Mho ngai 26/2, tàm Hìu lơh broă Cíñ phủ, Thủ tướng ồng Phạm Minh Chính wă Kwang atbồ anih lơh broă ala mat lơgar Bỉ tàm lơgar Việt Nam ồng Karl Van Den Bossche cribơyai bè lơh broă bal Việt Nam mờ Bỉ, ngan là tàm gah lơh sa- kă bro phan -bơcri priă mờ dong kờl bơsong ală jơnau gơ lời wơl bơh dà sơnơm khih dioxin dê lơh aniai tàm lơgar Việt Nam. Đơs nền Việt Nam sùm sền Bỉ là lơgar lơh broă bal kwơ màng tàm EU, Thủ tướng sồr 2 gah pơn jat tai lơh kơ̆ kơl jap bơta pin dờn cíñ trị bơh sơlơ tơnguh tai tàm pơgơl mpồl ală kấp, ală gah; tơnguh uă cồng nha bơh ală broă lơh lơh broă bal đah 2 gah, pơgồp bal niam tàm ală dơ̆ cribơyai, mpồl ală lơgar. Mờ 2 gah kung pơn jat tai gàr niam mờ lơh pràn lơh broă bal tàm ală gah mblàng yal jơnau bè sền gàr dà lơgar- lơngăp lơngai, niam chài, bơto bơtê, rcang lài pleh mờ tam gơl nhơm trồ tiah, lòt nhơl,... mờ pờ ơnàng lơh broă bal tus ală gah kwơ màng bè jak chài- măi mok, cíp ƀán zẫn, gùng lòt rê jun pơndiang...

Di dơ̆ do, Thủ tương đơs wơl jơnau ưn ngài Hạ viện lơgar Bỉ neh ring bal Jơnau lơh nền tàm pơrjum bè dong kờl cau gơtìp sơnơm khih dioxin lơh aniai tàm lơgar Việt Nam (nhai 10/2023), pơgồp bơnah sơlơ tơnguh tai dong kờl bơh mpồl bơtiàn ală lơgar dê bè broă do.