Drim òr (21/05), Anih duh broă làng bol càr Lâm Đồng bơyai lơh sền wơl broă lơh sa mpồl bơtiàn nhai 5 nam 2026, lơh jăt kơnòl tờm tàm tơngai tus. Tềng đăp mờ bơta uă sàh, sơnah ƀòn mờ tiah is ồn geh khà bơcri priă dà lơgar kấp sàh ờ uă ngan, Anih duh broă Làng bol càr Lâm Đồng sồr ală sàh, sơnah ƀòn, tiah is ồn lơh mhar broă bơcri priă, lơh ngan tus ngai 30 nhai 6 geh ờ uă ngan 40% broă rơndăp geh ai.

Nam 2026, kờp jơh priă bơcri dà lơgar jào ai kấp sàh càr Lâm Đồng in rơlao 1 rơbô 320 tơmàn đong. Mơya tus tŭ do mìng rơ̆p bơcri priă geh rơlao 126 tơmàn đong, geh di pơgăp 11%, ờ uă rơlao mờ jơnau hơ 18%. Pal kah ngan, kung gam 10 sàh, sơnah ƀòn geh jào priă uă mơya ờ hềt bơcri. Jăt jơnau đơs bơh ală gah lơh broă geh gơnoar dê, geh bơta do tài mìng broă sồr lơh ờ pràn, bơta pràn kwang bàng ờ uă, sră nggal bơcri priă gam jŏ jòng mờ gơkòl tơm ntrờn ù tiah. Củ tịc Anih duh broă làng bol càr Lâm Đồng ồng Hồ Văn Mười sồr ală sàh, sơnah ƀòn, tiah is ồn bơsong kal ke, geh ù tiah tus tàm tiah lơi den lơh broă mờ bơcri priă tus tàm tiah hơ̆.