Gơl gùng bơh sàh Đăk Tơ Ve lòt sàh Hà Tây, kơnhoàl Chư Păh geh lơh bơh priă ai bơh priă Broă lơh 1719, neh tam gơl jơh broă lòt rê bơh làng bol tiah do dê. Lài do, gơl gùng do sùm gơtìp tơrlah tàm kàl mìu, lơh kal ke ai broă lòt rê mờ jun pơndiang phan kă bro. Mơya mờ bơta bơcri priă lơh ơnàng, gơl gùng jòng 10 kơi sồ mờ ơnàng 5 thơk nggùl neh geh lơh sir, neh dong làng bol tàm sàh kal ke ngan rlau jơh kơnhoàl dê jun pơndiang phan lơh geh bơh sươn sre ƀươn soh, dong kờl bơtàu tơngguh lơh sa. Bal mờ hơ̆, Broă lơh 1719 tàm pe nam do neh cèng wơl ală tam gơl loh làng bè lơh sa- mpồl bơtiàn ai kơnhoàl Chư Păh in. Khà hìu rƀah tàm kơnhoàl neh gơmù 3,82% pơndrờm mờ nam 2021 kơnờm tàm ală broă lơh dong kờl bơh ală rơndăp broă lơh mờ Broă lơh Jơnau kờñ Dà lơgar dê. Ồng Luyện Ngọc Toàn, Lam bồ Cơldŭ Jơi bơtiàn kơnhoàl Chư Păh, pà gĭt: “Mờ kờp jơh priă bơcri 143 tơmàn đong lam lơh ală rơndăp broă lơh, geh bal jơh ală broă lơh sa- mpồl bơtiàn, lơngăp lơngai cíñ trị. Broă lơh neh gơdờp tơn tus rài kis phan bơna mờ nùs nhơm bơh làng bol jơi bơtiàn dồ êt nă cau dê, cèng wơl ală hìu đam niam tre, niam bơnĕ ngan ai cau rƀah in, cèng wơl dà sàng goh ai làng bol in; bơto bơsram, lơh sơnơm, bơto broă lơh, sền gàr rài kis mpồl bơtiàn ngai sơlơ geh sền gròi”.

Ndrờm bè hơ̆ sơl, tàm kơnhoàl Phú Thiện, Broă lơh 1719 neh cèng wơl ală cồng nha pal cih dờp tàm broă lơh niam rlau phan bơna mờ tơngguh uă bơta niam rài kis làng bol dê. Gơnoar ătbồ tiah do neh tơrgùm bơcri priă tàm ală gơl gùng lòt ală sàh, ală bơtơ̆t rbòng dà drơng tàm rài kis mờ broă lơh sa, ai tơl bơta ƀươn ai lơh sa broă lơh sa sươn sre in mờ lòt rê. Is ồn, ală broă lơh tơrlòng lài lơh sa bè tam chi sa plai mờ ròng phan ròng jăt gùng dà kơ̆ kơl jăp neh dong gĭt nđờ rhiang hìu làng bol lơh geh priă jền sùm. Kơnờm tàm bơta dong kờl bơh ală rơndăp broă lơh dê, khà hìu rƀah tàm kơnhoàl neh gơmù bơh 13% gam 7,5%. Ồng Nguyễn Anh Tuấn, Kwang bàng Huyện ủy kơnhoàl, Phó Củ tịc Anih duh broă Làng bol kơnhoàl Phú Thiện pà gĭt: “Anih duh broă Làng bol kơnhoàl Phú Thiện neh tă pơgồp jơnau đơs ai Mpồl lơh kơnòl broă sùm Huyện ủy kơnhoàl in, lơh broă rơndăp lơh lam lơh jăt loh làng. Ală anih lơh broă lơh kơnòl broă ờs mờng mờ cơldŭ mpồl neh lơh loh làng ală broă rơndăp lơh nền cê nàng lam lơh. Tơnơ̆ 03 nam lam lơh, kơnhoàl neh ai priă geh 45 tơmàn đong, geh mờr 50%”.

Tàm pe nam lam lơh Broă lơh 1719, càr Gia Lai neh lơh geh uă cồng nha pơnrơ ngan, tus tŭ do, càr neh lơh sir jơh 12 tàm 31 broă jàu, sơrlèt halà lơh geh broă rơndăp lơh neh ai. Is ồn, broă lơh ơm kis lơh sa kơ̆ dồ bă tiah mờ rơndăp tăp sèng kơ̆ kơl jăp hìu làng bol ntrờn ơm kis bơdìh rơndăp ù tiah geh 97%, sơrlèt 2% pơndrờm mờ broă jàu. Khà thôn, ƀòn geh gùng rơndeh ô tô tus tiah tờm geh lơh mờ sơmăng geh 100%, dong tàm tơrbŏ ală kơnhoàl ù tiah kal ke. Rlau 97% hìu làng bol jơi bơtiàn dồ êt nă cau geh ngui dà ngui sa tơl bơta sàng goh. Rlau 98% thôn geh hìu pơrjum mpồl bơtiàn, mờ rlau 80% thôn bơyai lơh ală broă lơh niam chài, đơs crih tam ya niam. Khà hìu rƀah tàm làng bol jơi bơtiàn dồ êt nă cau gơmù gam mờr 13%, gơmù 4,3% pơndrờm mờ nam 2021. Ồng Trường Trung Tuyến, Phó Mpồl Jơi bơtiàn càr Gia Lai pà gĭt, tàm tơngai tus, ală kâp ủy pal pơn jăt tai lơh jăt niam gơnoar broă đơng lam, sồr lơh jơh nùs jơh tồr nàng broă lơh pơn jăt tai cèng wơl cồng nha dipal mờ bơta geh ngan tàm rài kis, dong làng bol jơi bơtiàn dồ êt nă cau bơtàu tơngguh kơ̆ kơl jăp: “Tơngai tus là tŭ tơngai kwơmàng, kờñ bơta lơh bal bơh ală kâp ủy gơnoar ătbồ ƀòn lơgar ală kâp dê. Bè đah mpồl Jơi bơtiàn pơn jăt tai tă pơgồp jơnau đơs mờ Anih duh broă Làng bol càr kờp sền nền wơl ală broă tơngai do neh lam lơh gam gơkòl nàng tă bơsong, lơh ngan hòi tơrgùm bal mờ jơnau đơs dà lơgar mờ làng bol lơh bal nàng bơta pràn dơlam is làng bol jơi bơtiàn dồ êt nă cau dê geh lơh niam”.