Lơh sơnơm bal mờ bơta niam chài, bơto bơtê là ală gah broă tờm kwơ màng ngan, ờ mìng là khà broă mờ gam là bơta pràn nàng bơtàu tơnguh cau lơh broă. Hơ̆ là jơnau đơs bơh Tổng Ƀí thư ồng Tô Lâm dê tŭ Quốk hội cri bơyai tàm mpồl bè 2 broă lơh Jơnau kờñ dà lơgar bè sền gàr bơta pràn kơl dang să jan, khà kờp làng bol mờ bơtàu tơnguh bal mờ broă lơh pa, tơnguh uă ngan bơta niam broă bơto bơtê mờ bơsram tơngai bơh nam 2026 tus 2035. Jăt Tổng Ƀí thư đơs, jơnau kờñ dà lơgar dê ờ di mìng is bơh gah bơto bơtê ha là gah lơh sơnơm, mờ là bơh gùt mpồl bơtiàn, gùt làng bol pal tus bal. Mờ gah lơh sơnơm, Tổng Ƀí thư sền gròi ngan tus mờ jơnau sồr tam gơl bơta tờm tus broă sền gàr bơta pràn kơl dang să jan lài ngan mờ rơcang lài, bơsong jơh ală bơta tàm tiah kis, dà sàng kloh, kloh niam phan sa – do là ală bơta tờm lơh gơtìp kòp tê jê să.

Di lah ờ bơsong bơh tờm ngan, bŭ lah bơcri priă tai git nđờ nàng lơh hìu sơnơm kung ờ di pal mờ jơnau kờñ sơl. “Mờ gah lơh sơnơm, bơta kwơ màng là sền gàr bơta pràn kơl dang să jan lài ngan, pal ai broă rơcang lài. Di lah bè tŭ do gam lòt uă tàm broă kham sơm kòp, bè là gam crùh ồs sa mơ – tài broă rơcang lài mờ pràn den tàng kòp geh uă. Pal ai tơl gah broă dùl, broă lơi gam ờ pràn? 5 nam tai he geh kơrian jơh lah ờ? Pal loh làng bè hơ̆. Kòp bơsiă jòr tàm dunia neh sơrbì jŏ bloh, lời gơtờp tàm tiah lơi kung rơcang kơrian roh uă ngan priă. Kòp viêm gan bè lơi, gơtờp bè lơi? Añ đơs là broă lơh dà lơgar là pal mŭt tàm ală broă mùl màl, ală jơnau kờñ hơ̆ gơdê”.

Broă lơh jơnau kờñ dà lơgar bè sền gàr bơta pràn kơl dang să jan, khà kờp làng bol mờ bơtàu tơnguh tơngai bơh nam 2026 tus 2035 geh Quốk hội ring bal, mờ jơnau kờñ tơrgùm bal là gàr niam ală làng bol ndrờm geh atbồ, sền gàr bơta pràn kơl dang să jan lài ngan, rơcang kơrian kòp bơh gờñ, bơh ngài, bơh tàm ƀòn, tơrmù kòp tê jê să; tơnguh khà deh, lơh ngan khà cau klao mờ cau ùr tŭ deh geh ndrờm bal, gơdờp bal mờ bơta kra khà kờp làng bol, tơnguh uă bơta niam khà kờp làng bol; tơnguh broă sền gàr bơta pràn kơl dang să jan ai ală mpồl cau ƀuơn gơtìp aniai; pơgồp bal tàm broă tơnguh uă bơta pràn kơl dang să jan, nùs nhơm, bơta dờng pràn, sơnam kis mờ bơta niam rài kis bơh làng bol dê, bơ̆t bơtàu lơgar Việt Nam pràn kơl dang.

Bè gùng dà bơcri priă Broă lơh jơnau kờñ dà lơgar bè sền gàr bơta pràn kơl dang să jan, khà kờp làng bol mờ bơtàu tơnguh tơngai bơh nam 2026 tus 2035, broă lơh wèt tus atbồ bơta pràn kơl dang să jan gùt làng bol, tơnguh uă bơta pràn broă lơh sơnơm tàm sàh, rơcang kơrian lài kòp bơh gờñ, tơnguh bơta niam khà kờp làng bol, rơcang kơrian mờ kra uă mờ tơnguh broă dong kờl ai mpồl cau ƀuơn gơtìp aniai in.

Ƀộ trưởng ƀộ Lơh sơnơm mò Đào Hồng Lan pà git: “Bè ală rơndăp broă lơh, tơngu me lơh broă bơh broă lơh, neh tơrgùm bơta pràn nàng lơh jăt. Tơngu me tờm nàng tơnguh uă bơta niam bơh broă lơh sơnơm tàm ƀòn, lơh sơnơm rơcang gàr lài, lơh pràn broă khà kờp làng bol, bơtàu tơnguh gàr niam khà kờp làng bol, gơdờp mờ bơta kra khà kờp làng bol, sền gàr mpồl bơtiàn ai ală cau ƀuơn gơtìp aniai in. Do là ală tơngu me, bơta tờm ngan bơh broă lơh sơnơm mờ khà kờp làng bol, gam kờñ tơrgùm bơta pràn nàng bơsong, gơkòl tàm broă lơh jăt. Ală bơta gơkòl nàng lơh geh ală jơnau kờñ kwơ màng neh geh đơs tàm jơnau lơh nền tàm pơrjum dà lơgar dê”.

Jơnau kờñ mùl màl bơh Broă lơh jơnau kờñ dà lơgar dê bè sền gàr bơta pràn kơl dang să jan, khà kờp làng bol mờ bơtàu tơnguh tơngai bơh nam 2026 tus 2035 là pơgồp bal tàm broă lơh jăt jơnau kờñ khà sàh, sơnah ƀòn, tiah is ồn Mpồl khà broă dà lơgar bè lơh sơnơm là 90% tàm nam 2030 mờ 95% tus nam 2035. Lơh ngan khà làng bol geh lơh sră sền gàr bơta pràn kơl dang să jan điện tử mờ atbồ bơta pràn kơl dang să jan jăt rài kis geh 100% bơh nam 2030. Khà anih tờm gròi sền kòp tê jê să ală càr, ƀòn dờng tơl pràn xét nghiệm ták ñân, kháng nguyên, kháng thể ală kòp gơtờp ngòt rơngơ̆t, bơta kloh niam dà, kloh niam hìu bơsram jăt mờ jơnau geh ai bơh Ƀộ Lơh sơnơm dê tus nam 2030 geh 100%. Khà hìu sơnơm sàh, sơnah ƀòn, tiah is ồn lơh jăt broă rơcang lài kơrian kòp, atbồ, sơm kòp ờ uă bơta kòp ờ gơtờp jăt jơnau bơto sồr bơh Ƀộ Lơh sơnơm dê tus nam 2030 geh 100% mờ geh sùm tus nam 2035. Khà gơtìp rơgai ờ pràn tàm kơnòm dềt hờ đơm 5 sơnam tus nam 2030 gơmù gam hờ đơm 15% mờ tus nam 2035 gơmù gam hờ đơm 13%.