Tàm dơ̆ tìp mat lơh kwèng, jơnau yal bơh cau ling yau Sùng A Dê, kòn cau Mông ơm tàm sàh Văn Chấn, càr Lào Cai, neh lơh uă cau ki ngàm ngan tài bơh broă bi dong kờl làng bol lik klàs rƀah tàm ală tiah kơh bơnơm lŭ ro kơnrañ, tơrlah ù gùt nam. Jơh tơngai lòt ling bơh Sư đoàn 316 (Ling tiah 2) nam 2010, tơnơ̆ tơngai jòi gĭt, bi khin cha ai sơntìl ƀăng gle Bát Độ rê tam tơrlòng lài tàm bă ù ơnàng 15 lồ. Tơnơ̆ 2 nam, ƀăng sơnđờm ai tơnhào, lơh geh priă jền sùm, mơkung dong gàr ù, tơrmù ƀà siar ù tàm ală dòr bơnơm. Bơh broă lơh bơh sơn rờp, tus tŭ do, bă ù tam ƀăng gle Bát Độ tàm tiah do dê neh geh gĭt nđờ jơ̆t nă cau tàm mpồl cau ling yau lơh jat bal, mờ tơrgùm gơ gơs Mpồl lơh broă bal ƀăng gle Bát Độ, lơh bal lơh sa mờ bàr pe hìu măi tàm càr dê. Cau ling yau Sùng A Dê neh geh Thủ tướng Cíñ phủ cih dờp mờ pà Ƀằng khen tài bơh geh cồng nha pơn rơ jak tàm broă bơsram mờ lơh jat bồ tơngoh, nùs nhơm, broă lơh mờ rài kis Hồ Chí Minh dê.

“Bơh nam 2021 tus tŭ do, bol añ bơtàu tơnguh geh 50 lồ. Bol añ kĭ hơ mờ ală kông ty tàm càr Lào Cai, ring bal blơi jơh phan bơna jŏ tơngai, geh phan bơna là cau rơ̆p blơi”.

Ai tàm sơnah ƀòn Bắc Nha Trang, càr Khánh Hòa, cau ling yau Nguyễn Văn Dũng (deh nam 1966), cau ling sồt să 2/4, den lơh cau ndai ngoh rơngăc tài bơh nùs nhơm cau ling bal dê. Neh lơh broă tàm Mpồl ling dờng dimơ 146, Tiah 4 Ling dà lềng, geh tŭ tơngai jòng lơh kơnòl broă tàm bồt Gạc Ma, sồt să 61%, mơya ồng kung gam bal mờ cau ling bal lòt lùp còp ală hìu bơnhă cau ling sồt să, cau ling chơ̆t màng, kah ưn ngài ală cau ling neh chơ̆t phi să tàm ală dơ̆ tơngkah kir sơnrai, ngai 27/7 halà dơ̆ sa tềp. Bơh tŭ jơh tơngai lòt ling, ồng kung bal mờ ală cau ling yau tàm ƀòn lơgar lơh jat broă lơh “Dong kờl oh lòt bơsram”, dờp dong kờl uă kơnòm bơsram kòn đời, rài kis kal ke bơh kấp 1 tus jơh kấp 3. Uă oh kơnờm bơta dong kờl hơ̆ neh geh ală bơta pơn jat tai geh lòt bơsram, geh tŭ tơngai niam tam gơl rài kis. Cau ling yau Nguyễn Văn Dũng pà gĭt:

“Wa Hồ neh geh jơnau đơs “cau ling kòp tê jê să lơbơn ñam ño mơya ờ kuĕt ờ”. Neh cèng nùs nhơm Cau ling Wa Hồ den añ sền bơta hơ̆ nàng bơsram tàp bồ tơngoh, ñă ntào nàng lơh pas ai hìu bơnhă mờ geh kwơ ai mpồl bơtiàn mờ tam pà bal mờ ală cau kal ke in. Den tàng tàm bơta pràn bơh añ dê dong geh bơta lơi là añ dong lơm”.

Lơh jat jơnau sồr sồ 05/2016 bơh Ƀộ Cíñ trị dê bè lơh pràn bơsram mờ lơh jat bồ tơngoh, nùs nhơm, rài kis mờ broă lơh Hồ Chí Minh, tàm 10 nam do, ală kấp mpồl mờ mpồl cau ling yau neh lam lơh làm bă tiah uă srơh, broă lơh pơn rơ jak, bè: “Cau ling yau dong bal mờ gơ̆p bơtàu tơnguh lơh sa” , “5+1”, “2 tơn jơh, 3 dong kờl”, ală broă lơh suơn- tơnau- wàng (VAC), suơn- tơnau- wàng – brê (VACR), hìu bơnhă ròng phan uă, suơn dờng ròng phan... Bơh hơ̆ neh pơgồp bơnah dong uă cau tàm mpồl brồ guh lik klàs rƀah.

Kung bơh nam 2016 tus tŭ do, ală kấp mpồl neh lơh 23 rơbô nơm hìu bơta nđàc, dong kờl tơn jơh rlau 43 rơbô nơm hìu ing ai cau tàm mpồl kal ke in. Cau tàm mpồl cau ling yau gam pà is gĭt nđờ tơlak thơk vuông ù nàng lơh gùng lòt ƀòn lơgar. Bơh hơ̆ lơh gơrề uă broă bơsram mờ lơh jat jơnau sồr Wa Hồ dê bơh tàm ƀòn lơgar. Trung tướng Khuất Việt Dũng- Phó Củ tịc Mpồl Cau ling yau Việt Nam pà gĭt, broă bơsram mờ lơh jat jơnau sồr Wa Hồ dê rơ̆p geh Mpồl Cau ling yau Việt Nam tam gơl pa tàm tơngai pơn jat tai:

“Bơsram mờ lơh jat jơnau sồr Wa Hồ pal pơgồp bal mờ ală srơh tàm pơrlòng “Cau ling yau lơh krơh niam, “Cau ling yau dong kờl bal mờ gơ̆p lik klàs rƀah, lơh sa jak”, ală dơ̆ hòi jà bơh dà lơgar mờ ƀòn lơgar dê. Bol añ sền broă lơh  tus geh ală kơnòl broă cíñ trị tờm là broă lơh ngan ngồn ngan rlau jơh nàng bơsram mờ lơh jat jơnau sồr bơh Wa Hồ dê. Broă lơh sền gĭt mờ lơh gơrề uă kung kwơ màng ngan sơl. Tus ndo bol añ kung tam gơl pa ală broă lơh nàng broă lơh do li la rlau mờ geh bơta pràn lơh gơrề uă niam rlau tai”.

Tàm dơ̆ tìp mat lơh kwèng, Mpồl cau ling yau Việt Nam neh jàu Ƀằng khen pà ală mpồl cau, cau dồ nă să geh cồng nha jak ngan tàm broă bơsram mờ lơh jat ƀồ tơngoh, nùs nhơm, broă lơh mờ rài kis Hồ Chí Minh dê tơngai bơh nam 2016-2026.