Tơnơ̆ mờ ală ngai satềp chờ hờp, chờ hờn, ồng Nguyễn Viết Đồng tàm sơnah ƀòn Ea Kao, càr Dăk Lăk neh lik tàm suơn kơphe nàng sền ù tiah, crăp ală phan tuh dà ntờc, rơcang lài tuh dà phan tam in. Ồng Đồng pà git, suơn kơphe hìu nhă ồng gam tàm tơngai tơ̆t plai, tuh dà tơl rơ̆p dong kờl suơn in geh ròng plai niam, tơnguh cồng nha lơh geh tàm kàl tus: “Nàng geh dùl kàl tơnhào uă, ală broă lơh lài ngan geh kwơ màng, nàng tuh dà di tŭ, nàng bŭt bơkào, tơ̆t plai. Bol añ lơh ngan tŭ ơm rơlô Satềp, rơcang lài tus tàm suơn tàm ală ngai bồ nam pa nàng tuh dà kơphe in. Kơ̆p kờñ tàm nam pa nam Ơseh chờ hờp, kàl lơh kơphe nam do tơnhào geh uă”.

Tơnơ̆ mờ ală ngai ơm rơlô Satềp tơrgùm bal, ồng Nguyễn Văn Trường, tàm sàh Cư̆ Pơng, càr Dăk Lăk kung lơh ngan tus wơl tàm suơn kơphe ơnàng 1 lồ nggùl bơh hìu nhă dê nàng rơcang tuh dà dơ̆ bàr, do là dơ̆ tuh dà tờm nàng tờm kơphe tơ̆t plai mờ hờn gơs niam. Nàng gàr tơl dà tuh, ồng Trường neh bơcri priă blơi ndrờm bal tơnao dà geh lơh mờ toal tang sơndră mờ gơlik dà bal mờ ding dà tuh tềm pềr. “Tŭ do, hìu lơi kung tờ ù, blơi toal tang nàng dă gàr dà. Lơh tơnao mờ toal tang geh kwơ ngan. Làng bol gŏ tàm tiah lơi geh dà là ƀồm nàng prăp dà tàm tơnao. Tŭ lồi kàl prang gơtìp prang dờng den ngui dà prăp do nàng tuh phan tam in”.

Càr Dăk Lăk tŭ do geh di pơgăp 213 rơbô lồ ù tam kơphe, tơrgùm uă ngan mìng tàm tiah đah măt tơngai Mŭt (càr Dăk Lăk lài do) dê. Kơnờm mờ broă rơcang geh dà lài, ngui măi mok bơta chài mờ geh sùm broă sơnka sền gàr niam, cồng nha kơphe tàm kàl 2025-2026 pơn jăt tai geh tàm khà uă, khà geh rơlao 570 rơbô tấn, cèng geh uă priă ai cau tam kơphe in.

Tàm tŭ làng bol lơh broă sa tàm tiah đah măt tơngai Mŭt càr lik lơh broă nàng sơnka sền gàr phan tam den ală làng bol lơh ka tàm dà lềng đah măt tơngai Lik càr Dăk Lăk lòt lơh ka tàm dà lềng tơn tơnơ̆ mờ ală ngai chờ Satềp. Tàm anih ơhò lơh ka ơm Đông Tác, sơnah ƀòn Phú Yên (càr Dăk Lăk), uă ơhò đàr ka ngừ dà lềng dờng neh rê tus. Bi Hồ Ngọc Hội, dùl nă cau lơh ka tàm dà lềng pà git: “Ngai 5 Satềp ală oh mi tàm ơhò rê tus anih ơhò lơh ka ơm. Chờ hờp ngan, đàr geh uă ka ngừ. Satềp jơla nam 2026 do sền gơlơh bè geh priă bơh dà lềng bloh”.

Kung rê tus tềng anih ơhò lơh ka ơm Đông Tác sơl tơnơ̆ mờ ală ngai chờ wă rò Satềp, bi Hồ Trọng Hạnh, cau tờm ơhò lơh ka tàm sơnah ƀòn Phú Yên, càr Dăk Lăk chờ hờp pà git: “Dơ̆ lòt lơh ka do lơh geh uă đao, oh mi cau lơi kung chờ hờp lơm. Bồ nam pa lòt lơh ka tàm dà lềng ƀuơn bè do là chờ hờp ngan bloh”.

Tàm tŭ cau lơh ka gam lơh ngan rê tus tàm anih ơhò lơh ka ơm, ală cau lòt blơi ka, mpồl lơh sa kă bro blơi ka tus gal ngan tŭ ơhò rơ̆p tus tềng anih ơhò lơh ka ơm. Ồng Cao Thành Hưng, ala măt dùl mpồl lơh sa kă bro mìng blơi ka ngừ tăc mờ lơgar bơdìh pà git, ka lơh geh tàm tiah lơh ka dà lềng bồt Trường Sa kàl do geh bơta dờng mờ poăc bơkah, geh drà kă bro bè tàm câu Âu, lơgar Mỹ, Ñờk kờñ ngan blơi. Jơh ală khà ka tus tềng anih ơhò lơh ka ơm tàm ală ngai bồ nam pa ndrờm geh mpồl lơh sa kă bro blơi jơh. “Bồ nam bol añ lơh ngan blơi mờ khà priă niam, dong kờl làng bol tơnơ̆ mờ ală ngai jŏ jòng ơm lơh ka tàm dà lềng, nàng cau lơi kung geh dùl Satềp hờm ram”.

Jăt jơnau kờp bơh Đah Phan tàm dà bal mờ Bồt dà lềng càr Dăk Lăk yal, tơnơ̆ mờ Satềp nam pa nam Ơseh, pah ngai geh git nđờ rơbô nơm ơhò lơh ka (mìng là lơh ka ngừ dà lềng dờng) rê tus, mờ khà geh kờp dŭ git nđờ rơhiang tấn.

Bơh tàm ală suơn kơphe hòn gơs tơlir niam tus mờ ală ơhò lơh geh uă ka tàm dà lềng rê tus anih ơhò lơh ka ơm tàm bồ nam, bơta niam bơnĕ lơh broă tơnơ̆ mờ Satềp tàm càr Dăk Lăk dê gam pờ geh uă bơta niam. Nùs nhơm pràn lik lơh broă jal mhar, bồ tơngoh lơh sa geh rơcang lài bal mờ broă pơgồp bal đah làng bol mờ mpồl lơh sa kă bro dê neh lơh geh bơta pràn kơl dang ai dùl nam pa mờ uă bơta kơ̆p gơn. Mờ nùs nhơm pin dờn pa, lơh ngan pa mờ broă lơh ngai sơlơ geh cồng nha, làng bol lơh broă sa suơn sre, cau lơh ka tàm dà lềng càr Dăk Lăk dê kơ̆p gơn dùl nam pa nam Ơseh lơh geh cồng nha, rài kis ngai sơlơ pas gơs, pơgồp bal tàm broă bơtàu tơnguh kơl jăp càr in.