Yal wơl ală jơnau kơlôi rơcăng bơh kwang đơng lam bồ Tỉñ ủy càr Kon Tum dê tơngai nhai 06 nam 2020, ồng Nguyễn Đức Tuy, Phó Ƀí thư Tỉñ ủy càr Kon Tum pà gĭt, bal mờ gùng dà di, jơnau kòn bơnus là kwơmàng ngan lơh geh cồng nha tàm broă lơh tơrmù rƀah. Mờ gơnoar broă là Lam bồ Mpồl lơh broă bơh Tỉñ ủy càr Kon Tum dê (hòi lơyah là Mpồl 262), ồng Nguyễn Đức Tuy pà gĭt, broă lơh đơng lam, sồr lơh geh lơh jăt dồ bă jơh nùs jơh tồr, càr jàu kơnòl loh làng ai kwang đơng lam bồ tơl sở gah broă mờ kâp kơnhoàl, kâp sàh in, dong làng bol sàh Mường Hoong, Ngọk Linh gờñ klàs rƀah.

“Mpồl lơh broă 262 sùm ơm rềp mờ ƀòn lơgar, sùm geh mpồl lơh broă tàm hơđơm sàh, tơnggŏ geh gơnoar broă bơh jơh ală anih lơh broă cíñ trị dê tàm broă dong làng bol bơtàu tơngguh lơh sa- mpồl bơtiàn. Mờ mpồl lơh broă kwang bàng, đảng viên tàm kâp sàh, kâp thôn kung neh gĭt wă geh, khi neh mŭt lơh bal ngan ngồn nàng bal mờ làng bol lơh bè lơi 2 sàh do gờñ klàs bơh rƀah”.

Lơh jăt jơnau sồr bơh Tỉñ ủy càr Kon Tum dê, ală sở, ƀan, gah, ală kâp ủy đảng, gơnoar ătbồ neh mhar ngan mŭt lơh bal nàng geh ală bơta dong kờl geh kwơ ngan ngồn mờ geh cồng nha gơ wèt mờ 2 sàh rƀah ngan rlau jơh càr dê. Ồng Huỳnh Mười, Phó Kwang Lam bồ Sở Broă rơndăp lơh mờ Bơcri priă càr Kon Tum pà gĭt, bal mờ priă 3 broă lơh jơnau kờñ dà lơgar dê (mờr 100 tơmàn đong tơngai bơh nam 2021- 2025), tàm tam pà kes priă sùm lời ală ai lài dờng ngan rlau jơh nàng ai tơl bơta ai 2 sàh in brồ guh. Gơl gùng càr tàm tơrbŏ bal tiah tờm kơnhoàl Đăk Glei mờ sàh Mường Hoong, Ngọk Linh mờ kơnhoàl Tu Mơ Rông jòng rlau 100 kơi sồ neh lơh sir jơh, dong lòt rê, jun pơndiang phan kă bro ƀươn ƀoài rlau.

Ồng Huỳnh Mười yal, càr gam lơh mờ hòi jà bơcri priă 2 rơndăp broă lơh tam, tơngguh uă lơh phan ală phan bơna sơnơm tơm ba, kờp jơh priă digơlan rlau 2 rbô tơmàn đong tàm 2 sàh, do rơ̆p là bơta gơn kơnờm kwơmàng nàng 2 sàh in pơn jăt tai bơtàu tơngguh, kơ̆ kơl jăp.

“Dong kờl 2 sàh Mường Hoong, Ngọk Linh den nùs nhơm bol hi dê là pal jàu mbrơm ndàr ai làng bol in. Tàm broă tam pà priă mờ bơta pràn den kung gam ai lài ai 2 sàh kal ke in jăt ală broă jàu. Bơdìh hơ̆ tai, bol hi pal gơhòi gơ jà ală mpồl lơh sa kă bro, cau bơcri priă lòt tus tơn ù tiah 2 sàh dê, nàng bơh hơ̆ lơh gơlik geh broă lơh broă sa ai làng bol in”.

Là anih lơh broă geh jàu đơng lam tàm broă lơh lam sồr, mblàng yal dong làng bol 2 sàh rƀah ngan rlau jơh càr tam gơl bơta mờng sơnơng, bơta mờng lơh, ồng Trịnh Ngọc Tâm, Phó Lam bồ Mpồl Hòi jà làng bol Tỉñ ủy càr Kon Tum pà gĭt, Mpồl neh tă pơgồp jơnau đơs nàng càr ai mpồl kwang bàng, đảng viên kơnòm să geh bơta pràn jak tàm ală anih lơh broă, mpồl lơh broă mờng lơh kơnòl broă ờs mờng rê hờ sàh, hờ ƀòn.

“Kwang bàng, đảng viên geh ai rê là ală kwang bàng kơnòm să, geh bơta jơh nùs jơh tồr, geh bơta pràn jak, khi mù mblàng yal, lam sồr hòi jà jăt ngui jak chài măy mŏk, ai ală bơta pa rê hờ sàh, dong làng bol, ơm rềp mờ làng bol, bơto pơlam làng bol tam gơl, tơrgùm ală broă lơh tơrlòng lài lơh sa geh cồng nha”.

Kâp càr geh 23 sở, mpồl, gah mŭt lơh bal, sồr kwang bàng, đảng viên mŭt bal tàm Mpồl lơh broă bơh Tiñ ủy càr Kon Tum dê rê dong làng bol Mường Hoong, Ngọk Linh. Ndrờm bè hơ̆ sơl, kơnhoàl Đăk Glei kung tơnggơs mpồl lơh broă dong kờl 2 sàh. Ồng Lê Viết Nam, Củ tịc Anih duh broă Làng bol kơnhoàl Đăk Glei pà gĭt, 22 thôn, ƀòn bơh 2 sàh dê ndrờm bè mpồl lơh broă ơm rềp mờ ƀòn lơgar. Kwang bàng, đảng viên sa bal, ơm bal, lơh bal mờ làng bol, ià tê, sơñio broă bơto pơlam làng bol lơh gơ in geh cồng nha. Kwang bàng càr, kơnhoàl mờ sàh gơhòi gơ jà mpồl kwang bàng, đảng viên tàm ală thôn, ƀòn jơh nùs tus bal, lơh krơh lòt lài tàm ală broă lơh tơrlòng lài tam gơl rơndăp tăp sèng chi tam.

Tus tŭ do, cồng nha lơh geh dờng ngan rlau jơh là neh dong làng bol tam gơl bồ tơngoh kơlôi sơnơng, bơta mờng lơh, đòm jăt bơta gơguh jak jak chài, măy mŏt tàm broă lơh sa. Mờ ală sươn kơnuh sơnơm Ngọc Linh phan sền gàr dà lơgar dê, ală sươn kơphê mbòr ngan plai, ală àr kơnuh sơnơm tơlir niam ngan, tŭ do làng bol ờ mìng klàs bơh rƀah mờ gam kơlôi tus lơh pas tai. Jăt ồng Lê Viết Nam, trồ tiah niam, ù tiah ƀươn, kòn bơnus dồ nùs bal, ală bơta kờñ mờ tơl neh bơtòm tơrgùm bal nàng 2 sàh rƀah Mường Hoong, Ngọk Linh brồ guh.

“Mờ bơta tơrgùm kràñ cê jơh nùs bơh jơh ală anih lơh broă cíñ trị dê, làng bol ờ mìng lik klàs rƀah lơm mờ gam gơtùi lơh pas tai, lơh pas tàm ƀòn tờm he dê tơn bơh ală broă lơh tơrlòng lài lơh sa. Gùng dà di, kwang bàng kràñ cê jơh nùs mờ geh bơta mŭt bal, dong kờl bơh jơh ală anih lơh broă cíñ trị dê, is ồn là ală cau bơcri priă, ală cau mpồl lơh sa kă bro den ngan ngồn rài kis làng bol dê rơ̆p tam gơl”.

Ai Jơnau lơh nền tàm pơrjum bơh Pơrjum dờng Đảng dê, ai Jơnau sồr bơh Mpồl Đơng lam Đảng dê mŭt tàm rài kis mùl màl, càr Kon Tum neh lơh gơtùi tàm broă lơh tơn jơh jơgloh, tơrmù rƀah tàm 2 sàh rƀah ngan rlau jơh càr dê là Mường Hoong mờ Ngọk Linh, kơnhoàl Đăk Glei. Gùng dà di, kwang bàng, đảng viên mŭt lơh bal kràñ cê jơh nùs, rài kis làng bol gam rơhời hờm ram. Tam gơl bồ tơngoh kơlôi sơnơng, bơta mờng sơnơng, bơta mờng lơh, khin cha càn priă, pin dờn bơcri priă tam gơl rơndăp tăp sèng chi tam là jơnau tờm kwơmàng ngan nàng cau Sơdàng tàm tiah bơnơm jơnhoa do klàr bơh rƀah. Mờ ală broă lơh tơrlòng lài lơh sa geh cồng nha jăt tàm bơta ƀươn geh lài bè ù tiah, nhơm trồ tiah, tờm kơphê, tờm chi lơh sơnơm, is ồn là kơnuh sơnơm Ngọc Linh, neh mờ gam rề ơnàng lơh uă là bơnàng jă kơ̆ kơl jăp dong làng bol pin dờn klàs bơh rƀah mờ kơlôi tus lơh pas.

Bơh cồng nha lơh geh mờ mờng chài mùl màl tàm broă lơh tơn jơh rƀah tàm 2 sàh Mường Hoong, Ngọk Linh, Tỉñ ủy càr Kon Tum gam pơn jăt tai rề ơnàng lơh uă broă lơh bal mờ broă dong 57 thôn tàm 8 sàh kal ke ir ndai bơh càr dê. 58 anih lơh broă, mpồl lơh broă neh geh jàu kơnòl loh làng nàng dong kờl tơl thôn tơn jơh rƀah, bơtàu tơngguh lơh sa- mpồl bơtiàn.