Mho ngai 24/5, tàm hìu lơh broă Cíñ phủ, Mpồl duh broă pơlam toh glài jàm neh pơrjum sền swì, ring bal mat dan Củ tịc lơgar toh glài jàm, lik jàm lài mờ tơngai pơrgon ai ală cau jàm geh tơl bơta toh glài jàm in, di tơngkah kir sơnrai 51 nam Ngai tơngklàs tiah đah jum, tơrgùm dùl dà lơgar (30/4/2026), gờm chờ cồng nha Pơrjum dờng cau ala mat gùt lơgar dơ̆ XIV bơh Đảng dê, tĕ khà cau ala mat Quôk hội khoă XVI mờ tĕ khà cau ala mat Mpồl duh broă Làng bol ală kâp, tơngai lơh broă bơh nam 2026 tus nam 2031.

Đơs tàm dơ̆ pơrjum, Phó Thủ tướng Duh broă sùm ồng Phạm Gia Túc đơs loh, bơta kờñ gơboh bal kòn bơnus mờ toh glài gơ wèt mờ cau tìs là bơhiàn ờs mờng niam bơnĕ bơh jơi bơtiàn he dê. Mpồl duh broă pơlam toh glài jàm nam 2026 neh sền swì rlau 10 rbô sră nggal cau jàm geh tơl bơta nàng dan toh glài jàm. Phó Thủ tướng Duh broă sùm ồng Phạm Gia Túc sồr tŭ sền swì, lơh nền pal lơh nền nòn, song dơpă mờ di adat boh lam. Jat Mpồl duh broă pơlam toh glài jàm, nàng broă lơh toh glài jàm nam 2026 lơh geh cồng nha niam, ală kâp, ală gah broă lơh, ală tiah kờñ pal sền gròi rlau tai tus broă lơh kis gơ rờm wơl mờ mpồl bơtiàn ai cau geh toh glài jàm rê wơl tàm ƀòn lơgar in, tơrgùm lơh pràn mblàng yal, tơnguh jơnau git wă mờ kơnòl bơh ală kâp ủy Đảng, gơnoar atbồ tàm ƀòn lơgar, ală mpồl lơh broă cíñ trị - mpồl bơtiàn, mpồl cau mờ làng bol, pleh ờ tàm rờm, at tê bal dong kờl cau geh toh glài jàm sang tĕ bơta bàs sìl bè tìs glài he dê.