Tỉñ ủy càr Khánh Hòa pa bơyai lơh pơrjum tìp mat tơm bơh bơr đah Lơh broă sùm Tỉñ ủy mờ kwang bàng kông cứk, viên cứk kấp sàh nam 2026. Pơrjum neh dờp 210 jơnau đơs bơh kwang bàng, kông cứk, viên cứk tàm 64 sàh, sơnah ƀòn. Ală jơnau đơs jơnau dan tơrgùm tàm ală broă rơndăp tăp sèng mpồl kwang bàng, rơndăp kwang bàng, broă lơh dong kờl, tam gơl pa wơl sră pơ àr gơnoar atbồ, tam gơl sồ mờ priă jền lơh broă tàm kấp hơđơm. Uă tiah đơs bơta uă ir broă lơh tŭ mpồl kwang bàng, kông cứk ờ hềt di pal mờ khà kờp làng bol mờ jơnau sồr kơnòl broă dê. Uă sơnah ƀòn gal làng bol, ù tiah ơnàng, khà gơguh mhar bè khà kờp làng bol mờ tiah drà mhar mơya cau lơh broă ờ hềt geh rơndăp di pal, lơh kwang bàng pal lơh bal tơn uă bơnah broă.

Mò Trương Thị Thu Thảo, Phó Lam bồ mpồl Bơt bơtàu Đảng sơnah ƀòn Nam Nha Trang, càr Khánh Hòa pà gĭt, mpồl broă lơh gơguh mhar, mơya priă lơh geh bơh uă kwang bàng dê den gơmù wơl. “Sơnah ƀòn geh uă ngan oh mi neh ơm rlô broă mờ ntrờn broă lơh, bơta kơn jơ̆ broă lơh dờng rlau tàm tŭ hơ̆ tŭ do ờ gam geh priă dong kờl 30% mpồl Đảng. Tơnơ̆ tơngai ơm ing 6 nhai tŭ do priă nhai gơmù uă ngan, bơta kơn jơ̆ broă lơh den tàng uă oh mi neh tam gơl broă lơh nàng di pal mờ ală bơta, rài kis hìu bơnhă dê”.

Tŭ do, càr Khánh Hoà geh 4 sơnah ƀòn geh khà kờp làng bol rlau 100 rơbô nă cau mờ rlau 10 sàh, sơnah ƀòn geh khà kờp làng bol rlau 50 rơbô nă cau. Uă tiah sồr càr ai lơh lài bơtơl cau lơh broă ai ală ù tiah gal làng bol ơm kis; mơkung gờñ lam lơh tiah lơh broă mờ bơyai lơh sac rơwah cau lơh broă nàng tơrmù ƀà bơta kơn jơ̆ ai kấp sàh in. Ồng Phạm Ngọc Hải, Ƀí thư Đảng ủy sàh Tây Khánh Sơn pà gĭt, tŭ broă lơh uă, cau dồ ết, sơnah ƀòn kờñ ngan ngui măi mok yal tơngĭt jơnau nàng tơnguh cồng nha bơsong broă lơh. Mơya, kal ke dờng tŭ do là ờ tơl priă jền nàng blơi: “Dilah kwang bàng, kông cứk bol añ geh ngui ală phần mềm do den ngan ngồn ngan, gơ rơ̆p tềm pềr tŭ tơngai, geh cồng nha tă pơgồp jơnau đơs niam rlau, cồng nha drơng broă làng bol mờ mpồl lơh sa kă bro in rơ̆p niam rlau tai. Kwơ màng là priă jền nàng blơi phần mềm bản quyền, dan mờ Anih duh  broă Làng bol càr pà tai priă jền nàng sơnah ƀòn in blơi ngui dilah ờ den càr blơi, tơnơ̆ hơ̆, tàm jàu gơnoar, pà gơnoar ngui ai kwang bàng kông cứk bơh kấp càr tus kấp sàh nàng bol añ in gĭt ngui”.

Tơnơ̆ tŭ iăt kơno ală jơnau đơs tàm pơrjum, ồng Trần Phong, Ƀí thư Tỉñ ủy càr Khánh Hòa sồr ală sờh, gah mhar tă bơsong ală bơta kal ke gơwèt gơnăp gơnoar, mơkung tơrgùm wơl ală jơnau đơs jơnau dan sơr lèt gơnăp gơnoar nàng yal mờ Dà lơgar in sền sơwì mờ bơsong. “Sồr ală anih lơh broă, Sờh, gah sơlơ tơnguh tai broă lơh pơgồp bal, rcang lài rlau tai, tam jàu broă ai kwang bàng in jat nền tơl ù tiah, gĭt loh jơnau yal tơngĭt, bơta kòl yan, di tŭ tă pơgồp jơnau đơs ai Tỉñ ủy, Anih duh broă Làng bol càr in. Jơh ală gĭt nđờ jơ̆t jơnau hơ do kờñ pal rơndăp tăp sèng wơl mờ pơyoa ai 64 sàh, sơnah ƀòn in, kờñ pal geh cồng nha jơnau hơ, geh halà ờ? pal kơ̆p den kơ̆p mờ cau lơi”.

Tơn jơh wơl dơ̆ pơrjum tìp mat tơm bơh bơr, uă broă bơh bơta geh ngan lơh broă tàm kấp hơ đơm tàm càr Khánh Hoà neh geh đơs dùl bă song dơ pă, bơh bơta kơn jơ̆ uă ir broă lơh, ờ tơl cau lơh broă, tơrmù priă lơh geh tus kal ke bè priă jền tam gơl sồ. Ală jơnau đơs bơh kwang bàng, kông cứk, viên cứk tàm 64 sàh, sơnah ƀòn ờ mìng đơs nùs nhơm bơh mpồl lơh broă tàm kấp hơ đơm dê lơm mờ gam pà gŏ jơnau kờñ mhar ngan lơh sir broă lơh, broă dong kờl di pal mờ bơta geh ngan khà kờp làng bol, bơta gơguh mhar tiah drà  mờ mpồl broă lơh tŭ do dê. Broă càr sồr kờp sền, hơ jơnau ngan ngồn tơl jơnau đơs jơnau dan kung geh kơ̆p kơnờm rơ̆p pơgồp bơnah tă bơsong kal ke, lơh geh ală bơta nàng mpồl kwang bàng kấp hơ đơm in iang nùs lơh broă, tơnguh cồng nha drơng broă làng bol mờ mpồl lơh sa kă bro tàm ù tiah càr Khánh Hoà dê.