Jat sền sơwì bơh Mpồl Sền sơwì sồ 26, Mpồl Lơh kơnòl broă sùm Tỉñ ủy càr Dăk Lăk neh rcang lài bơsram lơh jat, lam lơh niam ală gùng dà broă lơh,  Jơnau lơh nền tàm pơrjum bơh Dà lơgar dê. Càr neh di tŭ pồ tơl mpồl lơh broă kwang bàng, lơh pràn tam pà kấp, tam pà gơnoar, tam gơl pa sră pơ àr gơnoar atbồ mờ tam gơl sồ. Gơwèt mờ kơnòl broă bơtàu tơnguh lơh sa, càr Dăk Lăk neh bơt bơtàu lài broă lơh gơguh tai jat tơl nam, tơl gah, gah broă; tơnggơs Mpồl Sồr lơh lơh jat jơnau kờñ gơguh tai 2 nơm khà, mơkung ai lơh jat uă broă lơh nàng kờñ sơlơ tơnguh tai bơtàu tơnguh lơh sa-mpồl bơtiàn. Tàm lam lơh Jơnau lơh nền tàm pơrjum sồ 57, càr kung neh jơh nùs lơh ngan ngồn ală kơnòl broă, broă lơh bè jak chài măi mŏk, tam gơl pa bơceh lơh mờ tam gơl sồ.

Gơwèt mờ jơnau kờñ gơguh tai lơh sa 2 nơm khà, Mpồl Sền sơwì sền gĭt broă jàu jơnau kờñ gơguh tai ai 102 sàh, sơnah ƀòn gam ờ tơl ală bơta jak chài. Cồng nha lơh jat ală kơnòl broă tàm qúy 1 kung bè khà gơguh tai tŭ do ờ hềt lơh geh jat jơnau kờñ jơnau geh ai tơlik neh geh ai. Tàm tŭ hơ̆, bàr pe gah geh uă bơta pràn mờ bơta ƀuơn bè lòt nhơl, phan brê kung gam ờ hềt ngui jơh gơnoar broă, khà tă pơgồp tàm gơguh tai lơh sa bơh càr dê gam lơyah.

Tàm lam lơh Jơnau lơh nền tàm pơrjum sồ 57, bàr pe tiah gam gơtìp kal ke tàm broă lơh ngan ngồn kơnòl broă. Tŭ do gam 56 sră nggal gơrềng tus lơh sir kơrnoat boh lam tàm gah jak chài măi mok, tam gơl pa bơceh lơh mờ tam gơl sồ ờ hềt geh bơsong. Phan bơna bơt bơtàu măi mok yal tơngĭt jơnau, ală jơnau yal mờ ală bơta drơng broă tam gơl sồ, is ồn tàm tiah sar lơgar ngài kung gam uă bơta ờ hềt niam, gơrềng tus cồng nha lam lơh ală kơnòl broă.

Tàm dơ̆ lơh broă, càr Dăk Lăk neh dan mờ Dà lơgar sền sơwì tă bơsong ală kòl yan gơrềng tus ù broă lơh sa suơn sre, ù tiah lơh sa brê bơnơm; kơlôi sơnơng broă rơndăp tăp sèng ală sàh geh rơndăp lơh dềt; lơh sir broă lơh dong kờl gơwèt mờ mpồl kwang bàng kấp hơ đơm mờ pơn jat tai sền gròi bơcri priă lơh ală phan bơna bơt bơtàu gùng lòt rê. Mờ càr kung đơs bàr pe broă lơh krơi is nàng kờñ lơh geh tai ù tiah mờ bơta gơn kơnờm bơtàu tơnguh tàm tơngai tus. Bí thư Tỉñ ủy càr Dăk Lăk ồng Lương Nguyễn Minh Triết đơs: “Sồr mpồl geh jơnau yal nàng càr in mut ngui Jơnau lơh nền tàm pơrjum sồ 72 bơh Quốc hội dê bè lơh tơrlòng lài bàr pe broă lơh dong kờl krơi is ai Buôn Ma Thuột in, jơh nùs lơh ngan bơt bơtàu Buôn Ma Thuột gơ gơs tiah tờm Tây Nguyên dê nàng tơrgùm bơtàu tơnguh ai tiah do in; Dơ̆ 2 là tàm tiah đah mat tơngai lik geh tiah lơh sa Nam Phú Yên, digơlan đơs là gơn kơnờm gơguh tai 2 nơm khà halà ờ kung sền tàm tiah lơh sa do uă ngan. Bol añ sồr đơs ngui Jơnau lơh nền bơh Chính phủ dê sồ 127 nam 2012 ndrờm bè tiah lơh sa Bắc Vân Phong nàng geh broă lơh gơ hòi gơ jà bơcri priă tàm tiah do dê”.

Sền sơwì bè cồng  nha lơh jat ală kơnòl broă bơtàu tơnguh lơh sa- mpồl bơtiàn bơh càr Dăk Lăk dê, ồng Nguyễn Thanh Nghị đơs là khà gơguh tai tŭ do càr dê kung gam ngài ngan pơndrờm mờ jơnau kờñ gơguh tai 2 nơm khà neh geh ai tơlik. Cồng nha gơguh tai ndrờm pal mờ bơta pràn, bơta ƀuơn bơh tiah do dê. Jak chài măi mok, tam gơl pa bơceh lơh mờ tam gơl sồ ờ hềt ngan ngồn gơ gơs bơta gơn kơnờm kwơ màng sơlơ tơnguh tai bơtàu tơnguh lơh sa.

Lam bồ Mpồl Sền sơwì sồ 26 sồr càr pơn jat tai kờp sền tơl làm ală bơta pràn tàm ù tiah do dê; tơrgùm tă bơsong ală bơta gơ kòl bè sră pơ àr gơnoar atbồ, tiah bơcri priă lơh sa kă bro; tơnguh cồng nha atbồ, lơh pràn tam gơl sồ mờ lơh jat ring bal ală broă tam gơl pràn kwơ màng, is ồn là bơtàu tơnguh mpồl cau lơh broă nàng kờñ bơsong bơta pràn ai gơguh tai mhar mờ kơnhăp kơ̆ in. “Sồr ală oh mi kờp sền wơl bal ală bơta pràn tàm ù tiah càr dê nàng drơng broă gơguh tai; kờp sền wơl sră pơ àr gơnoar atbồ, tiah bơcri priă lơh sa kă bro bơh càr dê; tam gơl pa sră pơ àr gơnoar atbồ, Atbồ tơngai pa tam gơl sồ bè lơi sồr ală oh mi kờp sền wơl tơrgùm tă bơsong ală bơta gơ kòl nàng tơrgùm bơsong bơta pràn mờ lơh jat ring bal cồng nha ală broă lơh tam gơl pràn kwơ màng ngan rlau jơh là mpồl cau lơh broă”.