Đơs sùm kơnòl broă gơ tơlik ai Kụk Lơngăp lơngai lùp khàu in nam 2026 mờ ală nam pơn jăt tai là dờng ngan. Tổng Ƀí thư tơngkah kwang bàng, cau ling Kụk Lơngăp lơngai lùp khàu, Ƀộ Kwang àng pơn jăt tai tơnggŏ nùs nhơm dòn song ngan mờ Đảng, Dà lơgar mờ Làng bol, lơh sir jak ngan kơnòl broă gàr kơnhăp kơ̆ kơl jăp cíñ trị, niam lơngăp lơngai jơh gùt mpồl bơtiàn; đơs nền geh gơnoar broă rơcăng lài bơ̆t mòn, lơh gơs ală bơta ƀươn ƀoài nàng lam lơh geh cồng nha ală kơnòl broă bơ̆t bơtàu mờ sền gàr Dà lơgar tờm.

Bal mờ hơ̆, Tổng Ƀí thư kung sồr, Kụk Lơngăp lơngai lùp khàu pal rơcăng lài gĭt nền broă gơlik geh bơh gờñ, bơh ngài, bañ lời gơtìp rơmơ̆p ndơl tàm tơl jơnau digơlan gơlik geh; gĭt wă di, bơsong rơgeh ală broă lơngăp lơngai dà lơgar, gơ jăt bal mờ bơta kwơ bơh dà lơgar dê; đal gŏ gờñ, lam lơh lùp khàu, lơh glài kràñ ală broă lơh mblàng yal, đơs bơceh, tam dră lơh aniai jơnau lơh nền, gùng dà broă lơh Đảng dê.