Tàm dơ̆ wă, Thủ tướng đơs nền lơgar Việt Nam sền kwơ bơta git gơ̆p lơh bơyô bal ờs mờng mờ lơgar Croatia mờ đơs niam ală broă bơtàu tơnguh niam tàm lơh broă bal đah bàr lơgar dê tàm tơngai do. Tàm tơngu me bơta pràn lơh broă bal gam ơnàng niam, Thủ tướng sồr bàr gah lơh pràn kơl dang rơlao tai lơh broă bal lơh sa, kă bro phan mờ bơcri priă; lơh ngan gờñ tơnguh khà kă bro phan đah bàr lơgar uă rơlao bàr dơ̆ mờ khà 161 tơlăk Dolar Mỹ tŭ do.

Thủ tướng kung sồr kơlôi sơnơng lơh geh kơrnoăt boh lam Anih duh broă tơrgùm bal bè lơh broă bal lơh sa nàng ai geh broă lơh pràn lơh broă bal kơl jăp, jŏ jòng mờ geh cồng nha. Lơgar Việt Nam lam sồr mpồl lơh sa kă bro lơgar Croatia tơnguh bơcri priă tàm ală gah broă geh bơta pràn bè anih ơhò dà lềng, logistics, năng lượng lơh geh wơl, lòt nhơl, bơta jăk chài – măi mok, tam gơl sồ mờ rơcang kơrian tam gơl nhơm trồ tiah. Ƀộ trưởng Ƀộ Cri bơyai broă mờ lơgar ndai lơgar Croatia ồng Gordan Grlić Radman đơs nền lơgar Croatia sùm sền kwơ bơta git gơ̆p mờ lơgar Việt Nam mờ tŭ lơi kung kờñ pơgồp bal lơh geh cồng nha ală kơrnoăt lơh broă bal đah bàr gah dê, tơnguh broă tơbŏ bal mpồl lơh sa kă bro mờ rề ơnàng lơh broă bal tàm uă gah broă geh sền gròi bal.