Pơrjum dờng neh pồ geh Mpồl Đơng lam tơngai lơh broă pa. Ồng Lương Quốc Đoàn pơn jăt tai geh pin dờn tơnpồ at gơnoar broă Chủ tịch Mpồl Làng bol lơh broă sa Việt Nam khoă IX. Mŭt tàm tơngai lơh broă pa, Mpồl tam gơl pràn bơh lam lơh tus mờ lơh broă bal tơn, ai jơnau kờñ tơmŭt tai 500 rơbô nă cau, dong kờl lơh geh 5 rơbô mpồl lơh sa kă bro lơh sa suơn sre mờ rơcang lài jơnau git wă sồ ai ờ uă ngan 70% cau tàm mpồl in.

Pơrjum dờng neh ring bal ală gùng dà broă lơh pràn nàng bơ̆t bơtàu mpồl làng bol lơh broă sa jăk, lơh pràn lơh sa suơn sre tơlir mờ tam gơl sồ, ai geh tơngu me tờm kơl jăp nàng ai phan geh lơh bơh broă lơh sa suơn sre lơgar Việt Nam dê ndrờm bal mờ ală lơgar. Đơs tàm dơ̆ đơng lam Pơrjum dờng, ồng Trần Cẩm Tú, Kwang bàng Bộ Chính trị, Duh broă sùm Mpồl Đơng Lam Đảng Dà lơgar pin dờn: Tàm tơngai lơh broă pa mờ wèt tus tơnkah 100 nam crơng gơs Đảng Cộng sản Việt Nam, mpồl làng bol lơh broă sa tàm ală kấp mờ broă lơh làng bol lơh broă sa Việt Nam di gơlan rơ̆p geh broă lơh bơtàu tơnguh pràn, lơh geh ală cồng nha dờng màng, pơgồp bal tàm broă lơh geh cồng nha Jơnau lơh nền tàm Pơrjum dờng dơ̆ XIV Đảng dê, bơ̆t bơtàu dà lơgar ring lơngai, krơi is, làng bol lơh tờm, pas gơs, pràn kơl dang, gơguh jăk mờ gơboh gơbài.