̆ng ala tač êngao lu. Bruă hruh hluăt lŏ dơ̆ng đĭ lu, đru kơ ƀĭng ngă lŏ hma hơĭt ai tiê duh bi liê mkra mjing, pŏk mlar hnơ̆ng pla ana hluăt rông hluăt, mđĭ bruă duh mkra gŏ sang đĭ kyar. Ti čar Lâm Đồng ară anei mâo hlăm brô 15 êbâo gŏ êsei mnuih ƀuôn sang pla ana hluăt rông hluăt mă mrai, mđĭ kyar mâo êbeh 8.700 ha ana hluăt, mâo 70% ênhă pla ana hluăt kluôm ala, hŏng 57 êpul hgŭm bruă, êpul bi hgŭm leh anăn 5 ƀuôn bruă pla ana hluăt rông hluăt mă mrai.

Pô mblang: Y-Khem Niê