Tổng Ƀí thư, Củ tịc lơgar ồng Tô Lâm jờng rơ ală Tập đoàn dờng lơgar Thái Lan dê pờ ơnàng bơcri priă, lơh sa kă bro tàm lơgar Việt Nam, ngan là tàm ală gah di pal mờ jơnau kờñ bơtàu tơnguh bơh lơgar Việt Nam dê mờ geh bơta pràn lơh geh tai bơta kwơ ai bơta gĭt gơ̆p lơh broă bal đah 2 gah.

Tổng Ƀí thư, Củ tịc lơgar đơs sùm, Việt Nam sền dờng màng bơta Tam klăc lơh broă bal kwơ màng tơl làm mờ lơgar Thái Lan, tàm hơ̆ lơh broă bal lơh sa, kă bro phan, bơcri priă mờ tàm tơrbŏ mpồl lơh sa kă bro là anih tờm kwơ màng, pơgồp bơnah sơlơ tơnguh tai gơguh tai kơnhăp jŏ mờ sơlơ tơnguh tai lơh bal đah 2 rài lơh sa dê. Cih dờp broă lơh bơcri priă, lơh sa kă bro bơh Tập đoàn TCC tàm Việt Nam tàm ală nam do, Tổng Ƀí thư, Củ tịc lơgar pơn jờng Tập đoàn pơn jat tai bơcri priă, bơtàu tơnguh lơh broă lơh sa kă bro tàm Việt Nam jat gùng dà tơnguh uă bơta pràn jak atbồ, sơlơ tơnguh tai ngui jak chài mờ măi mok, tam gơl pa bơceh lơh, sền gàr tiah ơm kis mờ tă pơgồp jơh nùs ai mpồl bơtiàn ƀòn lơgar in.

Kung tàm broă lơh lòt còp lơgar Thái Lan, lài hơ̆, Tổng Ƀí thư, Củ tịc lơgar ồng Tô Lâm neh tus chu ñàng tàm Tiah Tềl lời wơl Củ tịc Hồ Chí Minh mờ tìp mat mpồl bơtiàn cau Thái jơi tờm Việt nam gam ơm kis tàm tiah đah Tô mat tơngai Lik lơgar Thái Lan dê.