Mho do (11/05), tàm Hìu pơrjum Dà lơgar Mỹ Đình, ƀòn dờng Hà Nội geh bơyai lơh pơrjum rơcang lài bơh Pơrjum dờng cau ala măt gùt lơgar Mặt trận Dà lơgar Việt Nam dơ̆ XI, tơngai lơh broă bơh nam 2026 tus 2031. Mờ tơngu me “Tam klăc – Làng bol lơh tờm – Tam gơl pa – Bơceh lơh –Bơtàu tơnguh”, Pơrjum dờng geh bơyai lơh bơh ngai1 tus ngai 13 nhai 5, là broă lơh cíñ trị mpồl bơtiàn kwơ màng, pờ lài ngan ai tơngai lơh broă pa bơh Mặt trận Dà lơgar Việt Nam dê tàm bơta ală mpồl lơh broă cíñ trị mpồl bơtiàn mờ ală mpồl làng bol geh Đảng, Dà lơgar jào kơnòl broă gơwèt Mặt trận Dà lơgar Việt Nam.

Tus bal Pơrjum dờng geh rơlao 1 rơbô 300 nă cau ala măt, tàm hơ̆ geh 1 rơbô 138 nă cau ala măt mùl màl geh Kwang bàng geh jơng tàm Anih duh broă Mặt trận Dà lơgar Việt Nam khoă X gam at gơnoar broă; cau ala măt geh Pơrjum dờng Mặt trận Dà lơgar Việt Nam ală càr, ƀòn dờng mờ ală mpồl lơh broă pồ; cau alăt geh sồr; cau lơgar Việt Nam tàm lơgar bơdìh mờ kwang bàng Mặt trận mìng lơh dùl kơnòl broă. Jơnau yal cíñ trị yal Pơrjum dờng geh tơngu me: “Tơnguh uă gơnoar tờm cíñ trị bơh Mặt trận Việt Nam tàm broă tơnguh làng bol lơh tờm, bơhiàn kờñ gơboh dà lơgar, bơta pràn tam klăc bal gùt jơi bơtiàn, bơ̆t bơtàu dà lơgar bơtàu tơnguh pas gơs pràn kơl dang, gơguh jăk, gơboh gơbài”. Tàm pơrjum rơcang lài mho do, Pơrjum dờng geh bơyai lơh cri bơyai pồ Mpồl Củ tịc, Mpồl dong broă; ring bal broă pơrjum, kơrnoăt lơh broă; jơnau yal bè cau ala măt tus Pơrjum dờng; sền wơl broă lơh bơh Anih duh broă Dà lơgar, Mpồl Củ tịc mờ Mpồl duh broă sùm Anih duh broă Mặt tận Dà lơgar Việt Nam tơngai bơh nam 2024 tus 2026; sền wơl Jơnau yal tam gơl, bơtơl Bơta pal jăt Mặt trận Dà lơgar Việt Nam dê.