Do là dơ̆ lòt còp ngan ngồn sơn rờp bơh cau lam bồ Đảng, Dà lơgar Việt Nam dê tus Thái Lan tơnơ̆ Pơrjum dờng dơ̆ XIV bơh Đảng dê mờ tơnơ̆ tŭ Mpồl đơng lam pa bơh Việt Nam dê geh pồ tơl. Pal sền gròi, Thái Lan là lơgar ASEAN sơn rờp geh Tổng Ƀí thư, Củ tịc lơgar rơ wah lòt còp ngan ngồn tàm ròt ală broă lơh lơh broă mờ lơgar ndai kâp dờng tàm tiah do. Dơ̆ lòt còp geh lơh tàm nam 2 lơgar tơngkah kir sơnrai 50 nam Ngai tơng gơs bơta git gơp cribơyai broă mờ lơgar ndai mờ tơnơ̆ tŭ Việt Nam - Thái Lan tơnguh gơnoar broă bơta git gơp gơ gơs Lơgar lơh broă bal jŏ jòng tơl làm tàm nhai 5 nam 2025. Dơ̆ lòt còp geh kơp kơnờm lơh gơlik bơta gơn kơnờm pa chồl tơnguh lơh broă bal bàr gah ngai sơlơ ngan ngồn, jrô ơnàng, tă pơgồp jơh nùs tàm ring lơngai, kơ̆ kơljap mờ bơtàu tơnguh bơh kơnhoàl ù tiah ASEAN dê.