Ơdŭ pơlam tàp nàng kờñ lơh ngan ngồn ală jơnau kờñ tờm bơh Jơnau lơh nền tàm pơrjum sồ 57 bè tam gơl pràn bơtàu tơnguh jak chài, măi mok, tam gơl pa bơceh lơh mờ tam gơl sồ, ai gơguh jak măi mok bơh cơldŭ thí nghiệm rê tus tàm kấp hơđơm.

 Jat ồng Phạm Gia Việt, Phó Kwang lam bồ Sờh Jak chài mờ Măi mok càr Dăk Lăk, cồng nha bơh broă lơh Jak chài mờ Măi mok pal geh đơs nền mờ bơta kwơ gơguh tai, geh cồng nha ngui tàm bơta geh ngan nàng bơtàu tơnguh rài kis ai mpồl bơtiàn mờ làng bol in. Broă tơnguh uă bơta pràn jak ai mpồl kwang bàng kấp hơ đơm in ờ di mìng dong atbồ niam ală kơnòl broă Jak chài mờ Măi mok lơm mờ gam là bơta tờm kwơ màng nàng ai Jơnau lơh nền tàm pơrjum sồ 57 dê lòt mut tàm rài kis dồ bă ngan ngồn ngan.