Tơnơ̆ 1 nam lam lơh, càr Lâm Đồng neh lơh sir pồ tơl mpồl lơh broă dà lơgar bơh càr tus kấp hơđơm. Tơnơ̆ rơndăp tăp sèng, ală anih lơh broă geh jàu kơnòl broă gơmù pràn, tàm hơ̆, mpồl Đảng gơmù 66,6%, mpồl  gơnoar atbồ gơmù 61,9%; jơh gùt càr lơh sir jơnau sồr bơh kấp ủy, đơng lam bồ Mpồl duh broă Làng bol, Anih duh broă Làng bol tàm 124 sàh, sơnah ƀòn, tiah is ồn mờ hòi jà rlau 370 nă kwang bàng, kông cứk, viên cứk rê lơh broă tàm kấp hơ đơm.

Bal mờ rơndăp tăp sèng mpồl lơh broă dà lơgar, càr lơh pràn tam gơl pa sră pơ àr gơnoar atbồ, tam gơl sồ, koh tơrmù pơgăp 30% sră pơ àr tàm dơlam is; 100% drơng broă dà lơgar tàm internet geh tơrgùm wơl tàm măi mok. Broă lơh wă làng bol, bơsong jơnau yal yă geh gàr niam; ală bơta cíñ trị- mpồl bơtiàn, sền gàr dà lơgar, lơngăp lơngai pơn jat tai geh gàr kơ̆.

Jờng rơ bè broă lơh lam lơh, ồng Y Thanh Hà Niê Kđăm, Kwang bàng Đảng dà lơgar, Ƀí thư Tỉñ ủy càr Lâm Đồng đơs sùm, broă lơh sir broă lơh gơnoar atbồ ƀòn lơgar 2 kấp là kơnòl broă jal mhar mơkung jŏ jòng; ờ mìng nàng kờñ lơh kah wơl bơta pràn bơtàu tơnguh lơm mờ gam tơnguh uă bơta lơh glài, duh rơngòt kơrnoat boh lam mờ kơnòl mờ kơnòl broă dà lơgar bơh cau lam bồ dê. Mơya, bơdìh mờ ală cồng nha niam kung kờñ pal song dơ pă sền dờp kung gam geh ờ dồ ết kal ke, bơta lòng, bơta ờ pràn kờñ pal geh jơh nùs kơlôi sơnơng mờ bơsong sơl.

Ồng Y Thanh Hà Niê Kđăm pà git: “Bơdìh mờ ală cồng nha neh lơh geh, mpồl lơh broă dà lơgar bulah neh bè ờs rao mơya ờ hềt ngan ngồn lơh sir jơh bal tàm kấp càr mờ kấp sàh. Broă rơndăp tăp sèng broă lơh ai kwang bàng tàm bàr pe tiah in gam kwi kwơ, bàr pe tiah gam ờ hềt tơl, ờ hềt rơndăp tơl làm. Cồng nha lơh broă mpồl kwang bàng kông cứk gam ờ hềt ring, ngan là kấp sàh. Bàr pe mpồl gam ờ hềt pràn bè bơta pràn jak broă lơh ờs mờng, bơta chài bơsong broă lơh. Broă tàm tơrbŏ tam pà bal mờ ngui ală jơnau yal đah ală anih lơh broă dê ờ hềt niam. Lơh geh ală jơnau yal tơngĭt ngui bal drơng broă lơh đơng lam sồr lơh gam lơyài. Phan bơna bơt bơtàu mờ bơta pràn lơh broă ờ hềt lơh geh jat jơnau sồr dê”.

Đơs đơng lam tàm pơrjum, Kwang bàng Đảng Dà lơgar, Ƀộ trưởng Ƀộ Broă dơlam is ồng Đỗ Thanh Bình jờng rơ uă ngan nùs nhơm rcang lài, kràñ cê jơh nùs bơh càr Lâm Đồng dê tàm broă lam lơh broă lơh pa, ngan là broă ntrờn kwang bàng lơh broă tàm kấp hơđơm mờ lơh pràn tam pà kấp, tam pà gơnoar. Mơya, tiah do kung gam pal kong mờ bơta kơn jơ̆ dờng tài bơh ù tiah dờng ơnàng ngan rlau jơh dà lơgar, khà kờp làng bol uă, uă kwang bàng pal lơh broă ngài hìu bơnhă, tàm tŭ priă nhai, phan bơna bơt bơtàu măi mok mờ broă lơh dong kờl ờ hềt lơh jat di mờ jơnau sồr geh ngan dê.

 Ƀộ trưởng Ƀộ Broă dơlam is ồng Đỗ Thanh Bình đơs là, tàm tơngai tus, đơng lam bồ càr Lâm Đồng pal pơn jat tai kờp sền, pồ tơl mpồl lơh broă; tơnguh  cồng nha lơh broă bơh mpồl kwang bàng kấp hơđơm in; lơh pràn tam gơl pa sră pơ àr gơnoar atbồ, tam gơl sồ; sơlơ tơnguh tai tam pà kấp pơgồp bal mờ lòt sền, jat sền mờ ai bơta niam nùs bơh làng bol, mpồl lơh sa kă bro lơh bơta đo was cồng nha lơh broă bơh broă lơh gơnoar atbồ ƀòn lơgar 2 kấp dê. “Đah đăp kung gam geh uă kơnòl broă kơn jơ̆ kơn jŭt ngan sồr càr Lâm Đồng pal pơn jat tai tam gơl pa pràn kơl dang, ngan ngồn rlau tai; lơh jat niam nùs nhơm tam klăc bal, rcang lài, kràñ cê jơh nùs tàm broă lam lơh jat. Tơrgùm tă bơsong di tŭ ală kal ke, kòl yan, ală tiah gơ kòl nàng ai broă lơh gơnoar atbồ 2 kấp in mut lơh broă ngai sơlơ gơtùi lơh broă, mờ lơh broă geh cồng nha, lơh geh jơnau sồr bơtàu tơnguh mhar mờ kơnhăp kơ̆ tàm tơngai pa. Ƀộ Broă dơlam is rơ̆p pơgồp bal niam, di tŭ, bal mờ càr nàng tă bơsong ală kal ke, kòl yan, nàng lam gơnoar atbồ 2 kấp lơh broă geh cồng nha rlau, ngan ngồn rlau”.