Pơrjum dơ̆ 2, Quôk hội khoă 16 kờp dŭ geh bơyai lơh tàm mờr 30 ngai. Đơs sơnđờm mut pơrjum, Củ tịc Quôk hội ồng Trần Thanh Mẫn pà gĭt, tàm dar pơrjum do lơh dơ̆ tơn jơh Pơrjum dơ̆ 1 mờ tă pơgồp jơnau đơs bơh sơn rờp bè broă rcang ai pơrjum dơ̆ 2 Quôk hội khoă 16 in.

Củ tịc Quôk hội sồr kờñ pal sền sơwì song tàm ală broă lơh gơtùi, broă ờ hềt lơh gơtùi, sền gĭt loh ală tơngume kờñ pal tam gơl niam bơh tàm pơrjum dơ̆ 2 tơn, ờ gŏ di lời gơtìp wơl bơta pơyoa tìs sră nggal, ờ niam tàm pơrjum dơ̆ 1 pa do. Củ tịc Quôk hội sồr ală anih lơh broă yal, anih lơh broă đơng lam cih jơnau lơh niam ngan ai jơnau bơsram mờng chài, lơh loh kơnòl; Lơh broă sùm Mpồl duh broă Jơi bơtiàn, ală Anih duh broă, Cơldŭ lơh broă Quôk hội pơgồp bal, sồr lơh ngan, jat sền ngan ngồn tŭ tơngai mut lơh, di tŭ yal mờ Anih duh broă Lơh kơnòl broă sùm Quôk hội dê.