Càr Dăk Lăk (tơnơ̆ tơmŭt bal mờ càr Phú Yên) geh bă ù ơnàng rơlao 18 rơbô kơi sồ, khà kờp làng bol rơlao 3 tơlăk 34 rơbô nă, pờ geh bơta dờng ơnàng bơtàu tơnguh pa mờ gơnoar tơrbŏ bal Tây Nguyên mờ tiah Jăt gah dà lềng đah Jum tàm Gùl lơgar. Broă lơh wơl Broă rơndăp ù tiah càr Dăk Lăk tơngai bơh nam 2021 tus 2030, wèt tus nam 2050 geh ai nàng sền wơl bơta pràn ù tiah lơh sa, ù tiah cíñ trị càr dê; mờ lơh geh cồng nha ală dơ̆ niam pơgồp bal tiah, tơrgùm bal mờ ală lơgar. Ală jơnau kờñ, gùng dà broă lơh nàng bơtàu tơnguh geh sền wơl jăt gùng dà broă lơh ndrờm bal, di pal đah ală gah, broă lơh bal mờ càr dê, gơdờp bal mờ bơta pràn mùl màl, wèt tus jơnau kờñ gơguh lơh sa bơh 11 tus 11,5% tàm tơngai bơh nam 2026 tus 2030.

Jăt Phó Cau pơgru dờng, Tiến sìh Lê Xuân Bá, Kwang lam bồ Anih lơh broă kơlôi sơnơng atbồ lơh sa Dà lơgar lài do đơs, bơtàu tơnguh lơh sa mờ măi mok pal geh sền là broă ai lài ngan tàm broă lơh wơl broă rơndăp ù tiah càr dê. “Broă rơndăp ù tiah bơtàu tơnguh lơh sa mờ măi mok càr Dăk lăk dê ờ hềt sền gròi di mờ jơnau geh ai. Di gơlan tàm tơngai pa do mờ tàm bơh 2 tus 3 nam tus, càr Dăk Lăk kal ke bơtàu tơnguh lơh sa mờ măi mok di mờ jơnau kờñ, do là mùl màl ngan, mơya do là broă rơndăp ù tiah tơngai bơh nam 2021 tus 2030 mờ wèt tus 2050, den càr Dăk Lăk pal geh ai bơta tờm bơtàu tơnguh lơh sa mờ măi mok. Tài kờñ gơguh pas den pal rơndăp ù tiah bơtàu tơnguh lơh sa mờ măi mok tàm khà gơdờp bal”.

Pơgồp jơnau đơs ai broă rơndăp ù tiah càr Dăk Lăk in, uă cau jăk, cau atbồ mờ ală mpồl lơh sa kă bro kung đơs là, broă rơndăp ù tiah pal lơh loh rơlao broă pơgồp bal tiah, phan bơna mờ bơta pràn gơguh lơh sa đah Tây Nguyên mờ tiah Jăt gah dà lềng đah Jum tàm Gùl lơgar. Mờ tơnguh broă tơrbŏ bal tiah bơh phan bơna gùng lòt kwơ màng, logistics, anih ơhò dà lềng ơm, mpồng nhàr dà lơgar mờ lòt nhơl pơgồp bal mờ prăp gàr niam chài bơh yau.

Phó Pơrgu dờng, Tiến sìh Nguyễn Thị Phương Trâm, Kwang lam bồ Anih lơh broă kơlôi sơnơng Niam chài Việt Nam geh jơnau pơgồp bal nàng càr Dăk lăk lơh geh bơta kwơ màng bơtàu tơnguh lòt nhơl ai bơh tàm bơta tờm prăp gàr mờ ngui bơta kwơ niam chài càr dê. “Tàm broă rơndăp ù tiah mờ lơh wơl broă rơndăp ù tiah, he pal sền gròi rơlao tàm bơta niam chài ală jơi bơtiàn dê. Do là bơta tờm kwơ màng ngan, lơh geh bơta krơi is niam chài càr Dăk Lăk đơs is mờ Tây Nguyên đơs bal. Tơl bơta kwơ, tơl bơta krơi is niam chài jơi bơtiàn ndrờm geh dùl bơta niam chài krơi is nàng mpồl bơtiàn ơm kis, gàr ròng tiah kis naim chài hơ̆ nàng bơtàu tơnguh mờ prăp gàr”.

Iăt dờp jơnau bơh ală jơnau đơs pơgồp bal jơh nùs, geh kwơ bơh ală cau jăk, cau atbồ, mpồl lơh sa kă bro tàm pơrjum bơyai, kwang đơng lam càr Dăk Lăk pà git rơ̆p pơn jăt tai sền wơl, tơrgùm jơh ală bơta geh, bơta pràn kung bè ală bơta gam ờ pràn nàng lơh gơs gùng dà bơtàu tơnguh di pal mờ tơngai pa tơmŭt bal. càr Dăk Lăk ai broă lơh wơl rơndăp ù tiah pal geh lơh nền nòn, ndrờm bal, gàr niam broă ngui jơh bơta geh nàng gơguh lơh sa, tơnguh broă pơgồp bal tiah mờ ngui geh cồng nha ală bơta pràn bơtàu tơnguh. 

Jăt ồng Đỗ Hữu Huy, Củ tìk Anih duh broă Làng bol càr Dăk Lăk đơs, broă lơh wơl broă rơndăp ù tiah rơ̆p gờñ geh yal Mpồl duh broă Làng bol càr in sền, kĭ tàm tơngai tus. “Anih duh broă Làng bol càr sồr ală sờh, gah lơh broă, ală sàh sơnah ƀòn, anih lơh broă gơrềng bal mờ mpồl lơh broă pơlam tơrgùm bơta pràn, iăt tơl ală jơnau đơs pơgồp bal bơh ală cau ala măt dê nàng lơh sră nggal broă rơndăp ù tiah di mờ jơnau geh ai. Mờ càr kung kơ̆p kờñ pơn jăt tai dờp geh ală jơnau đơs pơgồp bal bơh ală cau jăk, cau chài mờ kwang đơng lam càr ală rài lài do tàm tơngai tus”.