VOV4.Êđê-  Aguah anei, 3/6, ti Hà Nội, Phŭn bruă Lŏ hma mđĭ kyar krĭng ƀuôn sang mkŏ mjing leh Klei bi kƀĭn trưkc tuyến kluôm ala kơ bruă ruh mtlaih klei dleh dlan hlăm bruă mtrŭt mđĭ klei ba yua mnơ̆ng lŏ hma hlăk dôk hlăm wưng bluh mâo klei ruă Covid 19. Klei kƀĭn srăng bi trông kơ dŭm hdră msir msĕ si: Čih mkra hdră blei yua mnơ̆ng lŏ hma ti krĭng mâo klei ruă tưp, ruh mtlaih klei gun kpăk hlăm bruă dŭ mdiăng mnơ̆ng dhơ̆ng mơ̆ng krĭng mâo klei ruă tưp truh kơ dŭm alŭ wăl blei yua hlăm ala čar lehanăn ba čhĭ kơ ala tač êngao. Ruh mtlaih klei dleh dlan hlăm bruă ba čhĭ boh vải thiều mơ̆ng 2 čar Bắc Giang lehanăn Hải Dương, Phŭn bruă lŏ hma mđĭ kyar krĭng ƀuôn sang mkŏ mjing leh dŭm êpul mă bruă hŏng alŭ wăl ƀăng jang knông lăn siă knông lehanăn dŭm anôk bruă mnia mblei mơ̆ng Trung Quốc. Mbĭt anăn ksiêm dlăng hdră pla mjing lehanăn hdră mkăp dŭm mta mnơ̆ng bruă lŏ hma ti dŭm alŭ wăl lehanăn kƀĭn bi trông kơ hdră bi hgŭm hlăm bruă blei mnơ̆ng lŏ hma hŏng dŭm anôk bruă duh mkra kah mbha mnơ̆ng dhơ̆ng hlăm lehanăn êngao čar./.

                                                    Pô mblang: H’Nêč Êñuôl