Tàm dơ̆ tìp măt, Bàr Kwang đơng lam tơlik nùs nhơm chờ hờp tềng đăp mờ broă bơtàu tơnguh niam bơnĕ bơh bơta git gơ̆p lơh broă bal đah lơgar Việt Nam mờ lơgar Lào dê tàm tơngai do tàm jơh ală gah broă, bơh chính trị, cri bơyai broă mờ lơgar ndai, lơngăp lơngai, sền gàr dà lơgar tus mờ lơh sa, niam chài, bơto bơtê mờ lơh broă bal ală càr ƀòn dờng dê. Tàm tơngai tus, bàr gah ring bal pơn jăt tai tơnguh nùs nhơm pin dờn chính trị; geh sùm ală dơ̆ tus còp, tìp bal kấp dờng mờ ală kấp tàm ală gah Đảng, Dà lơgar, Quốc hội, Mpồl duh broă Làng bol mờ tìp bal làng bol; lơh pràn lơh broă bal mìng dùl gah broă, tam pà bal broă lơh mờng chài đah Mpồl duh broă Jơi bơtiàn, ală Anih duh broă mờ Mpồl nghị sìh git gơ̆p lơh bơyô bal đah bàr lơgar tàm broă bơ̆t bơtàu adăt boh lam, jăt sền mờ ai tơlik ală bơta kwơ màng bơh dà lơgar dê; pơn jăt tai kờñ bal tàm ală pơrjum nghị viện tiah do mờ ală lơgar bè AIPA, IPU, APF nàng sền gàr bơta kwơ bal bơh bàr lơgar mờ tiah do dê.

Bàr gah ring bal pơgồp bal nền nòn bơyai lơh niam ală broă tơnkah 65 nam crơng gơs bơta git gơ̆p cri bơyai broă mờ lơgar ndai mờ 50 nam kĭ Kơrnoăt hơ bal git gơ̆p lơh Bơyô bal mờ lơh broă bal đah lơgar Việt Nam mờ lơgar Lào tàm nam 2027, lơh geh uă bơhiàn ờs mờng git gơ̆p lơh bơyô bal, tam klăc bal kwơ màng đah lơgar Việt Nam mờ lơgar Lào tus ală mpồl làng bol bàr lơgar, tàm hơ̆ uă ngan là rơnàng kơnòm să. Bàr lơgar pơn jăt tai lơh geh cồng nha ală jơnau ring bal kấp dờng mờ cồng nha Pơrjum dơ̆ 48 Anih duh broă bàr Chính phủ Việt Nam mờ Lào, cèng geh bơta kwơ mùl màl ai làng bol bàr lơgar in, pơgồp bal tàm broă bơ̆t bơtàu bơta git gơ̆p đah lơgar Lào mờ lơgar Việt Nam sùm sùm tơlir niam, rài rài kơl jăp.