VOV4.Êđê- Anôk bruă mdrao mgŭn kơ mnơ̆ng rông čar Quảng Ninh brei thâo, hlăm alŭ wăl čar Quảng Ninh mrâo hmao ƀuh kman ruă hdrak hlăm mnŭ ada A/H5N8 tal êlâo hĭn ti ala čar Việt Nam. Êlâo kơ anăn, mơ̆ng hruê 29/6. War rông mnŭ ti gŏ sang ayŏng Nguyễn Huy Long, alŭ Bãi Cát, să Vu Oai, ƀuôn prŏng Hạ Long, čar Quảng Ninh mâo klei mnŭ djiê amâo thâo bĭt phŭn agha lehanăn djiê ƀrư̆ hruê ƀrư̆ lu truh kơ 200 drei. anôk bruă dưn kyua klei thâo kơ bruă lŏ hma ƀuôn prŏng Hạ Long nao mă leh 3 mta ksiêm mkă kman lehanăn ƀuh mâo kman ruă hdrak hlăm mnŭ ada A/H5N8. Klei jing kman dưi hmao ƀuh tal êlâo hĭn ti ala čar Việt Nam. Dlông rŏng lăn tuôm čih yap leh dŭm anôk mâo klei ruă mơ̆ng kman anei ti Ơrôp, Trung Quốc, Trung Đông lehanăn krĭng dưr Afrik. Mâo ƀiă êdi 7 čô ti ala čar Nga mâo kman A/H5N8 kyua tưp mơ̆ng mnŭ ada mâo klei ruă.

Pô mblang: Y-Ƀel Êban