VOV4.Êđê- Čar Lâm Đồng ară anei mâo 5 mnơ̆ng dhơ̆ng mơ̆ng bruă rông mnơ̆ng mâo klei bi mguôp tui hluê ênoh, hlăm anăn mâo: Klei bi mguôp bruă hrui blei êa ksâo mtah, klei bi mguôp bruă rông ŭn, bi mguôp bruă rông mnŭ, bi mguôp bruă rông êmô mă kđeh čĭm lehanăn klei bi mguôp mra mjing lehanăn čhĭ mnia hluăt mrai. Čiăng mđĭ kyar klei bi hmô kơ bruă bi mguôp rông mnơ̆ng dhơ̆ng, mkra mjing mnơ̆ng ƀơ̆ng huă lehanăn bi mguôp anôk mnia mblei, čar Lâm Đồng ngă klei klei găl kơ dŭm êpul êya, mnuih ƀuôn sang, dŭm knơ̆ng bruă mkra mjing, čhĭ mnia mnơ̆ng rông, bi klă srăng mâo anôk ba čhĭ mnơ̆ng dhơ̆ng hŏng dŭm anôk rông mnơ̆ng, gŏ sang rông mnơ̆ng dhơ̆ng msĕ si: klei bi hmô rông êmô mă kđeh čĭm nao mbĭt hŏng klei čhĭ mnia kđeh čĭm mơ̆ng êpul bi mguôp Võ Thị Xoan  bi mguôp hŏng 60 gŏ sang, rông truh kơ 600 drei lehanăn mâo 200 tôn kđeh čĭm/ sa thŭn. knơ̆ng bruă Ba Minh bi mguôp rông hluăt mrai lehanăn ba čhĭ hruh hluăt hŏng 50 gŏ sang ti Lâm Hà, Đức Trọng, Đam Rông, mâo ênhă rông 23 ha lehanăn 1.000 hruh boh mjeh, mâo hnơ̆ng 40 tôn hruh hluăt/ thŭn. 100% hruh hluăt mơ̆ng dŭm gŏ sang nao hgŭm mâo anôk ba čhĭ lehanăn mâo klei hơĭt kjăp.

Pô mblang: Y-Ƀel Êban