Ngai 27/5, Ƀộ Lơh sơnơm pơgồp bal mờ Anih duh broă Làng bol càr Quảng Ninh bơyai lơh dơ̆ Lam lơh Nhai lơh broă tài kơnòm dềt nam 2026 mờ tơngume “Kơnòm dềt gơ boh gơbài, lơngăp lơngai, cơnđoà kơ̆ tàm rài sồ”.

Đơs tàm dơ̆ lam lơh, Phó Củ tịc lơgar mò Võ Thị Ánh Xuân đơs sùm kơnòm dềt là rài tơnơ̆ do bơh Dà lơgar dê, bơcri ai kơnòm dềt in ngan là bơcri ai bơta bơtàu tơnguh kơnhăp kơ̆ bơh dà lơgar dê. Ală nam do, uă gùng dà broă lơh dong kờl kơnòm dềt neh geh lam lơh geh cồng nha bè ờ sa priă, tơrmù priă bơsram ai kơnòm bơsram kấp pe; dong kờl dơ̆ sa ai kơnòm bơsram ơm sa klo ngai; bơt bơtàu hìu bơsram ơm sa bĭc tơn tàm hìu bơsram ală kấp... Nhai lơh broă tài kơnòm dềt nam do rơ̆p lam lơh uă broă lơh geh ngan tàm làm gùt lơgar bè tơnguh uă bơta chài sồ mờ lơngăp lơngai tàm internet ai kơnòm dềt in; rcang lài kơryan bŭ dà, rềs àr sồt să, lơh pờng mờ sơgràm bĭc bài kơnòm dềt; hòi jà priă jền sền gàr kơnòm dềt in.