Ală ngai do, tàm ƀòn phan ù buh Prum Bình Đức, xã Phan Hiệp, kơnhoàl Bắc Bình, càr Bình Thuận, nùs nhơm lơh broă bơh ală hìu bơnhă lơh phan ù buh dê mhar ngan, bơh broă rcang phan lơh, mòn lơh rùp hin tus broă buh phan ù buh.

Mò Lương Thị Hòa, ơm tàm thôn Bình Tiến, xã Phan Hiệp, kơnhoàl Bắc Bình chờ hờp pà gĭt, bơh tŭ ntrờn tus lơh phan ù buh lơh mờ tê niam ngan, phan bơna ù buh bơh hìu bơnhă mò dê geh uă cau kờñ rlau, ngan là năc lòt nhơl. Mò Hoà pà gĭt tai, phan ù buh lơh mờ tê niam ngan tàm do geh uă rùp rài, bè: kòp long quy, linga yoni, kwơ̆ dà Bình Thuận, kwơ̆ Prum, ƀìñ bơkào, plung, ka ti...

Tơl phan bơna phan ù buh bơh hìu bơnhă mò dê lơh gơlik geh bơta dờng dimơ mờ dềt, gơtùi ơn tàm kơldung ià, halà ba-lô, ƀuơn ngan ai năc lòt nhơl in: “Pah nam lòt ràng tơlik 4 dơ̆ tàm tiah tềl lời wơl kwơ̆ Pô Sah Inư, ƀòn dờng Phan Thiết tàm ală dơ̆, bè: sa tềp bơhiàn Dà lơgar, Sa tềp Tây, 30/04 mờ 2/09. Ai ală bơta phan do là tiah resort tàm Mũi Né dan blơi mờr 200 nơm. Tàm tơngai sa tềp bơhiàn Dà lơgar mờr tus, añ lòt ràng tơlik phan lơh ù buh pơgăp bơh 4 tus 5 ngai tàm Mũi Né. Khi dan blơi phan pah dơ̆ bơh 3 tus 4 tơlak đong bơta phan dềt (bơh 100 rơbô đông tus 150 rơbô đông dùl phan bơna), ai phan dờng dimơ bơh 350 rơbô đông dùl nơm, pah dơ̆ lòt tăc, tăc geh mờr 30 phan bơna, geh rlau jơ̆t tơlak đông”.

Tơngăc mờ ƀòn lơh phan ù buh Prum xã Phan Hiệp, bol añ jòi tus anih lơh gơlik poăc kơnrồ ìs dồ ngai tàm xã Phan Hoà, dùl xã mìng là làng bol kòn cau Prum lơm bơh kơnhoàl Bắc Bình dê. Bi Bá Hữu Nhi, cau tờm anih do dê gam ờ ru ngan mờ broă tah poăc, ai pơ ùr gam ai poăc lòt ìs. Bi Nhi pà gĭt, lài do hìu bơnhă bi ai poăc bơh tiah lơh poăc den pơdiang lòt tăc, gŏ kal ke uă ir den tàng kơlôi tus lơh broă ndai.

Bơh chờm mìng ìs bàr pe kĭ ai làng bol tàm ƀòn in lơm mơya gŏ tăc geh den tơnguh rơhời tus bơh 10 tus 20 kĭ dùl ngai mờ kung tăc jơh sơl. Bè hơ̆ sùm, khà phan bơna hời rơ hời tơnguh pah nam. Bi Nhi pà gĭt, kờñ poăc kơnrồ ìs dồ tơngai bơkah den broă sơn rờp ngan pal rơwah poăc pa bơkah ngan, tơnơ̆ hơ̆ broă bơrlŭ bal mờ ală phan tĕ mờ ìs. Kwơ màng ngan rlau jơh là pal gàr niam bơta sàng goh phan ngui sa phan bơna dê, phan bơna lơh gơlik pal sàng goh. Jat tơl bơta poăc mờ giă tăc kung krơi is sơl, lơyah ngan rlau jơh là 400 rơbô đông dùl kĭ mờ jơnhoa ngan rlau jơh là 650 rơbô đông dùl kĭ.

Tŭ do hìu bơnhă bi neh dờp geh uă sră dan blơi phan tàm tơngai sa tềp bơhiàn Dà lơgar 2025 dê. Bi Nhi pà gĭt: “Mut tàm nhai 12 he do, pơgăp bơh ngai 10 , pah ngai pal tah mờr 1 tạ poăc, mờr tus sa tềp Dà lơgar cau dan blơi uă añ tah poăc mờr 2 tạ. Cau blơi tiah lơi añ jàu tus tiah hơ̆. Tŭ do geh sră dan blơi 90 kĭ, ngai 22 nhai 01 do jàu, añ gơtùi lơh lài bơh 1 tus 2 ngai kung geh. 90 kĭ poăc kơnrồ dồ ngai den kờñ geh mờr 2 tạ poăc ris".

 Bơta pal đơs tàm do là phan bơna poăc kơnrồ is dồ ngai bơh hìu bơnhă bi Bá Hữu Nhi, tàm  thôn Bình Minh, xã Phan Hòa phan ù buh bơh hìu bơnhă mò Lương Thị Hòa ơm tàm thôn Bình Tiến, xã Phan Hiệp pa lơh geh phan bơna OCOP 3 sơrmañ.

Jat Anih Duh broă Làng bol kơnhoàl Bắc Bình, jat tàm ală jơnau đơs nền nòn, ai điềm tơl tơngume, tơl broă jàu, Mpồl Duh broă đơs là, tam pà khà phan bơna OCOP bơh kơnhoàl dê neh dờp 4 phan bơna lơh geh phan bơna OCOP 3 sơrmañ kấp kơnhoàl nam 2024, tàm hơ̆ geh Poăc kơnrồ ìs dồ ngai Hữu Nhi (hìu bơnhă bi Bá Hữu Nhi) mờ ală phan ù buh Prum Sơn Hoà (hìu bơnhă mò Lương Thị Hoà). Do là ală phan bơna ƀòn lơgar pơnrơ ngan tàm tiah do dê, geh ală cau tờm sền gròi tơnguh uă bơta niam, li la bè rùp mòn, gàr niam tơl ală bơta, jơnau sồr bè tiah tờm lơh gơlik.

Tàm nam 2024, ală tiah neh bơyai lơh sền wơl tam pà khà ai 48 phan bơna OCOP sền wơl mờ rlau 100 phan bơna tus bal dơ̆ sơnrờp. Tus lồi nam 2024, kờp jơh phan bơna OCOP gam lơh jat tàm jơh gùt càr Bình Thuận là 242 phan bơna, tàm hơ̆ geh 16 phan bơna OCOP 4 sơrmañ, 224 phan bơna 3 sơrmañ mờ 2 phan bơna geh bơta ƀuơn lơh geh 5 sơrmañ.

Ồng Nguyễn Hữu Phước, Phó Lam bồ Sở Broă lơh sa suơn sre mờ Bơtàu tơnguh Ƀòn lơgar- Phó Củ tịc Mpồl duh broă sền sơwì, tam pà khà phan bơna OCOP càr Bình Thuận pà gĭt, bơh broă lơh OCOP, ală phan bơna neh geh uă tam gơl bè bơta niam, kơldung ơn phan, mat tiah lơh gơlik, mpồl sền gĭt mat kă bro lơh broă sa: “Broă lơh OCOP- tơl xã dùl phan bơna là ală phan bơna geh bơta ƀuơn bơh kơnhoàl ù tiah, ală tiah mờ tàm bơrlŭ bal tàm hơ̆ là niam chài ală tiah dê, den tàng geh bal phan bơna OCOP là jơnau yal phan bơna. Bơdìh mờ sa ală phan bơna gam sền gĭt bơta niam chài ù tiah bơh tiah do dê. Añ dong kờl làng bol nàng lơh loh jơnau yal hơ̆ dê, mơya lài ngan là sàng goh phan ngui sa, pal geh tơl jơnau sồr”.

Dilah bè lài do, phan bơna phan ù buh ƀòn Prum tàm xã Phan Hiệp halà poăc kơnrồ ìs dồ ngai tàm xã Phan Hoà, kơnhoàl Bắc Bình, càr Bình Thuận mìng ơm gùt dar ală ƀòn Prum mờ tăc ai ală cau kă bro in lơm, mơya tŭ do ală phan bơna do neh geh “sơrmañ” OCOP cơnđoà lik bơh ƀòn, rcang lòt mut tàm ală đại lý tàm jơh gùt tiah tàm càr mờ bơdìh càr dê.

Ală ngai do, tiah buh phan ù buh tàm ƀòn Prum Bình Đức kung gam hơng ồs; ală dra ìs poăc bơh hìu bơnhă bi Bá Hữu Nhi bềng ală poăc kơnrồ, pơrgon dùl tơngai sa tềp ram mhŭ tus mờ ală ƀòn Prum tàm Bình Thuận dê.