Anih duh broă Làng bol càr Dăk Lăk pa bơyai lơh dơ̆ pơrjum sền wơl tơngai lơh ală kơnòl broă jăk chài, măi mok, tam hơl oa bơceh lơh mờ tam gơl sồ tàm càr do, tơrgùm bơsong kal ke nàng gàr di tơngai lơh ală kơnòl broă neh geh ai. Tơngai bơh nam 2023 tus 2026, càr lơh 21 kơnòl broă jăk chài mờ măi mok kấp càr mờ kờp jơh priă tă lơh rơlao 37 tơmàn đong, tơrgùm tàm broă lơh sa suơn sre măi mok pa, lơh, phan lơh sơnơm mờ tam gơl sồ. Bơh nam 2021 tus tŭ do, càr kung neh lơh 19 rơndăp broă lơh lơh tờm mờ măi mok yal tơngit mờ phan bơna sồ. Mìng is nam 2026, càr ai di pơgăp 300 tơmàn đong nàng lơh ală rơndăp broă lơh pa bè lơh niam wơl phan pơrjum pờ tơlik tàm internet kấp sàh, lơh jăt sồ jơh sră nggal prăp gàr mờ lơh geh tơngu me tờm jơnau yal tơngit sồ drơng broă đơng lam, lam lơh sền gàr lơngăp lơngai.

Mò Hồ Thị Nguyên Thảo, Phó Củ tịc Duh broă sùm Anih duh broă Làng bol càr Dăk Lăk sồr ală sờh, gah lơh broă, ală sàh, sơnah ƀòn ai loh làng bơnòl broă, tơrgùm bơsong tiah gơkòl, tơnguh uă bơta niam cau lơh broă bal mờ lơh geh uă ală broă lơh geh cồng nha. “Tơl gah lơh broă, tơl kấp pal ai geh kơnòl broă lơh jăt Jơnau lơh nền tàm pơrjum sồ 57 bơh gah lơh broă tờm dê mờ geh broă rơndăp lơh nền nòn tàm tơngu me 8 jơnau dờng bè jăk chài măi mok, tam hơl pa bơceh lơh Tỉñ ủy neh ring bal, Mpồl sồr lơh neh ring bal mờ Anih duh broă Làng bol càr neh jào. Bơdìh mờ ală kơrnoăt dong kờl bơh Dà lơgar dê den pal geh ală kơrnoăt broă lơh lơi nàng dan Mpồl duh broă làng bol lơh geh, ai lài bè phan bơna jăi mok yal tơngit, phan lơh broă ai ală sàh, sơnah ƀòn in. Sền gròi pah poh ală kơnòl broă geh jào mùl màl ndrờm pal geh tơngai lơh, broă rơndăp lơh nền nòn ală khà broă”.

Gơrềng tus mờ kơnòl tam gơl sồ, Sờh Jăk chài mờ Măi mok càr Dăk Lăk pa lơh broă mờ Hìu bơsram Đại họk Tây Nguyên, ring bal lơh pràn broă bơto thạc sìh, tiến sìh tàm ală gah broă măi mok yal tơngit, mờ măi mok siñ họk; pơgồp bal bơto mờ kơlôi sơnơng, bơsram lơh tàm ală anih lơh broă măi mok càr dê. Tiến sìh Đinh Hữu Hùng, Kwang lam bồ gah Y Dược, Hìu bơsram Đại họk Tây Nguyên đơs là ală tơngu me kơlôi sơnơng pal lơh jăt di mờ bơta krơi is càr dê nàng cèng geh cồng nha mùl màl ai làng bol in. “Añ kơlôi là ală tơngu me kơlôi sơnơng tus do, di lah bè Sờh Jăk chài Măi mok kờñ mờ hìu bơsram dê, pal lơh jăt di tàm ală bơta krơi is. Mờ uă ngan là tơnơ̆ mờ tŭ tơmŭt bal den kung pal lơh jăt di tàm ală bơta krơi is tàm tiah đah măt tơngai Lik càr dê tai. Mờ tàm hơ̆ geh ală tơngu me mờ tŭ do tàm Jơnau lơh nền tàm pơrjum sồ 72 kung đơs tus bè broă lơh wơl ha là bơtàu tơnguh gơwèt mờ gah lơh sơnơm. He lơh jăt tàm hơ̆ den rơ̆p cèng geh bơta kwơ mùl màl ai làng bol in rơlao”.

Jăt ồng Phạm Gia Việt, Phó Kwang lam bồ Sờh Jăk chài mờ Măi mok càr Dăk lăk đơs, broă lơh jăt Jơnau lơh nền tàm pơrjum sồ 57 rơ̆p ai geh jơnau kờñ uă rơlao bè broă bơto cau lơh broă nàng drơng tàm broă tam gơl sồ mờ bơtàu tơnguh lơh sa mpồl bơtiàn. “Tàm Jơnau lơh nền tàm pơrjum sồ 57 den tam gơl sồ mờ bơto kwang bàng bè tam gơl sồ tơngai tus rơ̆p lơh pràn tơngu me do. Mờ uă ngan là tàm broă rơwah ală tơngu me nàng pơgồp bal tàm broă bơtàu tơnguh lơh sa mpồl bơtiàn, pơgồp bal tàm broă ai gơguh lơh sa geh jăt jơnau kờñ bàr sồ càr Dăk Lăk dê”.

Bal mờ hơ̆, Mpồl atbồ Tiah lơh sa suơn sre ngui măi mok pa ƀòn dờng Hồ Chí Minh dê pơgồp bal mờ Sờh Jăk chài Măi mok càr Dăk Lăk lam lơh dơ̆ Pơrjum “Mŭt lơh broă tam gơl pa bơceh lơh tàm gah lơh sa suơn sre ngui măi mok sồ nam 2026” tiah Tây Nguyên mờ tơngu me “Lơh sa suơn sre gơlòt bal – Bơceh lơh rài tơnơ̆ do tơlir”. Dơ̆ pơrlòng wèt tus jòi geh ală broă ngui măi mok sồ, lơh broă is mờ măi mok siñ họk nàng tơnguh uă bơta kwơ phan geh lơh bơh broă lơh sa suơn sre dê, bơtàu tơnguh lơh sa suơn sre kơl jăp. Khà dùl ai cau dùl nă să, mpồl lơh sa kă bro in geh kờp jơh geh 150 tơlăk đong; ală rơndăp broă geh bơta pràn gam geh dơ̆ niam nàng dờp broă dong kờl uă ngan 400 tơlăk đong nàng bơto bơtê mờ bơtàu tơnguh.

Ồng Nguyễn Thanh Hiền, Phó Kwang lam bồ Mpồl Atbồ Tiah broă lơh sa suơn sre ngui măi mok pa ƀòn dờng Hồ Chí Minh pà git dơ̆ pơrlòng là dơ̆ niam tơrbŏ bal bơta pràn đah ƀòn dờng Hồ Chí Minh mờ ală càr Tây Nguyên dê, lơh pràn bơta niam tam gơl pa bơceh lơh tàm broă lơh sa suơn sre. “Tàm tơngai tŭ do, gơwèt mờ Jơnau lơh nền tàm pơrjum sồ 57 den he geh tơl bơta ƀuơn ngan tàm broă lơh pràn ngui jăk chài măi mok, mờ tàm hơ̆ geh ală gah bè lơh broă is tàm broă lơh sa, hơ̆ sồng ngui AI, hơ̆ sồng màh tiah tam nàng tơnguh uă bơta niam phan geh lơh tàm broă lơh sa suơn sre dê. Den tàng bol añ pơgồp bal mờ Sờh Jăk chài mờ Măi mok càr Dăk Lăk bơyai lơh lam pơrlòng tiah do nàng jòi geh ală broă lơh niam nàng bơh tŭ hơ̆ pơn jăt tai dong kờl ală càr tàm do bơtàu tơnguh, tơnguh uă rơndăp broă lơh bơh să tờm dê, tàm hơ̆ uă ngan là ngui uă tàm mùl màl nàng crơng gơs ală mpồl lơh sa kă bro pràn nàng tơnguh uă bơta niam phan geh lơh bơh broă lơh sa suơn sre dê tŭ tơnhào mờ tăc mờ lơgar bơdìh”.

Mờ broă lơh pràn ngui jăk chài măi mok, tam gơl pa bơceh lơh mờ tam gơl sồ, càr Dăk Lăk bal mờ ală càr tàm Tây Nguyên dê gam rơhời lơh geh bơta pràn pa ai gơguh lơh sa in, pơgồp bal tàm broă lơh jăt mùl màl jơnau kờñ bơtàu tơnguh mhar, kơl jăp tàm rài brồ să bơh dà lơgar dê.