VOV4.Êđê - Kan leo, sa mta kan mâo ênoh yuôm mâo ƀĭng ngă lŏ ti Lâm Đồng lông rông ênao êa čŏng kuai hlăm lăn. Leh anăn klei tŭ tal êlâo brei ƀuh, kan leo klă sĭt dưi hdĭp hlăm yan adiê krĭng lăn dap kngư, năng ai srăng mâo lu kan pioh čhĭ.

Gŏ sang ayŏng Trần Hữu Tự, dôk ti alŭ Tân Hóa 2, ƀuôn prŏng Bảo Lộc, čar Lâm Đồng jing sa gŏ sang mâo klei thâo kơ bruă rông kan ba čih kđeh msĕ si kan kruă, kan čep lehanăn kan êbŭng. Thŭn 2020, mâo klei mtô mơ̆ng dŭm čô knuă druh hlăm bruă lŏ hma, ayŏng lông rông kan leo, anei jing sa mjeh kan mrâo hŏng dŭm gŏ sang rông kan krĭng čư̆ čhiăng. Boh tŭ dưn tal êlâo brei ƀuh, hlăm ƀlŭng êa kuai sang ayŏng jing anôk găl kơ kan leo hdĭp lehanăn đĭ hriê kơ prŏng.

 Hŏng ƀlŭng êa kuai mâo 2 sao ênao êa, mlan 6/2020, ñu phưi hlăm brô 2.000 drei kan leo mjeh. Mjeh kan anei mơ̆ng anôk bruă mtrŭt mjhar bruă lŏ hma čar Lâm Đồng đru brei. Anôk bruă lŏ hdơ̆ng đru 70% mlơ̆k ƀơ̆ng kơ kan lehanăn ba jao klei thâo kơ bruă kriê dlăng. Ayŏng Trần Hữu Tự lač:“Kan leo hlăk mrâo phưi mâo ƀoh ktrŏ hlăm ƀrô 7-8 gram hlăm sa drei, lehanăn mâo hlăm ƀrô 150 drei/kg. leh 10 mlan rông, kan leo mâo boh ktrŏ kah knăr 1,4 kg/drei, dưi dlăng anei jing klei đĭ hriê jăk”

Tui hlue ayŏng Trần Hữu Tự, kan leo jing kăn hiu duah ƀơ̆ng mmăt mlam, bơ̆ng mlơ̆k lu hĭn kơ mnơ̆ng mkăn. Leh truh kơ prŏng, kan anei bơ̆ng mnơ̆ng hdĭp msĕ si kan êđai, hdang êđai…, ênưih hlăm klei kriê dlăng lehanăn amâo jăk mâo klei ruă. Kan anei kreh hdĭp hlăm tur ênao êa, kyuanăn ayŏng lŏ dưi rông dŭm mta kan duah ƀơ̆ng jĕ êlah êa msĕ si kan êbŭng, kan kruă rông.

Ayŏng Trần Hữu Tự brei thâo, êlâo kơ phưi kan, ñu srăng bi doh ƀlŭng êa kuai anăn, prue čur, hbâo brŭ čiăng kơ doh êa lehanăn mâo lu mnơ̆ng jăk. Hlăm ênao êa anăn mâo kdrăp kar êa čiăng bi doh êa ba mđuê̆ kơ hnoh êa Lộc Nga lehanăn bi mlih êa nanao. Kyuanăn, kan leo anei hdĭp hlăm anôk čiăng msĕ anôk kreh hdĭp hlăm tač, amâo mâo klei ruă tưp. Êngao kơ năn ayŏng Trần Hữu Tự lŏ rông lu kan kruă rông, mjeh kan kruă anei duah ƀơ̆ng ti êlah êa, lu kan kruă ana mboh lehanăn boh kan anei kčeh êđai, jing mnơ̆ng ƀơ̆ng hdĭp kơ kan leo dôk nah gŭ tur êa.

 Nguyễn Văn Thành, knuă druh hlăm anôk bruă mtrŭt mjhar bruă lŏ hma čar Lâm Đồng brei thâo kan leo amâo dah mâo anôk pia kan Nheo jing kan mâo klĭt êbơr, prŏng lehanăn mâo lu mnơ̆ng jăk tơdah ƀơ̆ng, kđeh kan jăk lehanăn bâo mngưi, mâo klei čiăng lu hlăm anôk mnia blei, kyuanăn hlăm tač êngao arăng mă jih leh, hlăm hnoh êa lehanăn êa krông, ênoh kan leo mâo klei hrŏ hmar. Kyuanăn, anôk bruă mkŏ mjing leh klei bi hmô “Rông kan Leo hlăm ƀlŭng êa kuai” čiăng lông rông sa mta mnơ̆ng rông mâo klei yuôm hlăm bruă duh mkra.

 Hŏng klei bi hmô mâo leh bruă ngă, ênoh čhĭ krah knăl mâo hlăm ƀrô 90 êbâo prăk/kg. Hlăm klei mă čhĭ, dŭm gŏ sang srăng mâo prăk mnga mơ̆ng 140-160 êklăk prăk/sa mlam. Boh tŭ dưn mơ̆ng klei bi hmô anei brei ƀuh, mâo lu alŭ wăl mâo klei găl dưi mđĭ kyar bruă rông kan leo anei. Klei bi hmô anei đru kơ mnuih ƀuôn sang dưi ruah mnơ̆ng rông mrâo mlih hŏng mnơ̆ng rông mâo leh mơ̆ng êlâo, hlăm anăn dưi mđĭ hnơ̆ng mnơ̆ng rông hlăm êa, djăp kơ klei čiăng yua grăp hruê hlăm alŭ wăl čar Lâm Đồng.