Ala mat đơng lam Đảng, Dà lơgar, Tổng Ƀí thư, Củ tịc lơgar neh jàu Jơnau lơh nền bơh Quôk hội dê bè broă tơng gơs ƀòn dờng Đồng Nai mờ jàu pa Gai lòng Lơh broă khà Dùl ai Đảng ƀộ, gơnoar atbồ mờ làng bol ƀòn dờng in. 

Đơs tàm dơ̆ bơyai lơh, Tổng Ƀí thư, Củ tịc lơgar ồng Tô Lâm đơs sùm, tàm ală dơ̆ tam lơh, Đồng Nai là rùp pơrya bơh nùs nhơm khin cha jak chài, kơ̆ dơn, jơh nùs mờ Đảng, Dà lơgar tờm mờ làng bol. Bơh ù tiah bềng lìu bơhiàn kac màng, Đồng Nai neh brồ guh gơ gơs là dùl tàm ală tiah tờm lơh sa mờ măi mok, tiah drà mờ mut gơ rờm bal kuơmàng ngan bơh gùt lơgar dê. Broă gơ gơs ƀòn dờng gơ wèt Dà lơgar lơh gơs gơl gùng bơtàu tơnguh pa, sồr pal geh broă rơndap lơh kuơmàng, pràn jak đơng lam broă pa mờ kơnòl dờng rlau tềng đap làng bol, wèt tus jơnau kờñ ai Đồng Nai mut tàm mpồl ală ƀòn dờng pal kis, pal sơn đờm mut lơh broă bơh câu Á mờ dunia dê.